14
Jeroboam Ciihan Detahnaw
1 Tuh ccyh lyakhe Jeroboam ccapaw Abijah tuh a ccih.
2 Jeroboam nynh a zu kha, “Thokuh lah, Jeroboam zu na thuapaw kha ae ny khyh ccaw hae, na muinsan rulaekuh lah, Shiloh khua lang la cceih; pawccecize hynh-e ccungccaw hae kya siapharan lang na tang cih cite yn hopahpaw profeh Ahijah tuh tuin khua kya a um.
3 Sanlou apyngpaw ccanghaw, sanlou aphepaw beihtaraw te khoitui ling kheit la ccyngpah lah a kalan la cceih; imua tungvaw acyihkuh lanpaw kha ae hopah cih,” a cipya.
4 Jeroboam zu nynh tuhcite a cyi; thokuh zah Shiloh khua lang cceih zah Ahijah inn kya a thua. Ahijah tuh a taw vae keiccuze a mitmoh vae zah ngawmuih kho vae khyh.
5 Thuasalama Bawipaw nynh Ahijah kha, “Jeroboam zu tuh a ccapaw a cci keiccuze a ccapaw konglang byakhia khylan na kalan yn cceih cciamang. Aning kha tuhte khahte na hopah cih,” a cipya.
Aning he yn thua tuh, ccangpaw nopi lante a muinsan a rulaeku.
6 Thuasalama thuakaw kya yn tee zah a laanccia siho kha Ahijah nynh he a thae tuh, “Jeroboam zu, yn tee; pawccemou mingccangpaw hawte na umsaku? Pawccecize nang na elang thethyapaw hopya lan kae hynh naw ka thua.
7 La cceih lah, Jeroboam kha, ‘Bawipaw , Israel Pachia nynh hynhte a ho: Ccungccaw hae laku kyate nang kha kae hangthung zah, ka ccungccaw Israel hae cciakhaetu lang kae rae,
8 David ciihan kyate peenaw kha ka lah zah nang kha kae pya; tuhzemah ka kawbya kha zui zah a thinlung balynte kae kha yn zui zah ka muihnaw kya akyhpaw kyalya a cyihtupaw ka ryalahtu David hawte na thua khyh,
9 nang tuh nang na maw e ccungccaw hae balyn laeze hoyleinaw kha na raehua vae, ka thinriasah khylan ccangpaw pachia hae kha raekute azuh hae kha na raekuh zah kae kha na nulang nae vua;
10 tukeiccuze Jeroboam ciihan kya hoyleinaw kha ka thuasah cih. Jeroboam kya-e pise miakaw, Israel ram kyaze a luepaw thuasah, a lue leipaw thuasah ka vua cih hae zah, ccungccaw nynh ia kha marya a phi hawte Jeroboam ciihan kha ka maemih cih.Ref 14.10: 1Si 15.29
11 Jeroboam te asekuhpaw ccungccaw miakaw khualae lungkhu a chihpaw kha ui nynh a ae cih; ramkaw kya a chihpaw miakaw kha azouthyapaw pavaw nynh a ae cih; pawccecize Bawipaw nynh phe a ho vae,’ cite la hopah.
12 Tukeiccuze thokuh lah, na inn lang la cceih. Na ccu nynh khua lungkhu he a sy te, imua tuh a chih cih.
13 Israel hae balyn nynh amaw hanlan a rah cih hae zah a uh cih hae; pawccecize Jeroboam innbyn kyaze amaw kyalya hynh shawku kya uu athua cih, pawccecize Jeroboam ciihan kyaze amaw tungvaw kya rou nynh Bawipaw , Israel Pachia tuh ccapyh a lungrythua.
14 Tuhpiaze atunin, atu ccyh kya maw hin, Jeroboam ciihan a zosah cih paw Israel siapharan lu kheit kha Bawipaw nynh amaw elang a langsakuh cih.
15 “Phaeku kha tui lungkhu kya hy athua hawte, Bawipaw nynh Israel kha a hy cih; mih minpaaw hae a pya hae paw hynh-e ram hoypaw kyate Israel kha poh a khaee cih, Zufrates vaw khuraw lang cia phiariphiarae a nung cih hae, pawccecize minmin nynh Asherah zohtuh hae kha raekute Bawipaw thin a riasah hae.
16 Jeroboam nynh amaw a seinaw keiccu te Israel hae kha seinaw a raesah hae keiccuze Israel kha a vua cih,” a cipya.
17 Te Jeroboam zu tuh thokute cceih zah Tirzah khua a thua. Inn thuakaw kya he a tee lyakhe imua tuh a chih.
18 Bawipaw nynh a ryalahtu profeh Ahijah kyate a hopaw bya thyhte, Israel hae balyn nynh imua kha uh hae zah a rah hae.
Jeroboam Chinaw
19 Tuhlaepaw Jeroboam a ryalawnaw hae, pawtemou rhaw a tuk cipaw te pawtemou a uk cipaw balyn tuh Israel Siapharan hae Phungpaw Ccauh kya a zei hae.
20 Jeroboam nynh kum kuin lae ning a uk; a minpaaw hae ryte ih hae zah a ccapaw Nadab tuh amaw ccelang siapharan lang a tang.
Rehoboam nynh Judah A Uk
(2Sh 11.5—12.15)
21 Solomon ccapaw Rehoboam nynh Judah ram kha a uk. A uk takaw lya tuh sung pali kum kheit acih vae, Bawipaw nynh amaw min kha nung nawlan Israel phin hae balyn kyate a popaw Jerusalem khua kya kum haw lae sari a uk. A nung tuh Ammon minphuin Naamah nynh thua.
22 Judah hae nynh Bawipaw muihnaw kya hoyleinaw kha a rae hae; mih minpaaw hae nynh a rae hae paw seinaw balyn laeze alunghua lante a rae hae paw mih seinaw khate Bawipaw kha a thinriasah hae.
23 Pawccecize ahangpaw mua miakaw te hinlalyhpaw thingku kaw miakaw khe hmin hangpaw hae, zohtuh hae te Asherah zohtuh hae kha a raeku hae;Ref 14.23: 2Si 17.9-10
24 beikinn kya a ohhuakuhpaw pise hae kha mah ram lungkhu kya a um hae. Bawipaw nynh Israel hae malang kyate a dee hae paw minphuin hae nynh a cyi hae paw anungsikuhpaw balyn kha a cyibua hae.Ref 14.24: Deu 23.17
25 Rehoboam nynh siapharan lang a tangnaw kum pangawnaw kum khe Izip siapharan Shishak nynh Jerusalem kha tuk lan a ccianua thung;
26 Bawipaw inn kya-e sisua hae te siapharan inn kya-e sisua hae kha a law hae. Atyn-are pong a law. Solomon nynh a raepaw sui khawriaphua balyn kha mah pong a law;Ref 14.26: 1Si 10.16-17; 2Sh 9.15-16
27 tukeiccuze Rehoboam Siapharan nynh sohin khawriaphua hae kha raeru zah, siapharan inn thuakaw a ngaw hae paw rhawviatu hae kya-e bawi hae kha a ap hae.
28 Siapharan nynh Bawipaw inn lungkhu lang a tee takyh vae ze, rhawviatu hae nynh khawriaphua hae kha a ccyngku hae, te rhawvianaw khaan kyakhe bua leih a nung hae.
29 Tuhlaepaw Rehoboam nynh rya a lawpaw te a cyipaw balyn tuh Judah Siapharan hae Phungpaw Ccauh kyakhe a zei hae.
30 Rehoboam te Jeroboam tuh rhaw po a tukkuh hae.
31 Rehoboam tuh a minpaaw hae ryte ih hae zah David khua kyakhe a minpaaw hae ryte a uukheih hae. A nung tuh Ammon minphuin Naamah nynh thua. A ccapaw Abijam nynh amaw ccelang siapharan lang a tang.