13
Judah Ram e Pachia Ccungccapaw
1 Jeroboam tuh mynkhuhpaw u khylan silawhang pe a thadyn lyakhe, Pachia ccungccapaw lu kheit tuh Bawipaw bya thyhte Judah ram kyate Bethel khua yn thua zah,
2 Bawipaw bya thyhte silawhang kha sianua zah, “Pou silawhang, silawhang, Bawipaw nynh hynhte a ho: ‘David ciihan kyate a min Josiah cikuhpaw ccapaw lu kheit yn pui cih; nang na vawlan mynkhuhpaw u hae zah hmin hangpaw kya ranpibawi rya a lah hae paw kha tuh-e ccungccapaw nynh nang na vawlan khe si a lawnah cih hae zah, ccungccaw ru hae tuh na vawlan khe u athua cih hae,’ a ci,” cite a hopya.Ref 13.2: 2Si 23.15-16
3 Tuin nin khe muihsahnaw ccangkheit pya zah, “E hynh Bawipaw nynh a hopaw muihsahnaw nynh thua; ‘Silawhang tuh a koi cih zah a vawlan umpaw buhhaw tuh alaekuh cih,’ a ci,” cite a ho.
4 Pachia ccungccapaw nynh Bethel khua kya silawhang a sianuapaw bya kha Jeroboam siapharan nynh he a thae tuh, silawhang kyate a kuih kha dyng zah, “Khah-e paw kha kyng oh!” a ci. Te a dyngpaw a kuih tuh karae rou zah khin kho vae khyh.
5 Bawipaw bya nynh Pachia ccungccapaw a pyapaw muihsahnaw thyhte, silawhang tuh mah koi zah silawhang kyate buhhaw tuh alaekuh.
6 Siapharan nynh Pachia ccungccapaw kha, “Ka kuih hynh a danthya nawlan, Bawipaw na Pachia thawccinaw kha yn ngiapah lah, saw yn sangpya tua,” a cipya. Tukeiccuze Pachia ccungccapaw nynh Bawipaw kha a ngiapya; te siapharan kuih tuh bua danthya zah atakaw lya hawte a dan vae.
7 Te Siapharan nynh Pachia ccungccapaw kha, “Kamaw ryte ka inn lang cceihbua lah, looh aebua hin, lasung kae pya cih,” a cipya.
8 Pachia ccungccapaw nynh siapharan kha, “Na peenaw angankuh kha nae pya zemah, na kalan ka cceihbua lan khyh; e hmin kya looh ka ae lan khyh, tui mah ka neih lan khyh.
9 Pawccecize Bawipaw bya nynh kaw yn pya zah: Looh na ae lan khyh, tui mah na neih lan khyh, na ccianaw laanpi te na ki lan khyh, yn cipya,” cite a hopya.
10 Tukeiccuze ccangpaw laanpi te cceih zah, Bethel lang yn ccianaw laanpi te ki vae khyh.
11 Tuh lyatuin Bethel khua kya ataw vae paw profeh lu kheit a um. A ccapaw hae oun thua hae zah, Pachia ccungccapaw nynh tuin nin Bethel khua kya a cyipaw balyn kha a hopya hae; siapharan a hopyapaw bya kha mah mih paaw kya a hopya hae.
12 Mih paaw nynh minmin kha, “Paw laanpi kyate mou a ccia?” cite a khia hae. Judah ram kyate yn thuapaw Pachia ccungccapaw nynh a ccianaw laanpi kha a ccapaw hae nynh a hopya hae.
13 Te a ccapaw hae kyakhe, “Lann kha khungnin yn depah oh,” a cipya hae. Tukeiccuze minmin nynh lann kha khungnin depah hae zah a ccikuh.
14 Pachia ccungccapaw kha deehui zah phaesi ku kaw a haungpaw kha a muih; te aning nynh, “Nang hynh Judah ram kyate yn thuapaw Pachia ccungccapaw na thua tou?” cite khia zah, tuh-e paw nynh, “Ka thua,” cite a khung.
15 Te aning nynh, “Ka inn lang kamaw kya cceihbua lah, looh ae hin,” a cipya.
16 Thuasalama tuh-e paw nynh, “Na kya ka kibua lan khyh, na inn lang mah ka teebua lan khyh; e hmin kyahin nang na kya looh ka ae lan khyh, tui mah ka neih lan khyh;
17 pawccecize Bawipaw bya nynh yn hopah zah: Tuin hmin kya looh na ae lan khyh, tui mah na neih lan khyh, na ccianaw laanpi te na ki lan khyh, yn cipya,” cite a hopya.
18 Te aning nynh tuh-e paw tuh, “Kae mah nang hawte profeh nynh ka thua; vaawpaw nynh Bawipaw bya thyhte yn hopah zah: Aning nynh looh ae zah tui mah a nia ccaw, na inn lang kikhae, yn cipya,” cite a hopya. Thuasalama aning nynh tuh-e paw kha a lingpaw nynh thua.
19 Tukeiccuze Pachia ccungccapaw tuh tuh-e profehpaw ryte kikheih hae zah, a inn kya looh ae zah tui mah a neih.
20 Aenaw ccaboi kya a haung lya hae khe, a kikhaetupaw profehpaw kalan khe Bawipaw bya tuh yn thua zah,
21 Judah ram kyate yn thuapaw Pachia ccungccapaw kyakhe, “Bawipaw nynh hynhte a ho: Bawipaw bya kha na ngae khyh zah, Bawipaw na Pachia nynh kaw ae pyapaw kawbya kha zui leite,
22 na ki zah, ‘Looh ae nan, tui neih nan,’ cite ae hopyanaw hmin kyakhe looh na ae zah tui na nia keiccuze na pyn tuh na minpaaw hae shawku kya thua lan khyh, a ci,” cite a sia.
23 Pachia ccungccapaw tuh looh ae zah tui a neih koute, a kikhaetupaw profehpaw kya-e lann kha khungnin a depya hae.
24 Te a ccia lyakhe laanpi kya chindeih te tungkuh hae zah chindeih nynh phe a tei. A rhua tuh laanpi kya huekuh zah, lann tuh a pe a thadyn; chindeih tuh mah a rhua pe a thadyn.
25 A rhua tuh laanpi kya huekuh zah chindeih tuh a rhua pe a thadynpaw kha khuaccong hae paw nynh a muih hae. Te cceih hae zah atawpaw profeh a umnaw khua kyakhe tuh-e tuh a ho hae.
26 Laanpi te yn kikhaetupaw profehpaw nynh tuh-e bya he a thae tuh, “Bawipaw bya a zui leipaw Pachia ccungccapaw nynh thua; tukeiccuze Bawipaw nynh a hopyapaw bya thyhte, Bawipaw nynh amaw kha chindeih kalan pya zah chindeih nynh tei zah a chia,” a ci.
27 Te aning nynh a ccapaw hae kyakhe, “Lann kha khungnin yn depah oh,” a cipya hae. Tukeiccuze minmin nynh khungnin a depya hae,
28 te cceih zah laanpi kya a rhua huekuh zah, a pe kya lann te chindeih a thadyn hae paw kha a muih. Chindeih nynh a rhua kha ae khyh, lann kha mah tei khyh.
29 Profehpaw nynh Pachia ccungccapaw rhua kha lah zah lann tungvaw khang zah, rawhui khylan te uu khylan khualae lang a kikhae.
30 A rhua kha amaw shawku kya a uu; te rawhui zah, “Ezou, ka neitawpaw!” a ci.
31 A rhua kha a uh koute a ccapaw hae kyakhe, “He ka chih te, Pachia ccungccapaw a uukunaw shaw kya nae la uh cih oh; ka ru hae kha a ru hae pe khe na la nung cih oh.
32 Pawccecize Bethel khua e silawhang te Samaria khua hae kya umpaw hmin hangpaw hae kya-e inn hae balyn kha rawse zah Pachia bya thyhte a sianuapaw bya tuh solei a la ccing cih,” cite a hopya hae.
33 E acyihkuhpaw koute mah Jeroboam tuh a cciaseinaw laanpi kyate maeku leite, hmin hangpaw elang ranpibawi hae kha ccungccaw hae balyn laku e kha a khang hae; hmin hangpaw elang ranpibawi lang a tang rypaw miakaw kha a thyaasah hae.
34 E hynh Jeroboam ciihan a zosahpaw te laephi vawlan kyate a rosahpaw seinaw lang a tang.