9
Gibeon hae nynh Joshua A Ling hae
1 Jordan khuraw lang mua vaw e ram te laephi anenaw ram, Lebanon ram cia Rili Pi vahue kya po um hae paw Hit hae, Amor hae, Kanaan hae, Periz hae, Hiv hae te Jebus hae mih siapharan hae balyn nynh e kong a thae hae tuh,
2 Joshua te Israel kha dou khylan lunglokute pynkheihlan a pumkuh hae.
3 Thuasalama Joshua nynh Jeriko khua te Ai khua kya a cyipaw kha Gibeon khuaccaaw hae nynh he a thae hae tuh,
4 thyaruhhahi lante rya a law hae: cceih hae zah vaelooh kha a paccynku hae, mih lann hae hanlan aseiikuhpaw sungkua kha mang hae zah, apuepaw, aseiikuhpaw te abiakuhpaw misutui-saphuabawng kha a phusah hae,
5 pae zah bia vae paw phanah kha nahkuh hae zah boeining puesalaepaw kha a lawku hae; te mih vaelooh balyn tuh rou zah amua vae.
6 Te Gilgal khua ryahmin kya um hae paw Joshua te Israel hae kalan cceih hae zah, “Laansawpi umpaw ram kyate nynh kae thua; tukeiccuze kaening ryte byakinnaw rae oh,” a cipya hae.
7 Thuasalama Israel hae nynh Hiv hae kha, “Nanning hynh kaening laku kya um hae paw mah poh na thua kho oh, pawtemou nanning te byakinnaw ah rae kho cih oh?” a cipya hae.Ref 9.7: Exo 23.32, 34.12; Deu 7.2
8 Minmin nynh Joshua kha, “Kaening tuh na ryalahtu hae nynh kae thua,” a cipya hae. Te Joshua nynh minmin kha, “Hum hae mou na thua oh? Paw kyate mou nae thua oh?” a cipya hae.
9 Te minmin nynh, “Bawipaw na Pachia min keiccuze laansawpi e ram kyate nynh kae thua; pawccecize Pachia kong kha thuasah, Izip ram kya a cyipaw balyn kha thuasah,
10 Jordan khuraw lang um hae paw Amor hae siapharan lu ning, Heshbon siapharan Sihon te Ashroth kya umpaw Bashan siapharan Og tungvaw a cyipaw balyn kha thuasah kae thae vae.Ref 9.10: Nam 21.21-35
11 Tukeiccuze kae piccan hae te kae ram e ccungccaw hae balyn nynh kaening kha, ‘Laanryng kya ae lanpaw vaelooh phukute la cceih oh, minmin kha la tungkuh oh lah, “Kaening tuh nae ryalahtu hae nynh kae thua; atu kaening te byakinnaw rae oh,” cite la hopah oh,’ oun cipya hae.
12 Vaelooh lang kae phukupaw sanlou tuh hein kya a um; laanryng hanlan kae phukupaw kae sanlou hae hynh kae inn kyate nae kalan ccia lan kae thoku nin tuh sokaleihpaw nynh thua, thuasalama atu tuh dotua oh, rou zah phe mua vae.
13 E misutui-saphuabawng hae hynh mah kae ruin takaw lya tuh athawpaw athua zemah, dotua oh, phe paw vae; te e kae boeining hae te kae phanah hae hynh mah kae laanccia eih saw keiccu pue zah apae vae,” a cipya hae.
14 Tukeiccuze cciakhaetu piccan hae nynh mih vaelooh kha ae hae zah, Bawipaw tuanaw kha ngiakuh khyh hae.
15 Te Joshua nynh minmin ryte ccawkunaw rae zah, mih hiinnaw haang lante aamah a khanpyaku hae; te ccungccaw zapi cciakhaetu hae nynh minmin kha thyalawkute bya a kinpyaku hae.
16 Minmin ryte byakinnaw a rae kou hae te nin thum he aro te, Gibeon hae tuh mih innpaw hae thua hae zah mimaw kya a um hae paw nynh thua cipaw kha a ny hae.
17 Te Israel hae nynh cceih hae zah nin thum te mih khua a thua hae. Mih khua hae tuh Gibeon, Khefirah, Beeroth te Kiriath-jearim nynh thua hae.
18 Thuasalama Bawipaw , Israel Pachia liate ccungccaw zapi cciakhaetu hae nynh bya a kinpyaku vae hae keiccuze Israel hae nynh minmin kha tuk khyh hae. Te ccungccaw zapi balyn nynh cciakhaetu hae kha a seisah hae.
19 Thuasalama cciakhaetu hae nynh ccungccaw zapi hae balyn kyakhe, “Bawipaw , Israel Pachia min te kaening nynh minmin kha bya kae kinpyaku vae hae keiccuze minmin kha ty lei lan vae hae.
20 Mih tungvaw kya aening nynh hynhte cyi lan: Aening nynh minmin kha thyalawkute bya ah kinpyaku vae oh keiccuze ah tungvaw kya thin-unaw accaw khyh nawlan, mih hiinnaw kha haang lan hae,” cite a hopya hae.
21 Cciakhaetu hae nynh, “Minmin tuh hiin ccaleih hae sah,” a ci hae. Tuhcite cciakhaetu hae nynh minmin konglang bya a pae vae hae hawte, minmin tuh zapi hae hanlan maeething tyatu lang te tui thetu lang a tang hae.
22 Joshua nynh minmin kha ko hae zah, “Kae kya mang na um oh pite, ‘Nae kyate laansawpi kya a um hae paw nynh kae thua,’ cite pawccemou nae ling oh?
23 Tukeiccuze nanning tuh thyalaw na thua vae oh zah, abang tuh see lang zungzae na tang cih oh, ka Pachia inn hanlan tui thetu te maeething tyatu na thua cih oh,” a cipya hae.
24 Minmin nynh Joshua kha, “Ram hae balyn hynh nanning pya lan zah, ram kya um hae paw balyn hynh nae malang ro lanpaw kha Bawipaw na Pachia nynh a ryalahtu Moses kya kaw a pya vae cipaw kha na ryalahtu hae kaening kya phe ria lan oun hopah hae zah, nanning keiccuze kae hiinnaw hanlan myarya kae ri pawte, hynh-e uccaw hynh kae cyi.
25 Atu kaening hynh na kuih kya nynh kae um: kae tungvaw kya cyi lan ahoy ahme cite na tua thyhte cyih ccaleih,” a cipya hae.
26 Tukeiccuze Joshua nynh minmin hanlan kha hynhte a cyi: minmin kha Israel hae kyate khum hae zah theih khyh hae.
27 Thuasalama tuin nin khe Joshua nynh minmin kha ccungccaw zapi elang thuasah, Bawipaw nynh a po cih paw hmin kya rae lanpaw silawhang elang thuasah atunin cia maeething tyatu lang te tui thetu lang a nung hae.