8
Ai Khua Taenaw te Ronaw
1 Te Bawipaw nynh Joshua kha, “Rih nan, na lungroh nan sah; rhawkaw balyn kha ko hae lah, namaw ryte Ai khua lang cceihthung oh. Ai siapharan kha a khua, a ccungccaw hae te a ram ryte na kuih kya kae pya vae.
2 Jeriko khua te a siapharan tungvaw na cyi hawte, Ai khua te a siapharan tungvaw na cyih cih; luadepaw uccaw te a sahiin-awvaw kyalya kha naemaw hanlan na lawkuh cih oh; khua kha anulang te buhkhaw oh,” a cipya.
3 Tukeiccuze Joshua te rhawkaw balyn tuh Ai lang ccia lan a thokuh hae. Joshua nynh arawthungpaw rhawkaw thong sung thum kha pote, khuazi khe kawpyate cciasah hae zah,
4 “Khua kha anulang te na buh cih oh; khua kyate myarya sawnaw lang cceih nan oh, nae balynte raeringkute na um cih oh.
5 Kae te kae umkheihpaw ccungccaw hae balyn nynh khua kha kae naenuakuh cih. Minmin nynh kaening kha he oun pounua hae te, atakaw lya hawte, kae ccuetaw cih hae.
6 Khua kyate asawnaw lang kae thua mawlaezung oun deehui cih hae; pawccecize minmin nynh, ‘Atakaw lya hawte oun ccuetaw vae hae,’ cite a ci cih hae. Minmin kyate kae ccue lyakhe,
7 na buhnaw oh kyate na thokuh cih oh zah khua kha na lah cih oh; pawccecize Bawipaw nae Pachia nynh khua kha nae kuih kya ae pya cih oh.
8 Te khua kha he na lah kou oh te, Bawipaw bya thyhte khua tuh maee te na soi cih oh; tuhcite kaw kae pya vae oh,” a cipya hae.
9 Tuhcite Joshua nynh saw hae zah buhnaw hmin lang a cceih hae, Ai te Bethel laku, Ai te niccaw langkhe a um hae; tuh-e khuazi tuh Joshua tuh ryahmin kya nynh a rya.
10 Te Joshua tuh awkhua takaw te tho zah ccungccaw hae kha a pum kou hae te, ccungccaw hae malang khe Israel piccan hae ryte Ai khua lang a cceih hae.
11 Te amaw kya um hae paw rhawkaw hae balyn tuh cceihthung hae zah, khua kalan a naekuh hae, Ai te thahlang khe a rya hae, Ai te minmin laku kya vuakarung ccangkheit a um.
12 Te pise thong pangaw kha ko hae zah, Bethel te Ai laku, khua te niccaw langkhe a buhsah hae.
13 Tuhcite rhawkaw hae kha nung hae zah, ryahminpi tuh khua te thahlang, nulang rhawvia hae tuh khua te niccaw langkhe a nung. Tuh-e khuazi Joshua tuh accya kya a rya.
14 Ai siapharan nynh tuh-e tuh he a muih te, amaw te a ccungccaw hae balyn te khuaccaaw hae tuh Israel hae kha tuk khylan Arabah accya lang ahawipaw tungkunaw hmin langkhe awkhua takaw te rangsakute a cceih hae; thuasalama khua nulang te oun buhkhaw hae cipaw kha nyh khyh.
15 Te Joshua te Israel hae balyn tuh mih malang khe rhaw phe shung hae paw hawte umsakuh nyn hae zah, ramkaw langkhe a ccue hae.
16 Tukeiccuze khua kya um hae paw balyn kha mimaw ryte pynkheihlan deehui khylan kokuh hae zah, Joshua kha khua te asawnaw lang cia a deehui hae.
17 Ai khua te Bethel khua kya Israel hae deehui lan a cceih leipaw pise lu kheit san um khyh; khua koikua kha khawsya leite Israel hae kha a deehui hae.
18 Oute Bawipaw nynh Joshua kha, “Na kuih kya umpaw thaloi khate Ai langkhe eetua; pawccecize Ai tuh na kuih kya kae pya cih,” a cipya. Te Joshua nynh a kuih kya umpaw thaloi khate Ai langkhe a ee.
19 A kuih he a dyng takaw te, a buhtu rhawkaw hae nynh mih umnaw kyate arangte thokuh hae zah, malang khe a naangbia hae, khua lungkhu lang teete khua kha lah hae zah, maee te palou a soi vae hae.
20 Tetuh Ai khuaccaaw hae nynh nulang he a do hae tuh, dotua, khua kya-e maeekhuh tuh vaawlui lang a kaethung vae. Minmin tuh teitei lang mah ccue khonaw thawzung hoi vae khyh hae, pawccecize ramkaw lang ccue hae paw nynh a deehuitu hae kha kinua hae zah a tuk vae hae.
21 A buhtu hae nynh khua a law vae hae cipaw te khua kya-e maeekhuh kha Joshua te Israel hae balyn nynh he a muih hae tuh, kinua hae zah Ai khuaccaaw hae kha a chia hae.
22 Te mingccang hae nynh khua kyate pounua hae zah minmin kha a dou hae; tukeiccuze Israel hae nynh Ai hae kha voilang ranglang te varyng a koihlu hae keiccuze a hiinhypaw te a ccuepaw lu kheit san a um lei lan a chia hae.
23 Thuasalama Ai siapharan tuh a hiin pite Joshua kalan a cciakhae hae.
24 Israel hae nynh Ai khuaccaaw hae kha a deehuinaw hae ramkaw khe marya theih hae zah, mih balyn mawte thaloi te a chih kou hae te, Israel hae balyn nynh Ai khua lang kinua hae zah, khua kya um hae paw kha thaloi te marya a bae hae.
25 Tuin nin kya a chihpaw nopi pise, Ai khuaccaaw hae mih balynte thong haw lae ning acih hae.
26 Pawccecize Joshua nynh Ai khuaccaaw hae balyn kha khaleih a ro mawlaezung hae, thaloi a eenawpaw a kuih kha khin khyh.
27 Bawipaw nynh Joshua kha kaw a pya thyhte, tuin khua kya-e sahiin-awvaw hae te luadepaw uccaw hae kyalya kha Israel hae nynh mimaw uccaw lang a lawku hae.
28 Te Joshua nynh Ai khua kha maee te soi zah, atunin cia zungzae arohpaw apumkuhpaw lang a rae.
29 Te Ai siapharan kha zete cia thingku kya a sae; khuanin ccah te, Joshua nynh kawpya hae zah a rhua kha thingku vaw kyate sahbung hae zah, khua koikua teenaw kin khe a vua hae, lungpum pi lang pumthin hae zah tuh-e tuh atunin cia a um.
Joshua nynh Byakin A Thawsah
30 Tetuh Joshua nynh Ebal Mua vawlan khe Bawipaw , Israel Pachia, elang silawhang ccangkheit a rae,Ref 8.30-32: Deu 27.2-8
31 Bawipaw ryalahtu Moses nynh Israel hae kha kawpya hae zah, Moses kawbya ccauh kyaze, “a awkuh leipaw, sivawhaelua mah mangnua leipaw lung te raepaw silawhang,” cite azeiku thyhte a rae hae; tuh-e vawlan khe maee-ute silawnaw kha Bawipaw kalan rae hae zah, ccawkunaw silawnaw kha a rae hae.Ref 8.31: Exo 20.25
32 Te tuin kya, Israel hae malang khe Moses nynh a zeipaw kawbya kha Joshua nynh tuh-e lung hae vawlan khe a khawpi.
33 Ranpibawi hae nynh Israel hae kha hythua a pya cih hae, cite Bawipaw ryalahtu Moses nynh masaty lyaze kaw a pya hae thyhte, Israel hae balyn, ramccungccaw te ramccang ccungccaw hae tuh mih piccan hae, mih bawi hae te mih byapiatu hae ryte Bawipaw byakin thingkua puihtu Levi phin ranpibawi hae malang khe byakin thingkua te ahawiliakuh lante, ccungccaw angankuh tuh Gerizim Mua malang, tuhlaepaw angankuh tuh Ebal Mua malang khe a thadyn hae.Ref 8.33-35: Deu 11.29, 27.11-14
34 Tukoute kawbya ccauh kya azeiku thyhte, hythuanaw bya te thyalawnaw bya athuapaw kawbya kya-e bya hae balyn kha Joshua nynh a ria.
35 Nopi hae, imua hae te mih kya umbua hae paw ramccang hae te Israel zapi hae balyn malang khe Moses nynh kaw a pyapaw bya balyn kya-e byaccan ccangkheit sanmah Joshua nynh a ria leipaw um khyh.