4
Gilgal kya Lungbing Haw Lae Ning
1 Minphuin pynpi te Jordan vaw kha a zua kou hae te, Bawipaw nynh Joshua kha:
2 “Ccungccaw hae kya-e pise lu haw lae ning, phin kheit ze lu kheit cci po hae lah,
3 ‘E kyahin, Jordan vaw angaelung, ranpibawi hae a thadynnaw hae hmin kya-e lung ccanghaw lae ning kha lah oh lah, puih oh, atu khuazi na ryanaw oh hmin kyakhe nung oh,’ cite kawpya hae,” a cipya.
4 Te Joshua nynh Israel hae kya-e pise lu haw lae ning, phin kheit ze lu kheit cci a po hae paw tuh ko hae zah,
5 “Bawipaw nae Pachia kya-e byakin thingkua malang, Jordan vaw angaelung langkhe cceih oh lah, Israel phin hae phin kheit cci hanlan, lu kheit nynh lung ccangkheit cci kha nae raw te puih oh,
6 tuhteze nynh hynh-e hynh nanning hanlan syntawnaw athua cih. Nyalang ze nae ccaaw hae nynh, ‘E lung hae hynh nae hanlan paw suilan mou athua?’ cite ae khia oh ze,
7 nanning nynh, Bawipaw byakin thingkua malang Jordan tui tuh thoh paekuh, cite na hopah cih oh. Jordan vaw kha he a zua hae tuh Jordan tui tuh thoh pae. Tukeiccuze e lung hae tuh Israel hae hanlan zungzae liathuinaw lang a tang cih,” a cipya hae.
8 Te Joshua nynh kaw a pya hae hawte Israel hae nynh a cyi hae. Bawipaw nynh Joshua a hopya thyhte Israel phin hae zeih khate, Jordan vaw lungkhu e lung ccanghaw lae ning tuh lah hae zah, a ryanaw hae hmin lang puih hae zah a nung hae.
9 (Byakin thingkua a puihtu ranpibawi hae thadynnaw, Jordan vaw angaelung khe Joshua nynh lung ccanghaw lae ning kha bing zah tuh-e lung hae tuh atunin cia a um hae.)
10 Moses nynh Joshua kaw a pya thyhte, ccungccaw hae kha hopya lan Bawipaw nynh Joshua kaw a pyapaw atyn-are athang mawlaezung, byakin thingkua a puihtu ranpibawi hae tuh Jordan vaw angaelung kya a thadyn hae. Ccungccaw hae tuh rangsakute vaw a zua hae.
11 Ccungccaw hae balyn a zua kou hae te, Bawipaw byakin thingkua te ranpibawi hae tuh ccungccaw hae malang khe a cceih hae.
12 Reuben phin hae, Gad phin hae te Manasseh phin hae angankuh kha Moses nynh a hopya hae hawte Israel hae malang khe zunghe ccyngkute a cceih hae.
13 Ccungccaw thong sung pali loukaw tuh rhawtuk nawlan zunghe ccyngkute Jeriko bialae langkhe rhawtuk lan Bawipaw malang a cceih hae.
14 Tuin nin khe Bawipaw nynh Joshua kha Israel hae balyn malang khe a hangthung; minmin nynh Moses kha saw a tua hae hawte, Joshua kha a she lungkhu balyn saw a tua hae.
15 Te Bawipaw nynh Joshua kha,
16 “Byakin thingkua a puihtu ranpibawi hae kha Jordan vaw kyate pou lan kawpya hae,” a cipya.
17 Tukeiccuze Joshua nynh ranpibawi hae kha, “Jordan vaw kyate oun pou oh,” cite kaw a pya hae.
18 Bawipaw byakin thingkua a puihtu ranpibawi hae tuh Jordan vaw angaelung kyate pou hae zah, ranpibawi hae ccuphe nynh laerou kha he a sy te, Jordan vaw tuh a luamae hawte luathui zah, Jordan vaw tuh atakaw lya hawte varang lang balyn aleikuh vae.
19 Ccungccaw hae tuh masaty sawpaw, nin haw nin khe Jordan vaw kyate pou hae zah, Jeriko nithua lang ramri, Gilgal kya a rya hae.
20 Jordan vawkhu e a law hae paw lung ccanghaw lae ning kha Joshua nynh Gilgal kya bing zah,
21 Israel hae kha, “Nyalang ccyh kya nae ccaaw hae nynh mih paaw hae kha, ‘E lung hae hynh paw suilan mou athua?’ cite a khia hae ze,
22 nae ccaaw hae kha, ‘Israel hae nynh Jordan vaw hynh laerou kyate a la zua hae,’ cite na nysah cih oh.
23 Bawipaw nae Pachia nynh khuraw lang ah zua kou makhia oh, Rili Se kha oun rousahpya hawte Bawipaw nae Pachia nynh Jordan vaw kha na zua kou makhia oh, nae hanlan a rousah,
24 laephi vaw e ccungccaw hae balyn nynh Bawipaw kuih tuh athung cipaw a ny nawlan hae te Bawipaw nae Pachia kha zungzae na ri nawlan oh nynh thua,” a cipya hae.