7
Jeremiah nynh Pachia Byapianaw kha A Ho
1 Bawipaw kyate Jeremiah kya yn thuapaw bya tuh:
2 Bawipaw inn koikua kyakhe thadyn lah, e bya hynh hopah hae, Bawipaw beik khylan e thuakaw hae kya oun tee hae paw nanning Judah ccungccaw hae balyn, Bawipaw bya hynh ngaetua oh.
3 Vaaw Bawipaw , Israel Pachia nynh hynhte a ho: Nae hiinzia te nae cyisahnaw kha raekuh thui oh lah, e hmin kya kae umsah cih oh.
4 “E hmin hynh Bawipaw beikinn nynh thua, Bawipaw beikinn nynh thua, Bawipaw beikinn nynh thua,” cite hynpaw bya kha doliakuh nan oh.
5 Nae hiinzia te nae cyisahnaw kha thanccingte na raeku thui oh ze thuasah, lu kheit te lu kheit hmerarih lante na ccuepeku oh ze thuasah,
6 ramccang hae, ngawraw hae te nomae hae tungvaw tuaasahnaw rae leite na um oh zah, seinaw a hoi leipaw chiise kha e hmin kya na luasah khyh oh ze thuasah, naemaw toulou vaemaw muesaku khylan ccangpaw pachia hae kha na zui khyh oh ze thuasah,
7 langmawlya te zungzae hanlan nae minpaaw hae ka pya hae paw ram, e hmin kyahin nanning ryte ka um cih.
8 Athane leipaw hynbya kha na doliaku oh.
9 Nanning nynh rute, ccungccaw chiate, nopi pise seinaw raete, ahme lei lante byakinkute, Baal kalan silawnaw raete, na ny lei oh paw ccangpaw pachia hae kalan zuikute,
10 nae cceih oh zah ka min te kopaw e inn kya, ka malang khe na thadyn oh, te e anungsikuhpaw balyn hynh ah rae keiccu oh nynh, “Aening tuh ah khyn oh!” cite na ho cih oh tou?
11 Ka min te kopaw e inn hynh miruh hae karung lang tou na ria oh? E hae balyn hynh phe ka muih, cite Bawipaw nynh a ci.Ref 7.11: Mat 21.13; Mar 11.17; Luk 19.46
12 Ka min kha masaty ka la umsahnaw, Shiloh khua umpaw ka umnaw hmin langkhe atu cceih oh lah, ka ccungccaw Israel hae mih hoyleinaw keiccuze, tuh-e hmin kha pawtemou ka la cyi cipaw la do oh.Ref 7.12-14: Jos 18.1; Sam 78.60; Jer 26.6
13 Atu Bawipaw nynh a hopaw tuh: Nanning nynh e uccaw hae balyn hynh na cyi oh keiccuze thuasah, atu te atu kae hopah oh zahmah na ngae khyh oh keiccuze thuasah, kae ko vae oh ze nae oi khyh oh keiccuze thuasah
14 ka min liate kopaw, na doliakuh oh paw e inn, nanning te nae minpaaw hae kae pya oh paw hmin kha Shiloh kya ka cyi hawte ka cyih cih.
15 Nae puizia athuapaw Efraim ciihan balyn kha ka vua hae hawte, nanning kha ka muih leinaw langkhe kae vua cih oh.
Judah hae nynh Kaw-einaw
16 Jeremiah, e ccungccaw hae hanlan sawsang nan, minmin ccelang sia nan lah, sawsang nan, kae hynh mah yn soihbia nan, pawccecize na bya kha kae thaepah lan khyh.
17 Minmin nynh Judah khua hae kya te Jerusalem laanpi hae kya a cyi hae paw kha na muih khyh tou?
18 Imua hae nynh maeething a suelua hae, paaw hae nynh maee a tua hae, nung hae nynh chanvuih khui kha non hae zah vaawlui siapharannung elang sanlou a raepya hae; ccangpaw pachia hae kalan niapaw silawnaw kha rae hae zah ka thin yn riasah hae.Ref 7.18: Jer 44.7-19
19 Minmin nynh a thinriasah hae paw tuh kae ka thua tou? Mimaw toulou kha vaemaw muesakuh khyh hae tou? cite Bawipaw nynh a ci.
20 Tukeiccuze Bawipaw PACHIA nynh hynhte a ho: E hmin kya um hae paw ccungccaw te sarangpaw kya thuasah, loo lungkhu e thingku hae te laephi kya-e thingthae-eccang kya thuasah ka thinrianaw te ka bungpawnaw tuh accah cih; tuh-e thinrianaw maee tuh arua cih zah chih vae lan khyh.
21 Vaaw Bawipaw , Israel Pachia nynh hynhte a ho: Nae kya-e maee-ute silawnawpaw kha si na lawnaw oh paw kyakhe nungchih oh lah, asaw kha phe ae lalae oh.
22 Pawccecize nae minpaaw hae kha Izip ram kyate ka poukhae lya hae ze, maee-ute silawnaw kong te silawnaw kong kha ka hopah khyh hae zah kawbya mah ka pya khyh hae.
23 Thuasalama minmin kha, “Ka bya ngae oh lah, nae Pachia ka thua cih zah, nanning tuh ka ccungccaw hae na thua cih oh; nae laan nae sui a ua nawlan, kaw kae pya oh paw rou kha zui oh,” cite kawbya ka pya hae.
24 Tuhzemah minmin nynh kawngae khyh hae, mih nakaring mah tuakuh khyh hae, ahoy leipaw mih rynaw te mih lungkhungnaw khate mih tuakunaw kyakhe cceih hae zah, malang laeze nulang kha a dohua paleih hae.
25 Nae minpaaw hae nynh Izip ram kyate oun pou nin hae te atunin cia, ka ryalahtu profeh hae kha nin kheit koute nin kheit minmin kalan atu te atu ka saw hae;
26 tuhzemah minmin nynh ka bya kha ngae leite pawlangria khyh hae, mih nging tokarae lan a um hae. Mih minpaaw hae nynh a cyi hae paw laeze houh athahhua lante a cyi hae.
27 E bya balyn hynh na hopya hae zemah ae ngaepah lan khyh hae. Na ko hae zemah ae oi lan khyh hae.
28 Nang nynh na hopya lan hae paw tuh: E minphuin tuh Bawipaw mih Pachia bya a ngae lei hae paw te thuiheinaw a lawkuh lei hae paw nynh thua; byaccing tuh aroh vae; mih mung kyate byaccing kha a vua vae hae.
29 Na sang kha ngo lah,
ccaring vuatua;
mua otung vawlan khe
rawkhuite umtua,
pawccecize amaw
thin a riasahpaw she kha
Bawipaw nynh a vua.
30 Bawipaw nynh a hopaw tuh: Judah hae nynh ka malang khe hoyleinaw kha a rae vae hae; ka min te kopaw inn kyakhe mih kya-e anungsikuhpaw kha nung hae zah a thusah hae.
31 Mih ccanung hae te mih ccapaw hae kha maee te u nawlan cite, Hinnom ccapaw kya-e accya khe Tofet cikuhpaw beiknawpaw hminthyaa kha a rae hae, tuh-e tuh kaw ka pya hae paw thua khyh, ka lungkhu yn thungkuhpaw mah thua khyh.Ref 7.31: Lev 18.21; 2Si 23.10; Jer 32.35
32 Tukeiccuze, dotua, tuh-e accya tuh Tofet cite ko thua vae lan khyh, Hinnom ccapaw kya-e accya cite mah ko thua vae lan khyh, Chianaw accya cite ko athua ccyh yn thua vae cih, cite Bawipaw nynh a ci; pawccecize michi uunaw hmin a um lei lan ciate Tofet kyakhe michi a uh cih hae.
33 E ccungccaw hae rhua tuh vaawlang e pavaw hae te laephi kya-e sarangpaw hae hanlan looh athua cih; lu kheit nynh sanmah khah-e hae kha dee lan khyh hae.
34 Judah khuapi hae kya te Jerusalem e laanpi hae kyakhe lungtua lungpawnaw roi, zudy ccangvaepaw te akaenung liaccanung roi kha ka daesah cih; pawccecize ram tuh ccungccaw adaenaw ram lang a tang vae cih, a ci.Ref 7.34: Jer 16.9, 25.10; Bya 18.23