49
Ammon hae kha Byapianaw
Ammon hae konglang
 
Bawipaw nynh hynhte a ho:
Israel nynh ccapaw hae saahkuh khyh tou?
Rhoccoutu hoi khyh tou?
Athua lanze, pawccemou
Milkom pachia nynh
Gad ram kha lah zah,
amaw a ccungccaw hae nynh
Gad ram e khua hae kyakhe a um hae?Ref 49.1-6: Eze 21.28-32, 25.1-7; Amo 1.13-15; Zef 2.8-11
Tukeiccuze Bawipaw nynh a hopaw tuh:
Ammon hae khua Rabbah khe
rhawtuknaw roi ka ccaesah ccyh tuh
solei yn thua cih;
Rabbah tuh arohpaw
apumkuhpaw lang a tang cih zah,
a khua taraw hae tuh
maee te soi athua cih hae.
Israel kya-e a luade hae paw ram kha
Israel nynh bua a lua cih hae zah
a lah cih, cite Bawipaw nynh a ci.
 
Pou Heshbon, rawkhuite umtua,
pawccecize Ai khua tuh aroh vae!
Pou Rabbah ccanung hae, rah oh!
Buriboei zingkuh oh,
ngaethyate um oh lah,
buanawpaw ccungngue khate
naemaw toulou kha
vaemaw muesaku tua oh!
Pawccecize Milkom pachia tuh
a ranpibawi hae te a ryalahtu hae ryte
a kyng cih hae zah
ramccang lang a cciakhae cih hae.
Pou a lungzi leipaw ccanung,
pawccemou na thawzung liate na pooku?
Na thawzung tuh athang cciamang vae.
Na sisua kha na doliakuh zah,
“Hum nynh mou rhaw yn tuk cih?” na ci.
Vaaw Bawipaw nynh a hopaw tuh:
nae pepan um hae paw balyn kyate
rinaw kha kae thuakhaepah cih oh,
nanning lu kheit cci tuh
rangkhirangkhaete na ccue cih oh zah,
phiariphiarae ae nung cih oh,
rhaw kyate a khyn hae paw kha
sueluatu lu kheit san um lan khyh.
Thuasalama, tukoute tuh
Ammon hae kha ka kikhae cih hae,
cite Bawipaw nynh a ci.
 
Edom kha Byapianaw
Edom ram konglangte
 
Vaaw Bawipaw nynh hynhte a ho:
Teman ram kya hawnaw um vae khyh tou?
Tuanaw hoi hae paw nynh
tuanaw pya vae khyh hae tou?
Mih hawnaw tuh azo vae tou?Ref 49.7-22: Isa 34.5-17, 63.1-6; Eze 25.12-14, 35.1-15; Amo 1.11-12; Oba 1-14; Mal 1.2-5
Pou Dedan khuaccaaw hae,
nulang maeleihkute ccue oh lah,
rekuh oh!
Esau nynh a tungpaw shethya,
detahnaw ccyh kha mih tungvaw
ka thuasah cih.
Misu thae lotu hae nynh
nae kalan oun thua hae ze,
ccamua kha cciataw khyh hae tou?
Miruh hae nynh khuazi oun thua hae ze,
a ry hae paw kyalya kha
lawkuh khyh hae tou?
10 Thuasalama Esau a uccaw kha
ka khah zah a sasete ka nung,
rekunaw hmin a hoi lei lan ciate,
a rekunaw hmin kha pong ka langsah.
A ciihan hae, a uno hae te
a innpaw hae kha ro athua hae;
amaw mah um vae khyh.
11 Na ngawraw hae kha cciataw hae,
kamaw nynh ka do-oih cih hae;
na nomae hae nynh kae kha
yn doliakuh hae sah.
12 Bawipaw nynh hynhte a ho: Banang kha nia lan accan lei hae paw nynh a nia hae ze, nang tuh detahnaw kha na lue cih zawtou? Detahnaw kha na lue lan khyh; tuh-e banang tuh na neih hahe cih. 13 Bozrah khua tuh ri lan umpaw, saryapaw te ccungccaw adaepaw khua lang a tang cih zah, thyalaw nawlan a mang cih hae; te a pepan e khua hae balyn tuh ccungccaw adae zungzae cih, cite kamaw ccaccei nynh bya ka kinku, cite Bawipaw nynh a ci.
14 Bawipaw kyate the ka thae:
“Nanning nynh pynkheihlan
sueluakuh oh lah,
Edom kha tuk oh, rhawtuk khylan,
thokuh oh!” cite
minphuin hae kalan khe
locceihtu kha saw athua vae, a ci.
15 Nang hynh minphuin hae lakuze
adih huapaw lang te
ccungccaw hae nynh
a theihrya hae paw lang kae rae cih.
16 Ri lan na umnaw te
na lysakunaw thinlung nynh
nang kha ae ling vae,
nang tuh lungpi akoinaw kya
a umpaw te mua ahangnaw kha
a reihpekuhpaw nynh na thua.
Mosipi hawte ahangnaw khe
bu na luaku zemah,
tuin kyate nang kha kae sahbung cih,
17 Edom ram tuh ri lan umpaw lang a tang cih; a pe a cceihpaw miakaw tuh mih ngaeangthua cih zah, aning nynh a tungpaw shethya keiccuze saryanaw roi a sawnua cih hae. 18 Sodom, Gomorrah te mih pepan e khua hae hawte aroh cih zah, tuin kya khuasahpaw te a umpaw lu kheit san um lan khyh.Ref 49.18: Gen 19.24-25 19 Jordan vaw kin thing alungnaw kyate sarangpaw hae rampaeekunaw hae kalan yn cceihthungpaw chindeih hawte, Edom kha ccaring ka dee cih zah, ka popaw kha Edom kya ka nung cih. Pawccecize kae yn lopaw hummou a um? Kae yn ngankuhpaw hummou a um? Ka malang a thadyn nganpaw tuurintu a um tou? 20 Tukeiccuze Bawipaw nynh Edom tungvaw a paccyn nuapaw te Teman ram um hae paw hanlan a eenaw kha thaetua oh: Tuuphu kya-e a nohua hae paw kha ccaring a cciakhae ccaccing cih hae; mih tuukhia kya-e tuu hae tuh mih tungvaw acyihkuhpaw keiccuze a siikuh ccaccing cih hae. 21 Minmin a khuliaku hae paw roi keiccuze laephi tuh a hy cih; a sia hae paw roi tuh Rili Se kyate heize thae athua cih. 22 Rhaw tuh cceihthung zah, mosi hawte Bozrah khua kha uingnuakuh zah a sake a dawnua; tuin nin kya Edom rhawkaw hae thinlung tuh neitangia accihpaw nopi hawte athua cih.
 
Damaskas kha Byapianaw
23 Damaskas khua konglangte,
 
Hamath te Arpad nynh
thethyapaw a thae hae keiccuze
phe siikuh hae;
rih hae zah mih lungvawsaw,
adae kho leipaw rili hawte
mih thinphang.Ref 49.23-27: Isa 17.1-3; Amo 1.3-5; Zek 9.1
24 Damaskas tuh a thawzya vae,
ccue khylan a maeleihkuh vae,
a bungzou zah neitangia accihpaw
nopi hawte lungriathaenaw te
teingnaw nynh a thuanua vae.
25 A minthaanpaw khuapi,
lungtuanaw khua tuh
vua athua vae ccarei!
26 Tukeiccuze khuapi lungkhu e
ccangvae hae tuh khualae e
laanpi hae kya a khuliakuh cih hae,
tuin nin khe a rhawkaw hae balyn tuh
ro athua cih hae,
27 Damaskas khualungrua kha
maee te ka soi cih zah,
Benhadad siapharan inn hae kha
maee nynh a u cih.
 
Kedar te Hazor kha Byapianaw
28 Babilon Siapharan Nebukhadnezzar nynh a taepaw Kedar ram te Hazor peenaw hae konglang kha
 
Bawipaw nynh hynhte a ho:
Thokuh oh lah,
Kedar ram kha ccianua oh!
Nithua lang e ccungccaw hae kha roh oh!
29 Mih bu hae te
mih tuuphu hae kha thuasah,
zokhawpaw mih boei hae te
mih uccaw hae balyn kha thuasah
luade oh;
mih kalauh hae kha mah
suekuh oh, “Pawpaw kya balyn
ri lanpaw a um,” cite siapah oh.
30 Pou Hazor ram um hae paw,
ccue oh, asawnaw lang cceih oh lah,
akhunaw hmin kya rekuh oh!
Pawccecize Babilon Siapharan
Nebukhadnezzar nynh
nanning kha rawsete
khuakhan zah, ae paccynnuaku vae oh.
 
31 Thokuh oh, koikua te
sakoihccaw hoi leite,
ngaengante khyndadyh lan
a makhaete a umpaw
minphuin kha ccianua oh,
32 Mih kalauh hae te
mih sahiin phu hae tuh
luadepaw lang a tang cih hae.
Mih nakalia a ngokuh hae paw kha
teitei lang balyn phiariphiarae
pong ka nung cih hae zah,
hmin takyh kyate shethya kha mih tungvaw
ka thuasah cih,
33 Hazor ram tuh suizaw karung,
ccungccaw zungzae adaenaw lang
ka tangsah cih zah,
tuin kya humhung mah um lan khyh,
lu kheit nynh sanmah tuin kya
khuasah lan khyh.
 
Elam kha Byapianaw
34 Zedekiah nynh Judah siapharan lang a tang takaw lyakhe, Elam ram konglangte Bawipaw bya tuh profeh Jeremiah kya yn thua zah,
35 Vaaw Bawipaw nynh hynhte a ho: Elam thawzung kyaze abyapi huapaw a li kha ka khyapah cih; 36 Hmin takyh kyate khisan phuin pali kha Elam lang ka zawsah cih; e khisan hae balyn khate minmin kha phiariphiarae a um lan hae ka mungsah cih hae, kyngte ramccang lang a cciakhae hae paw Elam hae nynh a thuanua lei hae paw ram um lan khyh. 37 Elam hae kha mih rhaw hae malang te mih hiinnaw a ccung hae paw malang khe ka risah cih hae; myarya lepaw ka thinrianaw shethya kha mih tungvaw ka thuasah cih, cite Bawipaw nynh a ci. Minmin kha ka maemih makhia hae, mih nulangte thaloi ka sawnua cih hae; 38 Ka bawitungkhung kha Elam ram kya ka nung cih zah, mih siapharan te mih bawi hae kha ka roh cih hae, cite Bawipaw nynh a ci.
39 Thuasalama Elam kha nyalang ccyh kya ka kikhae thui cih, cite Bawipaw nynh a ci.