47
Filistin hae kha Byapianaw
Faro nynh Gaza a tuk mawze, Filistin hae konglangte profeh Jeremiah kya yn thuapaw Bawipaw bya tuh hynhte nynh thua:Ref 47.1-7: Isa 14.29-31; Eze 25.15-17; Joe 3.4-8; Amo 1.6-8; Zef 2.4-7; Zek 9.5-7
Bawipaw nynh hynhte a ho:
Dotua, palung langte tui yn le cih zah,
paepae leikuhpaw tui alepaw lang
yn tang cih;
tui alepaw nynh ram pynpi te ram lungkhu
umpaw balyn kha thuasah,
khuapi te tuin kya
um hae paw kha thuasah
pong avu cih hae.
Ccungccaw hae tuh a sia a rua cih hae zah,
ram lungkhu um hae paw balyn tuh
rawkhuite a um cih hae.
Mih marang hae ccukoh roi,
mih marangle hae amiakuhpaw roi,
marangle accu hae amiakuhpaw roi keiccuze
nungpaaw hae kuih tuh
a thawzya keiccuze,
ccaaw hae kha kinua vae khyh hae,
pawccecize Filistin hae balyn kha
ronaw ccyh te
Tair te Sidon khua kyate a laehypaw
bawmtu miakaw kha
ronaw ccyh tuh yn thua cih.
Pawccecize Bawipaw nynh
Filistin hae te
a laehypaw Kaftor tuikoih kya-e hae kha
a roh cih hae.
Gaza tuh a lu phe o lan
a sang ngo athua vae,
Ashkelon hae tuh zya adae vae hae.
Pou a laehypaw Filistin hae!
Hohseciamou naemaw toulou kha
vaemaw na muesakuh ung cih oh?
Pou Bawipaw thaloi!
Hohseciamou dae leite na um ung cih?
Na thaloibu lungkhu lang sangkuh lah,
daetedae lan umtua!
Ashkelon khua te
rili kin um hae paw kha rawsete
Bawipaw nynh kaw a pya
vae keiccuze pawtemou
daebabi lan a um kho cih?
Tuh-e tuh cyi khylan
Bawipaw nynh rya phe a naw vae.