38
Jeremiah Tuisung lungkhu A Um
1 Jeremiah nynh ccungccaw zapi balyn kalan byahopaw kha Mattan ccapaw Shefatiah, Pashhur ccapaw Gedaliah, Shelemiah ccapaw Jukal te Malkhiah ccapaw Pashhur hae nynh a thae hae; tuh-e a bya tuh,
2 Bawipaw nynh hynhte a ho: E khuapi kya a umpaw balyn tuh thaloi rhaw, ccakanccinaw te shethya khate a chih cih hae; thuasalama Khaldi hae kalan a cceih hae paw tuh a hiin cih hae; mih hiinnaw tuh rhawtuknaw e muepaw lasung hawte a hoi cih hae zah a hiin cih hae.
3 Bawipaw nynh hynhte a ho: E khuapi hynh Babilon siapharan a rhawkaw hae kuih kalan ap athua ccaccing cih zah, a lah cih hae, a ci.
4 Tetuh bawi hae nynh siapharan kyakhe, “E ccungccapaw hynh chia lan accan, pawccecize aning nynh hynhcihawpaw bya a hopya hae keiccuze e khuapi kya a laehypaw rhawkaw hae te ccungccaw balyn kha mih rawthyasah hae. E ccungccapaw nynh e ccungccaw hae hoynaw kha ccung leite vawsawnaw kha a ccungpya hae,” cite a hopya hae.
5 Zedekiah siapharan nynh, “Aning tuh hein kya mang um, aning tuh nae kuih kya nynh a um; pawccecize siapharan tuh nanning rynaw kha khee khyh,” a cipya hae.
6 Tukeiccuze minmin nynh Jeremiah kha cciakhae hae zah, thong rhawviatu hae voidu lungkhu umpaw, siapharan ccapaw Malkhiah a tuisung lungkhu langkhe arui te a sawbung hae. Tuisung lungkhu tui um leite tuiccua rou nynh a um, Jeremiah tuh tuh-e tuiccua lungkhu a phungkuh.
Ebed-melek nynh Jeremiah A Luesah
7 Jeremiah tuh tuisung lungkhu nynh a nung hae cipaw kha siapharan inn kya ryalahpaw, Ethiopia minphuinpaw Ebed-melek nynh a thae. Siapharan tuh Benjamin Koikua kya a haung lyakhe,
8 Ebed-melek tuh siapharan inn kyate toikuh zah, siapharan kalan khe,
9 “Ka bawipaw siapharan, e ccungccaw hae nynh profeh Jeremiah tungvaw hoyleinaw balyn kha rae hae zah, vuelawte chih sah cite tuisung lungkhu lang a sawbung hae, pawccecize khuapi kya sanlou um vae khyh,” a cipya.
10 Tetuh siapharan nynh Ethiopia minphuinpaw Ebed-melek kha, “E kyate ccungccaw lu thum kokuh hae lah, profeh Jeremiah kha a chi mawkhe tuisung kyate suethung oh,” cite kaw a pya.
11 Tukeiccuze Ebed-melek nynh ccungccaw lu thum kokuh hae zah siapharan inn lang a cceih hae, te boeining nungnaw khaan e arynpaw boei aseiikuhpaw kha lah zah, tuisung lungkhu umpaw Jeremiah kalan khe arui ryte a sawbung pya.
12 Oute Ethiopia minphuinpaw Ebed-melek nynh Jeremiah kha, “Na rakaw te arui laku khe boeipue aseiikuhpaw kha dekuh,” a cipya. Jeremiah nynh tuhcite a cyi.
13 Tetuh minmin nynh Jeremiah kha arui te suethung hae zah, tuisung lungkhu te poh a thuaa hae. Jeremiah tuh rhawviatu hae voidu lungkhu khe a um.
Zedekiah nynh Jeremiah Tuanaw A Ngia
14 Zedekiah siapharan nynh Jeremiah kha kosah hae zah, Bawipaw beikinn teenaw thuakaw ccangthumnaw kyakhe a tungku. Siapharan nynh Jeremiah kha, “Bya kae khia cih; papin yn phei nan,” a cipya.
15 Jeremiah nynh Zedekiah kha, “Kae hopya ze, chia leite nae nung cih tou? Tuanaw kae pya ze, ka bya nae ngaepah cih tou?” a cipya.
16 Tukeiccuze Zedekiah Siapharan nynh Jeremiah kha aruh lante byakinpakuh zah, “Hiinnaw oun pyapaw Bawipaw tuh a hiin thyhte, nang kha kae theih lan khyh, chia ae ry hae paw kuih kalan mah kae ap lan khyh,” a cipya.
17 Tetuh Jeremiah nynh Zedekiah kha, “Israel Pachia, vaaw Pachia, Bawipaw nynh hynhte a ho: Babilon siapharan kuihkaw e bawi hae kalan na apku ze rou nynh na hiinnaw kha haang athua cih zah, e khuapi hynh maee te soi lan khyh hae, namaw te na innbyn hae tuh na hiin cih oh.
18 Thuasalama Babilon siapharan kuihkaw e bawi hae kalan na apku khyh zetuh, e khuapi hynh Khaldi hae kalan pya athua cih zah, minmin nynh maee te a soi cih hae, namaw mah mih kuih kyate na lue lan khyh,” a cipya.
19 Zedekiah siapharan nynh Jeremiah kha, “Khaldi hae kalan a ccue hae paw Judah hae raw ka rih, pawccecize mih kuih kalan yn apsei cih hae zah, minmin nynh yn theihrya cih hae,” a cipya.
20 Jeremiah nynh, “Tuhte cyihkuh lan khyh. Kae hopyapaw Bawipaw bya hynh zui lah, namaw hanlan ahoy cih, na hiinnaw kha haang athua cih.
21 Thuasalama apku lei lante bya na paeku zetuh, Bawipaw nynh hynhte vizin yn muihsah—
22 Judah siapharan inn kya a laehypaw nopi balyn kha Babilon siapharan kuihkaw e bawi hae kalan cciakhae athua cih hae zah, tuh-e nopi hae nynh,
‘Na doliakupaw na ban hae nynh
ae soih hae zah,
nang kha ae tae vae hae.
Na ccu tuh tuiccua kya bingkuh zah,
nang kha ae cciataw vae hae,’ cite a ho cih hae.
23 Na zu na ccaaw hae balyn kha Khaldi hae kalan a cciakhae cih hae zah, nang mah mih kuih kyate na lue lan khyh, Babilon siapharan nynh nang kha ae kyng cih; e khuapi hynh maee te a soi cih hae,” a cipya.
24 Tetuh Zedekiah nynh Jeremiah kha, “E bya hynh humhung mah nysah nan, tuhkhyhze tuh na chih cih.
25 Nang te bya ah hokupaw hynh bawi hae nynh thae hae zah, minmin nynh nang kha, ‘Siapharan na hopyapaw bya kha kaening oun hopya tua; oun phei nan, tuhkhyhze tuh kae theih cih. Siapharan nynh pawmou ae hopya?’ cite ae khia hae ze,
26 nang nynh minmin kha, ‘Chi khylan Jonathan inn lang bua yn saw khyh nawlan siapharan kha ka ngiaku,’ cite na hopah cih hae,” a cipya.
27 Bawi hae balyn tuh Jeremiah kya oun thua hae zah bya a khia hae; te siapharan nynh kaw a pya thathyhte Jeremiah nynh a hopya hae. Tukeiccuze aning kha byakhia vae khyh hae, pawccecize bya a hoku hae paw kha humhung nynh mah nyh khyh.
28 Te Jerusalem kha law athua mawlaezung, Jeremiah tuh thong rhawviatu hae voidu lungkhu po a um.Ref 38.28: Eze 33.21