36
Beikinn kya Riapaw Ccakue
Josiah ccapaw Jehoiakim nynh Judah siapharan lang a tangnaw kum palinaw kum kya, Jeremiah kya yn thuapaw Bawipaw bya tuh:Ref 36.1: 2Si 24.1; 2Sh 36.5-7; Dan 1.1-2 Ccakue kha lawkuh lah, Josiah she lya, nang kae hopya nin kyate atunin cia Israel, Judah te minphuin balyn kong kae hopyapaw bya balyn kha zeitua. Mih tungvaw thuasah lan ka paccynpaw ronaw balyn kha Judah hae nynh he a thae hae te, ahoy leipaw mih cyisahnaw kyate poh a paleihkuh kho hae, tuhteze tuh mih hoyleinaw te mih seinaw kha poh ka ngaethya kho hae, a cipya.
Tetuh Jeremiah nynh Neriah ccapaw Baruk kha ko zah, Bawipaw nynh Jeremiah a hopyapaw bya balyn kha, Jeremiah nynh a opya thyhte Baruk nynh ccakue kya a zei. Te Jeremiah nynh Baruk kha, “Kae tuh Bawipaw beikinn lungkhu lang tee lan khee ka thua; tukeiccuze nang nynh cceih lah, kae opah zah ccakue kya na zeipaw Bawipaw bya kha Bawipaw beikinn e ccungccaw hae nynh a thaenaw hae khe looh-aesung nin kya riapah hae. Mih khua te oun thuapaw Judah hae balyn nynh a thaenaw hae khe mah na riapah cih hae. Minmin balyn nynh ahoy leipaw mih ozia kyate paleihkute, Bawipaw malang ngiakute saw poh a sang kho hae, pawccecize Bawipaw nynh e ccungccaw hae a honua hae paw thinrianaw te bungpawnaw tuh myarya ale,” a cipya. Te profeh Jeremiah nynh kaw a pyapaw balyn kha Neriah ccapaw Baruk nynh cyih zah, ccakue kya-e Bawipaw bya kha Bawipaw beikinn khe a ria.
Josiah ccapaw Jehoiakim nynh Judah siapharan lang a tangnaw kum pangawnaw, sawpaw sah takuanaw khe Jerusalem e ccungccaw balyn te Judah ram e khua hae kyate Jerusalem lang oun cceih hae paw balyn nynh Bawipaw malang khe looh-ae a sung hae. 10 Tetuh Bawipaw inn e Koikua Thawpaw teenaw, thahlang khaan kya umpaw ryaccinkhan Shapan ccapaw Gemariah khaan kya ccungccaw balyn a thaenaw hae khe, Baruk nynh ccakue kya-e Jeremiah bya kha a riapya hae.
Siapharan Inn kya Ccakue Rianaw
11 Shafan ccapaw Gemariah a ccapaw Mikaiah nynh ccakue kya-e Bawipaw bya balyn kha he a thae tuh, 12 siapharan inn lang cceihbung zah, ryaccinkhan khaan lungkhu lang a tee; tuin kyatuin Ryaccinkhan Elishama, Shemaiah ccapaw Delaiah, Akhbor ccapaw Elnathan, Safan ccapaw Gemariah, Hananiah ccapaw Zedekiah te ccangpaw bawi hae tuh a haung hae. 13 Baruk nynh ccungccaw hae a thaenaw hae kya ccakue a ria lyaze Mikaiah nynh a thaepaw bya balyn kha minmin kalan a hopya hae. 14 Tetuh bawi hae balyn nynh Kushi ccapaw Shelemiah ccapaw Nethaniah a ccapaw Jehudi kha Baruk kalan saw hae zah, “Ccungccaw hae thaenaw kya na riapaw ccakue kha yn ccyng lah, yn cceih,” cite a hosah pya hae. Tukeiccuze Neriah ccapaw Baruk nynh ccakue tuh a kuih kya ccyng zah mih kalan a cceih. 15 Te minmin nynh Baruk kha, “Haung lah, ccakue tuh kaening oun riapya tua,” a cipya hae. Tukeiccuze Baruk nynh ccakue tuh a riapya hae. 16 Tuh-e bya balyn tuh he a thae hae te, bungzoute lu kheit te lu kheit dokuh hae zah, Baruk kha, “E bya balyn hynh siapharan kalan kae thaesah ccaccing cih,” a cipya hae. 17 Te tuh-e bawi hae nynh Baruk kha, “Atu oun hopya tua, e bya balyn hynh pawtemou na zei? Jeremiah nynh ae opyapaw athua tou?” cite a khia hae. 18 Baruk nynh, “E bya balyn hynh Jeremiah nynh yn opah zah, kae nynh ccakue kyakhe ccatui te ka zei,” cite a khung hae. 19 Tetuh bawi hae nynh Baruk kha, “Nang te Jeremiah tuh cceih oh lah, rekuh oh, nae umnaw kha humhung mah nysakuh nan oh,” a cipya hae.
Jehoiakim nynh Ccakue kha Maee te A U
20 Te ccakue tuh ryaccinkhan Elishama khaan kya nungsyate, siapharan inn voidu lungkhu lang cceih hae zah, tuh-e bya balyn kha siapharan kya a hopya hae. 21 Tetuh siapharan nynh Jehudi kha tuh-e ccakue law lan naw zah, aning nynh ryaccinkhan Elishama khaan kya-e ccakue tuh a law; tuh-e ccaw tuh Jehudi nynh siapharan te a pe thadyn hae paw bawi hae kha a riapya hae. 22 Tuh lya tuh, sawpaw sah takuanaw, khuaccih saw thua zah, siapharan tuh khuaccih saw a umnaw inn lungkhu khe haung zah, a malang umpaw maee aruapaw maeepung kha a eku. 23 Jehudi nynh ccakue tuh ccamae ccangthum ccangpali he a ria te, siapharan nynh ccakue tuh ccezung te aw zah, maeepung lungkhu e maee lungkhu langkhe athang mawlaezung a phung. 24 Siapharan te tuh-e bya a thaepaw a ryalahtu miakaw tuh mih bungzou khyh, mih boeining mah seiikuh khyh hae. 25 Siapharan nynh ccakue tuh a seii khyh nawlan, Elnathan, Delaiah te Gemariah nynh a ngia hae zemah mih bya kha ngae khyh. 26 Te siapharan nynh ryaccinkhan Baruk te profeh Jeremiah kha kyng khylan siapharan ccapaw Jerahmeel, Azriel ccapaw Seraiah te Abdeel ccapaw Shelemiah kha kaw a pya hae. Thuasalama Bawipaw nynh minmin kha a thuruh hae.
Jeremiah nynh Ccangpaw Ccakue A Opya
27 Jeremiah nynh opah zah Baruk nynh a zeipaw ccakue kha siapharan nynh maee te a u koute, Jeremiah kya yn thuapaw Bawipaw bya tuh: 28 Ccangpaw ccakue kha lah lah, Judah Siapharan Jehoiakim nynh maee te a upaw masaty e ccakue kya a umpaw bya rynpaw balyn kha zeitua. 29 Te Judah Siapharan Jehoiakim konglangte hynhte na ho cih, Bawipaw nynh hynhte a ho: Babilon siapharan tuh yn thua ccaccing cih zah, e ram hynh a roh cih, ccungccaw te sarangpaw hae kha a theih cih hae, acikuhpaw bya hynh pawccemou e ccakue kya na zei? cite na ho zah, e ccakue hynh maee te na u ngan vae. 30 Tukeiccuze Judah Siapharan Jehoiakim konglangte Bawipaw nynh hynhte a ho: Aning nynh David a bawitungkhung kya a haung cih paw ciihan lu kheit sanmah hoi lan khyh, te a rhua kha khuadae ze khuaninso kya, khuazi ze dangtui kya a vua cih hae. 31 Amaw, a ciihan hae te a ryalahtu hae kha mih hoyleinaw keiccu de ka tah cih hae; mih tungvaw thuasah, Jerusalem khuaccaaw hae tungvaw thuasah, Judah hae tungvaw thuasah shethya balyn kha ka thuasah cih, tuh-e shethya te raeringnaw ka pya hae zahmah ngaelae khyh hae, a ci.
32 Tetuh Jeremiah nynh ccangpaw ccakue kha lah zah, Neriah ccapaw ryaccinkhan Baruk kha a pya, Judah Siapharan Jehoiakim nynh maee te a upaw ccakue kya-e bya balyn kha Jeremiah nynh opah zah a zei; alokuhpaw bya patae kha biachih athua.