33
Detah koute Dansahnaw
1 Jeremiah tuh rhawviatu hae voidu lungkhu thong a ccaw lyakhe, Bawipaw bya tuh vae ningnaw a kya yn thua zah,
2 laephi a raetu Bawipaw , laephi muinsan kha rae zah a tynsahtu Bawipaw , a min Bawipaw cikuhpaw nynh hynhte a ho:
3 Kae kha yn ko lah, kae oi cih, na ny boi leipaw alepaw te thuruhpaw uccaw kha kae hopah cih.
4 Koihlunawpaw rhawtuk-marung te thaloi hae kyate thungkhawku nawlan cite ro athuapaw e khuapi kya-e inn hae te Judah siapharan hae inn hae konglangte Bawipaw , Israel Pachia nynh a hopaw tuh:
5 Khaldi hae tuh rhawtuk khylan thuasah, ka thinria zah ka bungpawnaw keiccuze ka chia hae paw michi rhua hae khate inn hae kha phe biasah khylan thuasah oun tee vae hae, pawccecize mih hoyleinaw balyn keiccuze e khuapi kyate ka mae kha ccanglang ka hawitaw vae hae.
6 Thuasalama e khuapi hynh ka dansah cih; khuaccaaw hae kha ka dansah cih hae zah hoirumnaw patae te khynnaw kha ka pya cih hae.
7 Judah hae te Israel hae kha ka kikhae cih hae zah, langmawlya hawte ka thadynsah cih hae.
8 Ka tungvaw a rae hae paw seinaw balyn kha ka thyaasah cih zah, mih seinaw balyn te kae yn dounaw hae kha ka ngaethya cih hae.
9 E khuapi tuh ka hanlan lungtuanaw te minthaannaw athua cih zah, minmin hanlan hoynaw ka raepaw balyn kha a thae hae paw laephi vaw e minphuin hae balyn malang khe thehoynaw te phu-enaw athua cih; e khuapi ka pyapaw hoirumnaw balyn te hoynaw balyn keiccuze a rih cih hae zah a thyngkuh cih hae.
10 Bawipaw nynh hynhte a ho: “Ccungccaw te sarangpaw a um leinaw alakawpaw ram,” cite na hopaw e hmin kya thuasah, ccungccaw te sarangpaw um leite daetedaepaw Judah khua hae te Jerusalem laanpi hae kya thuasah,
11 lungtuanaw roi te lungpawnaw roi, zudy ccangvaepaw roi te akaenung liaccanung roi, hlaw a sah hae paw roi, te Bawipaw beikinn lang lungtuanaw silawnawpaw kha ccyngte,Ref 33.11: 1Sh 16.34; 2Sh 5.13, 7.3; Ezr 3.11; Sam 100.5, 106.1, 107.1, 118.1, 136.1
“Bawipaw tuh hoy zah,
atynpaw a sungsahnaw tuh zungzae atyn keiccuze
vaaw Bawipaw kha thehoysah oh!” a ci hae paw roi kha thaethui athua cih.
Pawccecize e ram tuh langmawlya hawte ka thuasah thui cih, cite Bawipaw nynh a ci.
12 Vaaw Bawipaw nynh a hopaw tuh: Ccungccaw te sarangpaw a um leipaw alakawpaw hynh-e hmin kya te a khua hae balyn kyakhe tuuphu hae a rin hae paw tuurin hae hanlan rampaeesakunaw hmin tuh bua a um cih.
13 Mua vaw e khua hae, mua leihpaw e khua hae te alia lang e khua hae, Benjamin ram, Jerusalem pepan e hmin hae te Judah ram e khua hae kyakhe tuu hae a riatupaw kuihkaw khe tuuphu hae tuh bua a cceih cih hae, cite Bawipaw nynh a ci.
David kya Byakinnaw
14 Bawipaw nynh a hopaw tuh: Israel hae te Judah hae kya bya ka kinpyaku hae paw kha ka ccingsah ccyh tuh yn thua ccaccing cih.Ref 33.14-16: Jer 23.5-6
15 Tuin nin te tuin ccyh kyakhe, David hanlan adingpaw Akaran kha ka toihsah cih; aning nynh ram lungkhu kya byading te dingnaw kha a rae cih.
16 Tuin nin vae tuh Judah kha khum athua cih zah, Jerusalem tuh khyndadyh lan a um cih. A min tuh, “Bawipaw tuh aening dingnaw nynh thua,” cite ko athua cih.
17 Bawipaw nynh hynhte a ho: Israel phin kya-e bawitungkhung vawlan a haung lanpaw David ciihan tuh papin paekuh lan khyh,Ref 33.17: 2Sa 7.12-16; 1Si 2.4; 1Sh 17.11-14
18 ka malang khe maee-ute silawnaw, ccathae silawnaw, accyh takyh kya silawnaw a rae cih paw Levi phin ranpibawi lanpaw ccungccaw mah papin paekuh lan khyh.Ref 33.18: Nam 3.5-10
19 Bawipaw bya tuh Jeremiah kya yn thua zah,
20 Bawipaw nynh hynhte a ho: Khuazi te khuadae tuh mimaw ccyh thyhte a um khyh ccaw hae cite, khuazi hanlan te khuadae hanlan ka raepaw ka byakinnaw kha ro kho athua ze rou nynh,
21 ka ryalahtu David kya ka raepaw ka byakinnaw tuh ro kho athua cih zah, David a bawitungkhung vawlan te a uk cih paw ccapaw kha hoi lan khyh, te ka ryalahtu Levi phin hae kya ka raepaw ka byakinnaw kha mah ro kho athua cih.
22 Vaawlang e awsi hae kha riatae um khyh zah, rili laesia mah riatae a um khyh hawte, ka ryalahtu David ciihan te ka rya yn lawpah hae paw Levi phin hae kha ka pungzaesah cih hae.
23 Jeremiah kya yn thuapaw Bawipaw bya tuh:
24 “Bawipaw nynh a po hae paw innbyn bynning hae kha bua a vua vae hae,” cite ccungccaw hae nynh a ho hae paw kha hoyte na tua khyh oh tou? Minmin nynh ka ccungccaw hae kha minphuin phuin kheit lang ria lei lan ciate a theihrya hae paw hynh hoyte na tua khyh oh tou?
25 Bawipaw nynh hynhte a ho: Khuazi te khuadae hanlan ka raepaw ka byakinnaw kha thuasah, vaaw te lae hanlan ka raepaw phungzae hae kha thuasah ka tynsah khyh ze rou nynh,
26 Jakob ciihan te ka ryalahtu David ciihan kha ka vua cih hae zah, Abraham, Isak te Jakob ciihan hae kha uk khylan David ciihan lukhakheit kha ka po lan khyh. Minmin kha ka kikhae cih hae zah thaw ka ccih cih hae, a ci.