32
Jeremiah nynh Loo A Re
1 Nebukhadnezzar nynh siapharan lang a tangnaw kum haw lae taryanaw, Zedekiah Siapharan nynh Judah siapharan lang a tangnaw kum hawnaw khe Bawipaw bya tuh Jeremiah kya a thua.Ref 32.1: 2Si 25.1-7
2 Tuh lya tuh Babilon siapharan a rhawkaw hae nynh Jerusalem kha a koihlu hae, profeh Jeremiah tuh Judah siapharan inn rhawviatu hae inn voidu lungkhu khe thong a ccaw lya nynh thua,
3 tuin kyakhe Judah Siapharan Zedekiah nynh Jeremiah kha thong a saw. Zedekiah nynh Jeremiah kha, “Bawipaw nynh, ‘E khuapi hynh Babilon siapharan kuih kalan ka pya cih zah, a lah cih;
4 Judah Siapharan Zedekiah tuh Khaldi hae kuih kyate lue lan khyh, Babilon siapharan kuih kalan pya athua ccaccing cih, aning te a muihkuh cih hae zah mitmae hawiliakute bya a hokuh cih hae;
5 Zedekiah kha Babilon lang a cciakhae cih zah, a tungvaw rya ka law mawlaezung tuin kyakhe a um cih, cite Bawipaw nynh a ci; Khaldi hae kha na dou hae zemah na tae lan khyh hae,’ a ci, cite pawccemou profehbya na ho?” a cipya.
6 Jeremiah nynh, “Ka kya yn thuapaw Bawipaw bya nynh:
7 ‘Na paaw neitawpaw Shallum ccapaw Hanamel tuh na kalan yn thua cih zah, “Anathoth kya umpaw ka loo tuh nang nynh yn re, pawccecize nang nynh shawkhawnaw kaw na hoi,” cite ae hopah cih,’ yn cipya,” a ci.
8 Bawipaw bya thyhte ka neitaw lanpaw Hanamel tuh rhawviatu hae voidu lungkhu lang, ka kya yn thua zah kae kha, “Benjamin ram Anathoth khua e ka loo kha yn re, pawccecize nang tuh khah-e loo hoinaw kaw te shawkhawnaw kaw na hoi; namaw hanlan rekuh,” yn cipya. Tetuh e bya hynh Bawipaw bya nynh thua cipaw ka ny.
9 Anathoth khua umpaw ka neitaw lanpaw Hanamel loo tuh ka re zah, loo mee ngunphua shekel haw lae sari kha ka toupya.
10 Nawccawnawpaw min ka thuh zah tazeih ka khia, ccaekia hae kha ka ko hae zah phua kha zawccu te ka khinpya.
11 Te aphung thyhte zeikuh zah tazeih khiakuhpaw rekunawpaw ccaw te ccabawng leipaw khawpipaw ccaw kha ka law;
12 te rekunawpaw ccaw tuh ka neitaw lanpaw Hanamel malang, rekunawpaw ccaw kya minthuh hae paw ccaekia hae malang, rhawviatu hae voidu lungkhu a haung hae paw Judah hae balyn malang khe Mahseiah ccapaw Neriah a ccapaw Baruk kalan khe ka pya.
13 Mih balyn malang khe Baruk kha,
14 Israel Pachia vaaw Bawipaw nynh a hopaw tuh: E rekunawpaw tazeih khiakuhpaw ccaw te ccabawng leipaw khawpipaw ccaw hynh lah lah, khaw cia atyn nawlan, laephi ang lungkhu khe nungtua.
15 Pawccecize Israel Pachia, vaaw Bawipaw nynh a hopaw tuh: E ram lungkhu e inn hae, loo hae te misu khokhu hae hynh rethui athua cih, a ci cite ka hopya.
Jeremiah Sawsangnaw
16 Loo rekunawpaw ccaw kha Neriah ccapaw Baruk kalan ka pya koute, Bawipaw kalan saw ka sangpaw tuh:
17 Pou Bawipaw PACHIA, alesaepaw na huhan te na dyngpaw na kuih khate vaaw te lae hynh na rae! Na hanlan myaryamaw arupaw pawpaw mah um khyh.
18 Atynpaw na sungsahnaw kha ccungccaw athong patae kya na langsaku, thuasalama paaw hae seinaw kha nyalang a um hae paw ccaaw hae tungvaw na liaru hae, alesaepaw te athungpaw Pachia na thua zah, na min tuh vaaw Bawipaw na cikuh,
19 alesaepaw tuanaw na hoi zah ngaeangthua lan umpaw uccaw kha na rae; na mit nynh ccungccaw hae laanpi balyn kha pong a muih; mih ccianaw laanpi thyhte, mih cyisahnaw athae thyhte amee na pya hae.
20 Izip ram lungkhu muihsahnaw hae te ngaeangnaw hae kha na langsakuh zah, Israel ram kya te ccungccaw balyn kyakhe atunin cia palei na langsaku ung, tukeiccuze atunin cia mah po atynpaw min kha na raeku vae.
21 Muihsahnaw hae te ngaeangnaw hae te thuasah, na dyngpaw na kuih athungpaw te thuasah, alesaepaw ri lan umpaw uccaw khate thuasah Izip ram kyate na ccungccaw hae kha na cciakhae hae;
22 kae pya cih oh cite mih minpaaw hae kya bya na kinpyaku hae paw ram, mateitui te khoilutui aluanaw e ram hynh na pya hae;
23 minmin nynh e ram hynh teenua hae zah a lawku hae. Thuasalama na bya ngae khyh hae, na kawbya kha zui khyh hae, cyi lan kaw na pya hae paw balyn kha ccangkheit san cyih khyh hae. Tukeiccuze e shethya thuanaw balyn hynh mih tungvaw na ccawsah vae.
24 Khuapi kha law khylan laephi thae hae zah, po voilu lan adoh lante a pumnua vae hae, khuapi tuh thaloi rhaw, ccakanccinaw te shethya kha tung zah, khuapi kha rhaw a tuk cciamang hae paw Khaldi hae kuih kya pya athua vae. Na hopaw bya acyikupaw hynh phe na muih vae.
25 Pou Bawipaw PACHIA, khuapi kha Khaldi hae kuih kalan pya athua vae zemah, “Ccaekia hae kha ko hae lah, loo kha re,” nae cipya vae, a ci.
Kithuinaw Kong Hotynaw
26 Jeremiah kya yn thuapaw Bawipaw bya tuh:
27 Dotua, kae tuh Bawipaw ka thua zah, ccungccaw balyn Pachia nynh ka thua; ka hanlan myaryamaw arupaw paw sanmah a um zawtou?
28 Tukeiccuze Bawipaw nynh a hopaw tuh: E khuapi hynh Khaldi hae kuih kalan te Babilon Siapharan Nebukhadnezzar kuih kalan ka pya cih zah, aning nynh a lawkuh cih.Ref 32.28: 2Si 25.1-11; 2Sh 36.17-21
29 E khuapi a tuk cih hae paw Khaldi hae tuh oun thua cih hae zah, e khuapi hynh maee te a soi cih hae; ka thinriasah khylan Baal pachia elang innccukaly kya silawnaw a raenaw hae inn hae te ccangpaw pachia hae kalan niapaw silawnaw a raenaw hae inn hae kha mah maee te a soi cih hae.
30 Pawccecize Israel hae te Judah hae nynh mih di lya mawte ka malang khe ahoy leipaw kyalya kha a cyi hae; Israel hae nynh mih kuih ryalawnaw khate ka thinrianaw rou kha a rae hae, cite Bawipaw nynh a ci.
31 E khuapi hynh nynh rae takaw lyate atu cia, ka thin yn riasah zah ka bung yn pawsah, tukeiccuze ka muihnaw kyate ccaring ka nue cih,
32 pawccecize Israel hae te Judah hae mih siapharan hae, mih bawi hae, mih ranpibawi hae te mih profeh hae, Judah ram e ccungccaw hae te Jerusalem khuaccaaw hae nynh hoyleinaw balyn kha rae hae zah ka thin yn riasah hae.
33 Minmin nynh mih malang sangsah leite mih nulang yn sangsah hae; apaekuh lei lan ka hopya hae zemah, ka bya ngae leite thuiheinaw kha lawkuh khyh hae.
34 Ka min a umnaw beikinn kyakhe anungsikuhpaw mih uccaw hae kha nung hae zah a thusah hae.Ref 32.34: 2Si 23.10; Jer 7.30-31, 19.1-6
35 Mih ccanung hae te mih ccapaw hae kha Molek pachia kalan pya khylan Hinnom ccapaw kya-e accya kyakhe Baal pachia hanlan ahangpaw kha a raepya hae; kaw ka pya lei hae pite Judah kha seinaw raesah khylan, hynhcih anungsikuhpaw uccaw oun rae cih hae cipaw hynh ka thinlung kya mah thungkuh boi khyh.Ref 32.35: Lev 18.21; 2Si 23.10; Jer 7.31
36 Tukeiccuze, “Thaloi rhaw, ccakanccinaw te shethya thuasahte Babilon siapharan kuih kalan pya athua cih,” na ci oh paw e khuapi konglangte Bawipaw , Israel Pachia nynh hynhte a ho:
37 Ka thinriate ka bungpaw zah myaryamaw ka thin-u keiccuze ka la deenaw hae ram balyn kyate minmin kha bua ka suelua cih hae; e hmin kalan ka kikhae cih hae zah, khyndadyh lan ka umsah cih hae.
38 Minmin tuh ka ccungccaw hae athua cih hae zah, kae tuh mih Pachia ka thua cih.
39 Mimaw hoynaw hanlan te minmin nukhu e mih ccaaw hae hoynaw hanlan, kae kha zungzae yn rithya nawlan hae, lunglokunaw te laanpi ccangkheit zuinaw kha ka pya cih hae.
40 Minmin hanlan hoynaw raepyapaw kha papin ka umtaw khyh nawlan, minmin kya zungzae tynpaw byakinnaw kha ka rae cih; ka kyate a maeku khyh nawlan hae, kamaw rawrinaw kha mih thinlung kya ka sang cih.
41 Minmin hanlan hoynaw raepyanaw kyakhe ka lungtuakhaekuh cih zah, minmin kha e ram kya ka thinlung balynte, ka tuanaw balynte, lungzite ka umsah cih hae.
42 Bawipaw nynh hynhte a ho: E myarya lepaw ronaw balyn hynh e ccungccaw hae tungvaw ka thuasah vae hawte, atu bya ka kinpyaku hae paw hiin hoynaw balyn hynh mih tungvaw ka thuasah cih.
43 E ram hynh ccungccaw te sarangpaw um leite, daetedaenaw ram thua zah, Khaldi hae kuih kalan pya athua vae, cite na hopaw e ram lungkhu hin loo hae kha zuaku rekunaw a umthui cih.
44 Benjamin ram kya thuasah, Jerusalem pepan kya thuasah, Judah ram e khuapi hae kya thuasah, mua vaw e khua hae, niccaw lang e khua hae te alia lang e khua hae kya thuasah loo hae kha phua te reku athua cih zah, zuanaw rekunawpaw ccaw hae tuh minthuh, tazeihkhia te ccaekia kokunaw kha a umthui cih; pawccecize mih hiinnaw kha langmaw hawte ka thuasah thui cih, cite Bawipaw nynh a ci.