31
Lungtuate Kithuinaw
1 Bawipaw nynh a hopaw tuh: Tuin ccyh vae ze, kae tuh Israel phin hae balyn Pachia ka thua cih zah, minmin tuh ka ccungccaw athua cih hae.
2 Bawipaw nynh hynhte a ho:
Thaloi kyate a lue hae paw nynh
laesia ram kya thawccinaw a mue hae;
Israel nynh haeungnaw he a ccung te,
3 Bawipaw tuh asawnaw kyate
amaw kalan yn langkuh.
Nang kha zungzae tynpaw
sungsahnaw te kae sungsah;
tukeiccuze na tungvaw
ka lungzi zungzae.
4 Pou liaccady Israel!
Nang kha bua kae thadynsah thui cih.
Na tyng kha na lawkuh thui cih zah,
lungtuate na lawthui cih.
5 Samaria mua vawlan khe
misu khokhu kha
na raekuh thui cih;
misu khokhu a raetu hae nynh
misu ku a lin cih hae zah,
athae kha a ae cih hae.
6 Efraim mua vawlan e
rhawvia hae nynh,
“Rang oh lah, Zion mua lang,
Bawipaw ah Pachia kalan cceih oh sih,”
cite a ci hae ccyh yn thua cih, a ci.
7 Bawipaw nynh hynhte a ho:
Jakob hanlan lungtuate thawte
hlawsah oh, minphuin hae lakuze
lupi athuapaw hanlan thawte sia oh;
“Pou Bawipaw , na ccungccaw hae,
a laehypaw Israel hae hynh
beih khum hae,” cite thaesah oh lah,
thehoysah oh.
8 Minmin kha thahlang ram kyate
ka cciakhae cih hae zah,
laephi asaw huaccenaw kyate
ka suelua cih hae,
mitmoh hae te ccukhou hae,
ccaawpoi hae paw te
neitangia ccih hae paw mah
minmin kya a umbua cih hae;
myarya lungpawte zapi hae tuh a ki cih hae.
9 Rawkhuite a kithui cih hae,
lungtangnaw pyate ka kikhae cih hae,
vawkhu kin, thypawku a um leinaw
laanpi alawpaw kya ka cciasah cih hae;
pawccecize kae tuh Israel hanlan
paaw ka thua vae zah,
Efraim tuh ka ccatawccaw nynh thua.
10 Pou minphuin hae,
Bawipaw bya kha ngae oh lah,
asawnaw rili khunglang e
ram hae kyakhe phytua oh;
“Israel kha phiariphiarae a nungtupaw nynh
bua a sueluathui cih,
tuurinpaw nynh tuuphu kha
a do-oih hawte a do-oih cih,” cite ho oh.
11 Pawccecize Bawipaw nynh
Jakob kha a shawkhaw vae,
amaw laeze myaryamaw
athung huapaw kuih kyate a khum vae.
12 Minmin nynh oun cceih cih hae zah,
Zion mua dung khe thawte
hlaw a sah cih hae,
Bawipaw nynh a pya hae paw
hoynaw, ccathae, misutui, chitui,
tuuphu te vaetua phu kya-e
ataw hae khate mih lungrythuakhaekuh cih;
mih hiinnaw tuh tui abukuhpaw
khokhu hawte athua cih zah,
papin zo vae lan khyh hae.
13 Tetuh liaccaw hae tuh
lungtuate a law cih hae zah,
ccangvae hae te ataw vae hae paw tuh
mih lungpaw cih.
Mih rawnaw kha lungtuanaw lang
ka paleih cih zah, lungtangnaw ka pya cih hae,
ngaethyanaw hanlan
lungtuanaw kha ka pya cih hae.
14 Ranpibawi hae kha thobaleih lan
ka nung cih hae zah,
ka ccungccaw hae tuh
ka hoynaw khate
mih lungryachikhaekuh cih,
15 Bawipaw nynh hynhte a ho:Ref 31.15: Gen 35.16-19; Mat 2.18
Ramah khua kya rawkhuinaw te
cciteccih lan
rawnaw roi kha thae athua.
Rachel tuh a ccaaw hae hanlan
rawkhuite a um;
a um lei vae hae paw
a ccaaw hae keiccuze
soihbiaku ry vae khyh.
16 Bawipaw nynh hynhte a ho:
Na rawpaw hynh ngae ccavae lah,
na mitphi lua nan vae sah;
pawccecize na ryalaw mee lasung a um,
minmin tuh rhaw hae
ram kyate a ki cih hae;
17 na malang ccyh hanlan
ngaehoinaw a um,
na ccaaw hae tuh mih ram lang a ki cih hae,
18 Efraim nynh yn ngianawpaw bya ka thaepaw tuh:
“Kae tuh akiakuh leipaw
vaetuataw te nynh kae loku;
kae kha nae thuihei zah,
nae thuiheinaw kha ka lawku vae.
Kae hynh beih yn kikhae,
beih yn kisah,
pawccecize nang tuh Bawipaw
ka Pachia nynh na thua.
19 Ccanglang ka cceihsei koute
ka ngaesikuh vae;
kae hynh akaw-aleih
phe nae muih koute,
ka phae kha ka tukuh;
ka di lya thethyanaw ka mue keiccuze,
ka maethah zah, ka lungroh,” a ci.
20 Efraim tuh ka sungsahpaw
ka ccapaw athua tou?
Ka lungrythuapaw ccaaw athua tou?
Amaw konglang ka ho takyh vae ze
palei ka liathui ung.
Tukeiccuze ka thinlung nynh
ngae ccaccing zah,
a tungvaw thawccinaw
21 Laanpi kya syntawnawpaw hae kha
bingkuh lah, nynawpaw
tung hae kha bingkuh;
na ccianawpaw laanpi kha
hoyte tua.
Pou liaccady Israel, ki ccavae,
na khuapi hae kalan ki ccavae.
22 Pou alungzi leipaw ccanung,
hohseciamou rarymamaw
na um ung cih?
Bawipaw nynh laephi vawlan
uccaw thawpaw kha a rae vae:
nopi tuh pise hawte nynh thua.
23 Israel Pachia, vaaw Bawipaw nynh hynhte a ho: Minmin kha he ka kikhae hae te, Judah ram kya te a khuapi hae kyakhe,
“Pou dingnaw a umnaw hmin,
pou athyaapaw mua,
Bawipaw nynh hythua ae pya!”
cikuhpaw bya hynh
vaekheit bua a ho cih hae.
24 Tuin kyakhe Judah ram te a khua hae balyn, loopho hae te mih tuuphu hae ryte a khiavuikuh hae paw ccungccaw hae tuh a umkheih cih hae.
25 Thawbang hae paw kha
mih vue ka sosah cih hae zah,
thawthang hae paw balyn kha
thawzung ka pyathui cih hae, a ci.
26 Tetuh ka thokuh zah ka do, ka i liate ka thawzung atoihthui.
Lu Raveihte asekuhpaw Detahnaw
27 Bawipaw nynh a hopaw tuh: Judah ram te Israel ram kya ccungccaw ciihan te sahiin ciihan ka saw ccyh tuh solei yn thua cih.
28 Minmin kha poh khaeete khya khylan, vua khylan, ro khylan te hoyleinaw thuakhaepya khylan phang ka la rin hae hawte, minmin kha lin khylan te sak khylan phang ka rin cih hae, cite Bawipaw nynh a ci.
29 Tuin nin vae tuh minmin nynh,
“Nungpaaw hae nynh ariapaw misu thae kha ae hae zah,
ccaaw hae mih hawzaw,” cite ho vae lan khyh hae.Ref 31.29: Eze 18.2
30 Ccungccaw balyn tuh mimaw seinaw keiccuze a chih cih hae; ariapaw misu thae a aepaw miakaw tuh a haw azaw cih.
Byakinnaw Thawpaw
31 Bawipaw nynh a hopaw tuh: Israel phin te Judah phin hae ryte byakinnaw thawpaw kae rae ccyh tuh solei yn thua cih.Ref 31.31: Mat 26.28; Mar 14.24; Luk 22.20; 1Ko 11.25; 2Ko 3.6Ref 31.31-34: Heb 8.8-12
32 Tuh-e tuh mih minpaaw hae kha Izip ram kyate mih kuih te suete ka poukhae lya hae ze, ka raepaw byakinnaw te lokuh lan khyh. Mih vawpaw hawte ka la thua zemah, minmin nynh tuh-e byakinnaw kha a ro hae, cite Bawipaw nynh a ci.
33 Tuh-e nin hae koute Israel phin kya ka rae lanpaw byakinnaw tuh hynhte nynh athua: Ka phunglang kha mih lungkhu kya ka nung cih zah, mih thinlung kya ka zei cih; te kae tuh mih Pachia ka thua cih zah, minmin tuh ka ccungccaw hae athua cih hae.Ref 31.33: Heb 10.16
34 Minmin nynh, “Bawipaw kha nytua,” cite lu kheit te lu kheit ccangpyakute hopakuh vae lan khyh hae, pawccecize adih huaccepaw kyate ale huaccepaw kyacia mih balynte kae kha yn nyh vae cih hae; mih hoyleinaw kha ka ngaethya cih hae zah, mih seinaw kha ka liathui vae lan khyh, cite Bawipaw nynh a ci.Ref 31.34: Heb 10.17
35 Ninthu awnaw hanlan
khuanin kha umsah zah,
khuazi awnaw hanlan sawpaw te
awsi hae kha ccynmamyh lan
a synriatupaw,
rili tuileih accae ccaw cite
rili tui a thesakuhtupaw,
a min vaaw Bawipaw acihkuhpaw
Bawipaw nynh hynhte a ho:
36 E ka synria hae paw hynh
ka malang te azo hae zetuh,
Israel ciihan mah minphuin
phuin kheit athuanaw kha
ka malang te zungzae azo cih,
37 Bawipaw nynh hynhte a ho:
Luki lang e vaawlui kha tou kho thua zah,
akaw lang e laephi athonaw
aleihpaw kha akaw-aleih
nythya kho athua zetuh,
Israel ciihan balyn kha
mih cyisahnaw balyn keiccuze
ka vua cih hae,
Jerusalem A Lethung cih
38 Bawipaw nynh a hopaw tuh: Hananel innhangpaw kyate Apaki Koikua kyacia Bawipaw elang khuapi tuh raethui athua ccyh tuh yn thua ccaccing cih.
39 A ramri tuh niccaw lang e Gareb sangpyng cia lawbabin lan athua cih, te a maeleihkuh cih zah Goah cia athua cih.
40 Michi rhua te buhhaw a vuanaw hae accya balyn, te Kidron Vaw kyacia a umpaw loo balyn, nithua lang e Marang Koikua apaki cia Bawipaw hanlan thyaasah athua cih. Khuapi tuh papinmaw ro thua vae lan khyh zah, vua thua vae lan khyh.