19
Tui-ung Koipaw
1 Bawipaw nynh a hopaw tuh: Cceih lah, ang raetu kya-e anglae te raekuhpaw tui-ung kha la re. Piccan hae abang te a kum tangpaw ranpibawi hae abang kha kobua hae lah,
2 Potsherd Koikua teenaw kya umpaw Hinnom ccapaw kya-e accya langkhe la cceih, tuin kyakhe kae hopyapaw bya kha la ho.Ref 19.2: 2Si 23.10; Jer 7.30-32, 32.34-35
3 Nang nynh na ho lanpaw tuh: Pou Judah siapharan hae te Jerusalem khuaccaaw hae, Bawipaw bya hynh ngaetua oh. Israel Pachia, vaaw Bawipaw nynh hynhte a ho: E hmin kyahin shethya ka thua sah cih zah, tuh-e kong a thaepaw miakaw tuh a nakaring kya ringtering lan accae cih.
4 Pawccecize e ccungccaw hae nynh kae kha yn vua vae hae, te mimaw, mih minpaaw hae te Judah siapharan hae nynh a la ny lei hae paw ccangpaw pachia hae kalan khe silawnaw raete, e hmin hynh a thusah hae; e hmin hynh seinaw a hoi lei hae paw chiise te phe a biasah hae,
5 Baal kalan maee-ute silawnaw lante mih ccaaw hae kha maee te u nawlan cite Baal hanlan ahangpaw hmin kha a raepya hae, tuh-e tuh kae nynh ka hopya hae paw te kaw ka pya hae paw thua khyh, ka lungkhu a thungkuhpaw mah thua khyh.Ref 19.5: Lev 18.21
6 Tukeiccuze Bawipaw nynh a hopaw tuh, e hmin hynh Tofeth cite thuasah, Hinnom ccapaw kya-e accya cite thuasah ko thua vae leite, Chianaw accya cite ko athua ccyh yn thua ccaccing cih,
7 E hmin kyahin Judah hae te Jerusalem khuaccaaw hae mih paccynkunaw kha accakaepaw lang ka tangsah cih zah, minmin kha mih rhaw hae malang khe thaloi te thuasah, minmin chia khylan a ccung hae paw kuih te thuasah ka theih cih hae. Mih rhua kha vaawlang e pavaw hae te laephi vaw e loramsaw hae kalan looh lang ka pya cih hae.
8 E khua hynh ri lan umpaw te a sarya hae paw khua lang ka rae cih; e khua nynh a tungpaw ronaw balyn keiccuze, a pepan po a cceihpaw miakaw nynh mih ngaeangthua cih zah a sarya cih hae.
9 Te mih ccapaw hae te mih ccanung hae saw kha ka aesah cih hae, mih rhaw hae te minmin kha chia lan a ccung hae paw nynh koihlu hae zah, riathaesahte teingnaw a pya hae keiccuze mih innpaw hae saw kha a ae cih hae.
10 Tetuh na cceihkheih oh paw muihnaw khe tui-ung kha na koi cih zah,
11 hynhte na hopah cih hae: Vaaw Bawipaw nynh hynhte a ho: Lukhakheit nynh ang raetu kya-e ang kha raethui kho lei lan ciate a koipya hawte, e ccungccaw hae te e khua hynh ka koi cih hae. Tofeth kyakhe uukunaw hmin a um vae lei lan ciate a uhkuh cih hae.
12 Bawipaw nynh a hopaw tuh: E hmin kya te e hmin kya a um hae paw tungvaw khe tuhcite ka cyih cih zah, e khua hynh Tofeth hawte ka thuasah cih.
13 Jerusalem e inn hae te Judah siapharan hae mih inn hae tuh Tofeth hmin hawte thusah athua cih hae—innccuvaw miakaw khe vaawlui kya a umpaw balyn kalan silawnaw rae hae zah, ccangpaw pachia hae kalan khe niapaw silawnaw kha a rae hae.
14 Jeremiah tuh Bawipaw nynh profehbya ho lan a sawnaw hmin Tofeth kyate he yn thua te, Bawipaw inn maepaw khe thadyn zah ccungccaw balyn kalan a hopya hae paw tuh:
15 Israel Pachia, vaaw Bawipaw nynh hynhte a ho: E khuapi te a pepan e khua hae balyn tungvaw thuakhae lan ka la hoty vae paw ronaw balyn kha atu ka thuasah vae cih, pawccecize minmin nynh ka bya kha thae ry leite mih nging tokarae lan a um hae.