17
Judah Seinaw te Detahnaw
Judah seinaw kha sivaw bawpe te zei athua; mih thinlung lungphe vawlan khe daimon azuingpaw te karynte zei thua zah, mih silawhang ki hae kyakhe zei athua, ramkaw kya umpaw mua hae vawlan, ahangpaw mua dung hae vawlan te hinlalyhpaw thingku miakaw pepan kya a umpaw mih silawhang hae te Asherah khozinung tung hae kha mih ccaaw hae nynh a liathui hae. Na ram pynpi e na seinaw mee lang na sisua te na ccakhungkupaw na uccaw balyn kha luadetu hae kalan ka pya cih hae. Na cyisahnaw keiccuze nang kae pyapaw rho kha na shung cih, na ny leipaw ram kya-e na rhaw hae hanlan rya kae lawsah cih, pawccecize ka thinria keiccuze zungzae arua cih paw maee tuh tyh athua vae.
 
Bawipaw nynh hynhte a ho:
Ccungccaw basi kha doliakuh zah
ccungccaw basi kha
a thawzung lang nungkute
Bawipaw kyate a thinlung
a maeleihkuhpaw tuh thyalaw athua hae.
Aning tuh laesia ram e
thabu hawte athua cih zah,
bawmnaw he yn thua te mue lan khyh.
Aning tuh ramkaw e ramrou,
humhung mah a um leinaw
loi ram kyakhe a um cih.
 
Bawipaw a doliakuhpaw tuh
hythua ccoupaw nynh thua,
aning nynh a doliakupaw tuh
Bawipaw nynh thua.
Aning tuh tui pe lin thua zah,Ref 17.8: Sam 1.3
vawkhu kin atharui a sawpaw
thingku hawte athua cih.
Tuh-e thingku nynh asopaw
yn thua vae ze rih lan khyh zah,
anaw tuh hinlalyh lan a um cih;
khuaakan kum khe a thinphang khyh zah,
athae dy leite po athae.
 
Thinlung tuh pawpaw balyn laeze
a thyaruhhua;
thinlung tuh a ccouseikuh,
hum nynh mou thinlung kha
a nyhthya kho cih?
10 Kae, Bawipaw tuh ccungccaw miakaw kha
mih cyisahnaw thyhte,Ref 17.10: Sam 62.12; Bya 2.23
a cyi hae paw thyhte aphu-aphae pya khylan
mih tuanaw kha ka syntawtua zah,
mih thinlung kha akaw-aleih ka do.
 
11 Ahme leite sisua a ccakhungkuhpaw tuh
amaw atui athua leipaw kya
a ccungpaw vawkya pavaw hawte nynh athua;
a hiinshe angankuh he athua te,
tuh-e sisua hae kha a cciataw cih zah,
athangnaw kya tuh mingaee athuanaw kha
amaw nynh ccaekia a khan cih.
 
12 Athotakawnaw kyate hangthung athuapaw,
aphu-epaw bawitungkhung tuh
ah beiknaw hminthyaa nynh thua!
13 Pou Israel a ngaehoinaw athuapaw,
pou Bawipaw!
Nang ae vuapaw balyn tuh
maethyanaw a mue cih hae;
na kyate ccanglang a maeleihkuh hae paw tuh
laephi ccazing kya zei athua cih hae,
pawccecize minmin nynh hiinnaw tuidy,
Bawipaw kha a vua vae hae.
 
Thyaaccounaw hanlan Jeremiah Sawsang
14 Pou Bawipaw , yn dansah lah, ka dan cih,
yn khum lah, khum ka thua cih;
pawccecize the ka hoysahpaw tuh
nang nynh na thua.
15 Bawipaw bya tuh teimou a um?
Atu oun thua sah!” cite
ccungccaw hae nynh kae kha yn ci hae.
16 Thuasalama na ryalaw kya
tuurintu thuanaw kha ka ccuetaw boi khyh,
vawsaw ccyh kha ka ry boi khyh.
Ka munglae kyate
atoikuhpaw bya kha na nyh zah,
tuh-e bya tuh na malang khe a um.
17 Ka hanlan ri lan umpaw lang tang nan;
nang tuh shethya ccyh kya
ka khynnaw nynh na thua;
18 Kae yn tuaa yn sahtu hae paw tuh
maethyanaw mue hae sah,
thuasalama kae tuh
maethyanaw ka mue nan sah;
minmin tuh mih lungroh sah,
thuasalama kae tuh
lungronaw ka mue nan sah;
nang nynh mih tungvaw khe
shethya kha thuasah lah khaleih roh hae!
 
Sabbath Nin kha Thyaasah
19 Bawipaw nynh kae yn hopyapaw tuh: La cceih lah Judah siapharan hae nynh a teenaw hae te a pounaw hae Zapi Koikua kya te Jerusalem koikua balyn kyakhe thadyn lah, 20 ccungccaw hae kha hynhte hopah hae: E koikua hae kyate na tee oh paw Judah siapharan hae, Judah hae balyn te Jerusalem a um hae paw nanning, Bawipaw bya kha ngaetua oh, cite hopah hae. 21 Bawipaw nynh hynhte a ho: Nae hiinnaw hanlan, nanning nynh sabbath nin kya uccaw na phu khyh nawlan oh te Jerusalem koikua kyate na teekhae khyh nawlan oh raeringkuh oh.Ref 17.21: Neh 13.15-22 22 Sabbath nin kya nae inn kyate uccaw toikhaekuh nan oh, pawpaw rya mah lah nan oh, nae minpaaw hae kha kaw ka pya hae thyhte, sabbath nin kha thyaasah oh.Ref 17.22: Exo 20.8-10; Deu 5.12-14 23 Tuhzemah minmin nynh ngae khyh hae zah, mih nakaring tuakuh khyh hae; mih nging tokarae lan a um hae, thuiheinaw kha thae ry khyh hae zah lawkuh khyh hae.
24 Bawipaw nynh a hopaw tuh: Nanning nynh ka bya kha ngaete, sabbath nin kya uccaw kha hynh-e khuapi koikua kyate teekhae leite na um oh zah, sabbath nin kha thyaasahte rya na law khyh oh zetuh, 25 David bawitungkhung vawlan a haungpaw siapharan hae tuh marangle hae te marang hae kha ccikute, mih kuihkaw e bawi hae, Judah ccungccaw hae te Jerusalem um hae paw ryte, e khuapi koikua hae kyate a tee cih hae; e khuapi tuh zungzae atyn cih. 26 Judah ram e khua hae te Jerusalem pepan e hmin hae, Benjamin ram, mua leihpaw e khua, mua vaw e khua hae te alia lang e khua ccungccaw hae tuh oun cceih cih hae zah, maee-ute silawnawpaw, silawnawpaw hae, ccathae silawnawpaw te frankinsen, lungtuanaw silawnawpaw kha Bawipaw inn lang oun ccyng cih hae. 27 Thuasalama ka bya na ngae khyh oh zah, sabbath nin thyaasah lanpaw te sabbath nin kya Jerusalem koikua hae kyate uccaw phute teekhae lei lanpaw ka bya kha na ngae khyh oh zetuh, tuh-e khua koikua kyakhe maee ka ruasah cih; tuh-e maee nynh Jerusalem khua e siapharan inn hae kha khaleih a u cih zah, tuh-e maee tuh the thua lan khyh.