19
Pilat nynh Jesu kha cciakhae zah liarue te a buasah hae. Rhawkaw hae nynh hinpaw lukhung kha khepah hae zah a lu vawlan a khungsah hae, te boei sepaw kha a zingsah hae. Ccianua hae zah, “Judah hae Siapharan tuh a she sae vae sah!” ci hae zah a mae kha a bia hae. Tukeiccuze Pilat nynh bua toikuh zah, “Dotua oh, a seinaw pawpaw mah ka muih khyh cipaw na ny nawlan oh amaw hynh nae kalan kae cciakhae,” a cipya hae. Jesu tuh hinpaw lukhung khungkuh zah boei sepaw zingkute yn pou. Pilat nynh minmin kha, “E ccungccapaw hynh dotua oh!” a cipya hae. Ranpibawi lepaw hae te palih hae nynh Jesu kha he muih hae tuh, “Vaelantung kya khiade oh! Khiade oh!” cite a sia hae. Pilat nynh minmin kha, “Nanning nynh amaw hynh cciakhae oh lah vaelantung kya khiade oh, kae tuh a seinaw pawpaw mah ka muih khyh,” a cipya hae. Judah hae nynh, “Phung ccangkheit kae hoi zah tuh-e phung thyhte aning tuh chi lan accan, pawccecize Pachia Ccapaw nynh ka thua a ciku,” cite a khung hae.
Pilat nynh tuh-e bya he a thae tuh, houh a rih vae. A inn lungkhu lang bua tee zah Jesu kha, “Nang hynh paw kyate mou nae thua?” cite a khia. Thuasalama Jesu nynh kaw kheit san khung khyh. 10 Pilat nynh, “Bya nae khung lan khyh tou? Kae tuh nang hynh vaelantung kya khiadenaw kaw te luesahnaw kaw ka hoipaw kha na nyh khyh tou?” a cipya. 11 Jesu nynh, “Vaawlang te nang hynh kawpya athua khyh ze nang nynh ka tungvaw kya paw kaw sanmah na hoi kho khyh; tukeiccuze nang na kalan kae yn appaw ccungccaw tuh ale huapaw seinaw a hoi,” cite a khung. 12 Tuin ccyh kyate tho zah Pilat nynh Jesu kha luesah lan a zuaku; thuasalama Judah hae nynh, “E ccungccapaw hynh na luesah lan athua ze, nang tuh Sizar banpaw na thua khyh; humhung zemah amaw te amaw siapharan lang a tansakuhpaw tuh siapharan a rawsepaw nynh thua,” cite a sia hae.
13 Pilat nynh tuh-e bya he a thae tuh, Jesu kha atolang poukhae zah Hebru bya te Gabbatha ci hae zah ‘Lungphae’ a ci hae paw byapianaw tungkhung kya a haung. 14 Tuin nin tuh Kawtaw Poi hanlan Paccynku nin thua zah ninthu loukaw nynh thua. Pilat nynh Judah hae kha, “Nae Siapharan hynh dotua oh!” a cipya hae. 15 Thuasalama minmin nynh, “Amaw kha poukhae oh! Poukhae oh! Vaelantung kya khiade oh!” cite a sia hae. Pilat nynh, “Nae Siapharan tuh vaelantung kya ka khiade cih tou?” cite a khia hae. Ranpibawi lepaw hae nynh, “Sizar laelan siapharan kae hoi khyh,” cite a khung hae. 16 Tetuh Pilat nynh Jesu kha vaelantung kya khiade lan mih kalan a pya hae. Tukeiccuze minmin nynh Jesu kha a cciakhae hae.
Vaelantung kya Khiadenaw
(Mat 27.32-44; Mar 15.21-32; Luk 23.26-43)
17 Jesu tuh a vaelantung puihkute ‘Luru hmin’ a ci hae paw hmin kalan a cceih, tuh-e hmin tuh Hebru bya te ‘Golgotha’ a ci hae. 18 Tuin kyakhe Jesu kha ccangpaw ccungccaw lu ning ryte vaelantung kya a khiade hae, a voilang lu kheit a ranglang lu kheit, Jesu tuh angaelaku nynh a um. 19 Pilat nynh ccawkhia kha zei zah vaelantung kya a taw. Ccawkhia kyakhe, “Judah hae Siapharan, Nazareth khuapaw Jesu,” cite a zei. 20 E ccawkhia hynh Judah hae patae nynh a ria hae, pawccecize Jesu a khiadenaw hae hmin tuh khua kyate anaekuh; tuh-e ccawkhia tuh Hebru bya, Latin bya, Grik bya te a zei hae. 21 Judah hae kyaze ranpibawi lepaw hae nynh Pilat kha, “ ‘Judah hae Siapharan’ cite zei leite, ‘Kae tuh Judah hae Siapharan nynh ka thua a ciku,’ cite zei,” a cipya hae. 22 Pilat nynh, “Ka zei vae paw tuh ka zei thyhte um sah,” cite a khung hae. 23 Rhawkaw hae nynh Jesu kha vaelantung kya a khiade kou hae te, a boeining hae kha lawkuh hae zah zung pali lang seii hae zah lu kheit ze zung kheit ccite a neeku hae, akaw-angki kha mah a khah hae; tuh-e akaw-angki tuh ahuikunaw a um lei lante alu te alia cia a kua hae paw nynh thua. 24 Tukeiccuze minmin nynh, “E tuh seii nan oh sih, hummou a ccou cih cipaw ny nawlan ccungthydung oh sih,” cite lu kheit te lu kheit a hoku hae. Tuh-e tuh Ccathyaa kyaze,
“Minmin nynh ka boeining hae kha
a neeku hae, ka angki hanlan
ccungthy a dung hae,”
cite a hopaw kha accing nawlan nynh thua. Tuhcite rhawkaw hae nynh a cyi hae.Ref 19.24: Sam 22.18
25 Tuh ccyh lyakhe Jesu a vaelantung pe khe Jesu a nung te a nung neitawnung athuapaw Klopas zu Mary te Mary Magdalin tuh a thadyn hae. 26 Tukeiccuze Jesu nynh a nung te a sungsahpaw a zuitupaw a thadyn hae paw kha he a muih tuh, a nung kha, “Nopinung, khah-e kha na ccapaw,” a cipya. 27 Tukoute a zuitupaw kha, “Khah-e kha na nung,” a cipya. Tuin ccyh kyate tuh-e zuitupaw nynh Jesu nung kha a inn lang a cciakhae.
28 Tukoute Jesu nynh atu tuh pawpaw balyn marya accing vae cipaw nyh zah, Ccathyaa kya a umpaw kha accing nawlan, “Tui ka haw,” a ci.Ref 19.28: Sam 69.21, 22.15 29 Tuin kya misutui ariapaw phe beihpaw lungre zung kheit a um, minmin nynh boeipuepaw kha misutui ariapaw lungkhu lang dung hae zah hyssop ku aran kya heede hae zah Jesu mung kya a nungde hae. 30 Jesu nynh misutui ariapaw kha a neih koute, “Athang vae,” a ci; tukoute a lu ting zah a hy athang.
(Mat 27.45-46; Mar 15.33-41; Luk 23.44-49)
31 Tuin nin tuh Paccynku nin thua zah awkhualan sabbath nin tuh alesaepaw nin athua keiccuze, Judah hae nynh michi rhua hae kha sabbath nin kya vaelantung kyakhe phang a um vae khyh ccaw cite, mih ccu hae kha khya khylan te mih rhua hae kha law khylan Pilat kha a ngia hae. 32 Rhawkaw hae nynh oun thua hae zah Jesu ryte vaelantung kya a khiadekheih hae paw lukheitpaw ccu te ccangpaw lukheitpaw ccu kha a khya hae. 33 Thuasalama minmin nynh Jesu kya a thua hae tuh, a chih vae cipaw nyh hae zah a ccu kha khya vae khyh hae. 34 Thuasalama rhawkawpaw lu kheit nynh a naw kha ccoi te thuing zah chii te tui palou apou. 35 (Tuh-e konglang tuh na zyn nawlan oh a muihtupaw nynh ccaekia a khan. A ccaekia tuh hme zah byaccing nynh ka ho cipaw a nyku). 36 Hynhte acyikupaw hynh Ccathyaa nynh, “A ru ccangkheit sanmah khya thua lan khyh,” a cipaw kha accing nawlan nynh thua.Ref 19.36: Exo 12.46; Nam 9.12; Sam 34.20 37 Ccangpaw Ccathyaa nynh, “Mimaw nynh a thuing hae paw ccungccapaw kha minmin nynh a do cih hae,” bua a ci.Ref 19.37: Zek 12.10; Bya 1.7
Jesu Rhua Ccynaw
(Mat 27.57-61; Mar 15.42-47; Luk 23.50-56)
38 Tukoute Judah hae raw a ri keiccuze aruh lante Jesu zuitu athuapaw, Arimathea khuapaw Josef nynh Jesu rhua kha lawku lan Pilat kalan ngiakuh zah Pilat nynh a ua. Tukeiccuze aning nynh cceih zah Jesu rhua kha a lawku. 39 Khuazi kya Jesu kalan a cceih boi paw Nikodemu mah pound za kheit loukaw aripaw mura te aloe apydekuhpaw mynkhuhpaw kha yn ccyng zah tuhlang yn thuabua.Ref 19.39: Joh 3.1-2 40 Minmin nynh Jesu rhua kha lah hae zah Judah hae michi ccynaw phung thyhte, mynkhuhpaw ryte nebaleihpaw boei rawpaw te a rhua kha a lung hae. 41 Vaelantung kya a khiadenaw hae hmin kya khokhu ccangkheit um zah, tuin kyakhe ccungccaw lu kheit san a ccynaw boi lei hae paw shaw thawpaw a um. 42 Judah hae Paccynku nin athua keiccuze anaenaw umpaw tuh-e shaw kyakhe Jesu rhua kha a ccy hae.