16
1 “Nae zynnaw kyate na khuliaku khyh nawlan oh hynh-e bya hynh kae hopya oh.
2 Minmin nynh nanning kha sinakok kyate ae dee cih oh; nanning ae theih oh paw ccungccaw nynh Pachia rya nynh ka law cite a tuaku ccyh tuh yn thua vae cih.
3 Ka Paaw te kae hynh oun ny khyh hae keiccuze tuhcite oun cyih cih hae.
4 Thuasalama accyh he yn thua te, hynh-e hae kong hynh phe kae hopya vae oh cipaw na liathui nawlan oh hynh-e hae hynh kae hopya vae oh.
Thyaa Muisaw Ryalawnaw
“Nae kya ka um keiccuze hynh-e hynh atakaw te kae hopah khyh oh.
5 Thuasalama atu tuh kae yn sawtupaw kalan ka cceih vae cih; nanning lakuze hum nynh sanmah, ‘Teilangmou na cceih cih?’ cite nae khia khyh oh.
6 E konglang hynh kae hopya vae oh keiccuze nae thinlung kya ngaethyanaw phe abeih.
7 Tuhzemah byaccing kha kae hopya oh: nanning thanenaw hanlan ka la cceih cih; pawccecize kae nynh ka ccia khyh ze nae kalan Bawmtu yn thua lan khyh; thuasalama ka ccia ze amaw kha nae kalan kae saw cih.
8 Aning he yn thua te, seinaw kong, dingnaw kong te byapianaw kong kha laephi ccungccaw hae kya a nysah cih hae.
9 Kae kha yn zyn khyh hae keiccuze seinaw kong kha a nysah cih hae.
10 Ka Paaw kalan ka cceih cih zah kae hynh nae muih vae lan khyh oh keiccuze dingnaw kong kha a nysah cih hae.
11 E laephi uktupaw tuh byapia athua vae keiccuze byapianaw kong kha a nysah cih.
12 “Nae kya ho lanpaw patae ka hoi ung, thuasalama atu lya tuh na ccykekuh tae lan khyh oh.
13 Tuhzemah byaccing a phytu Muisaw yn thua te, nanning kha byaccing kalan ae cciakhae cih oh, pawccecize amaw kaw te ho lan khyh; thuasalama a thaepaw miakaw kha a ho cih zah yn thua cih paw kong kha ae hopah cih oh.
14 Aning nynh kae kha phu-enaw yn pya cih, pawccecize ka hopaw kha yn lah cih zah nae kya ae hopah cih oh.
15 Paaw nynh a hoipaw balyn tuh ka kya-e cci nynh thua; tukeiccuze, ‘Muisaw nynh ka pyapaw kha a lah cih zah nanning kha ae hopah cih oh,’ cite kae hopya oh.
Ngaethyanaw te Lungtuanaw
16 “Sosoh cihte kae hynh nae muih vae lan khyh oh; te sosoh cihte kae hynh bua nae muih cih oh,” a ci.
17 A zuitu hae abang nynh, “ ‘Sosoh cihte kae hynh nae muih vae lan khyh oh, te sosoh cihte kae hynh bua nae muih cih oh, pawccecize kae tuh ka Paaw kalan ka cceih cih,’ cite aening oun hopyapaw hynh pawmou a ho ry?” cite mimaw te mimaw a hoku hae.
18 Tukeiccuze minmin nynh, “Aning nynh, ‘Sosoh cihte,’ cipaw hynh pawmou a ho ry? A ho rypaw hynh ah nyh khyh oh rei,” a ci hae.
19 Minmin nynh amaw kha byakhia a ry hae cipaw Jesu nynh nyh zah minmin kha, “Sosoh cihte kae hynh nae muih vae lan khyh oh, te sosoh cihte kae hynh bua nae muih cih oh, cite ka hopaw tou naemaw te naemaw na khiaku oh?
20 Byaccaccing kae hopya oh, nanning tuh nae rah nae khui cih oh, thuasalama laephi tuh a lungtua cih; nanning tuh nae ngaethah cih, thuasalama nae ngaethyanaw tuh lungtuanaw lang yn tang cih.
21 Nopinung tuh a ccyh zaw zah neitangia a cci keiccuze a ngaethah, thuasalama imua ccahe yn pui vae tetuh a vawsawnaw kha liathui vae khyh, pawccecize laephi vawlan ccungccaw lu kheit yn pui zah a lungtua keiccu nynh thua.
22 Tuhawte nanning mah atu ngaethyanaw na hoi oh; thuasalama nanning kha bua kae muih cih oh zah nae lung oun tua cih, nae lungtuanaw kha hum nynh san ae lua vae lan khyh oh.
23 Tuin nin kya tuh kae hynh pawsang nae khia vae lan khyh oh. Byaccaccing kae hopya oh, ka min te ka Paaw kalan na ngiaku oh paw miakaw kha aning nynh ae pya cih oh.
24 Atu cia ka min te pawsang na ngia loh khyh oh, nae lungtuanaw accing nawlan ngia oh lah na mue cih oh.
Laephi Ka Tae Vae
25 “E konglang hynh tousenaw bya te nynh kae hopya oh; thuasalama tousenaw bya mang leite, ka Paaw kong kha ccaerarih lan kae hopya oh ccyh yn thua cih.
26 Tuin nin kya tuh ka min te nae ngia cih oh; ka Paaw kalan nanning ccelang kae ngiapah cih oh cite kae hopah khyh oh;
27 pawccecize kae kha nae sungsah oh zah, Pachia kyate nynh kae thua cipaw kha na zyn oh keiccuze ka Paaw amaw ccaccei nynh nanning kha ae sungsah oh.
28 Ka Paaw kyate kae thua zah laephi kalan kae thua vae; tukoute laephi hynh ka cciataw cih zah ka Paaw kalan ka cceih cih,” a cipya hae.
29 A zuitu hae nynh, “Atu tuh tousenaw bya mang leite ccaerarih lan nynh na ho vae!
30 Nang tuh pawpaw balyn na nyh zah hum nynh sanmah byakhia ho vae khyh cipaw atu kae ny vae. Hynh-e liate nang tuh Pachia kyate nynh nae thua cipaw kaening nynh kae zyn,” a cipya hae.
31 Jesu nynh minmin kha, “Atu na zyn oh tou?
32 Nae balynte nae umnaw raveih lang nae phiakuh cih oh zah, ka makhaete nae cciataw oh ccyh yn thua cih, atumaw yn thua vae; tuhzemah kae tuh ka makhae thua khyh, pawccecize ka Paaw nynh kae kha yn umkhae.
33 Nanning nynh kamaw kya daenaw na hoi nawlan oh hynh-e bya hynh kae hopya oh. Nanning nynh laephi kya vawsawnaw na tung cih oh; thuasalama nae rawhoy sah; laephi tuh ka tae vae,” a ci.