14
Jesu tuh Laanpi
1 Jesu nynh, “Lungvawsaw lungriathaete um nan oh, Pachia kha zyn oh lah kae kha mah yn zyn oh.
2 Ka Paaw inn kya umnaw khaan patae a um; a um khyh lanze um khyh cipaw phe kae hopah vae cih oh. Nanning hanlan umnaw paccyn khylan ka la cceih cih.
3 Kae nynh ka cceih zah nanning hanlan umnaw ka paccyn koute, bua kae thua cih zah, nanning mah ka umnaw kya umbua khylan ka kalan kae hoeibua cih oh.
4 Ka cceih cihnaw hmin a thuapaw laanpi kha na ny oh,” a ci.
5 Thomas nynh, “Bawipaw, teilang nynh na cceih cih cipaw kae nyh khyh. Pawtemou laanpi tuh kae nyh kho cih?” a cipya.
6 Jesu nynh, “Kae tuh laanpi, byaccing te hiinnaw nynh ka thua. Kae ka kyate holeite tuh hum sanmah Paaw kalan thua kho khyh.
7 Nanning nynh kae hynh nae ny oh ze, ka Paaw kha mah na nyh cih oh. Atu kyate Paaw kha na nyh oh zah na muih vae oh,” a cipya.
8 Filip nynh, “Bawipaw, Paaw kha kaening oun muihsah lah, kaening hanlan azaw vae,” a cipya.
9 Jesu nynh, “Kae tuh nae kya khaw cia ka um vae, nae nyh loh khyh oh tou, Filip? Humhung zemah kae yn muih vae paw ccungccaw tuh Paaw kha mah a muih vae. Pawccemou, ‘Paaw kha kaening oun muihsah,’ na cipaw tuh?
10 Kae tuh Paaw kya ka um zah Paaw tuh ka kya a um cipaw hynh na zyn khyh tou? Nae kya ka hopaw bya hynh kamaw kaw te ka ho khyh, ka kya a umpaw Paaw nynh amaw rya kha a law.
11 Kae tuh Paaw kya ka um zah Paaw tuh ka kya a um cipaw hynh yn zyn oh, tuhkhyhze mah rya ka lawpaw keiccu hynh yn zyn oh.
12 Byaccaccing kae hopya oh, kae yn zynpaw tuh ka cyipaw ryalaw kha a cyihbua cih; hynh-e hae lae alepaw ryalaw kha mah a lah cih; pawccecize kae tuh ka Paaw kalan ka cceih cih.
13 Paaw tuh Ccapaw liate a phu-e nawlan ka min te nae ngia oh paw miakaw kha kae cyipah cih oh.
14 Nanning nynh ka min te ccangkhakheit nae ngia oh ze, nae ngia oh paw kha kae cyipah cih oh.
Thyaa Muisaw Byakinpyakunaw
15 “Kae hynh nae sungsah oh ze ka kawbya hae kha na zui cih oh.
16 Kae nynh Paaw kha ka ngia cih zah nae kya zungzae a um cih paw ccangpaw Bawmtu kha ae pya cih oh.
17 Aning tuh byaccing nysahtupaw Muisaw nynh thua, tuh-e Muisaw tuh laephi nynh ccou kho khyh, pawccecize amaw kha muih khyh zah nyh khyh. thuasalama nanning nynh amaw kha na ny oh, pawccecize aning tuh nae kya tyn zah nae kya a um cih.
18 “Ngawraw hae hawte kae cciataw lan khyh oh; nae kalan bua kae thua cih.
19 Sosoh acih koute laephi nynh yn muih vae lan khyh, thuasalama nanning nynh tuh nae muih cih oh, kae tuh ka hiin keiccuze nanning mah na hiinbua cih oh.
20 Tuh-e nin kya kae tuh ka Paaw kya ka um zah nanning tuh kamaw kya na um oh paw te kae nynh nae kya ka umpaw kha nae nyh cih oh.
21 Ka kawbya hae kha ccou zah a zuipaw tuh kae yn sungsahpaw nynh thua, kae yn sungsahpaw kha ka Paaw nynh a sungsah cih, kae nynh mah ka sungsah cih zah a kya ka phykuh cih,” a ci.
22 Iskariot athua leipaw, ccangpaw Judas nynh, “Bawipaw, nang tuh laephi ccungccaw hae kya phyku leite pawtemou kaening kya nae phykuh kho cih?” a cipya.
23 Jesu nynh, “Kae yn sungsahpaw tuh ka bya kha a ngae cih; ka Paaw nynh amaw kha a sungsah cih, kaening nynh amaw kalan kae thua cih zah amaw ryte umnaw kae raekuh cih.
24 Kae yn sungsah leipaw nynh tuh ka bya kha ngae khyh, na thae oh paw bya hynh kamaw bya thua khyh, kae yn sawtupaw ka Paaw bya nynh thua.
25 “Nae kya ka um lyaze hynh-e hynh kae hopya vae oh.
26 Thuasalama ka min te Paaw nynh yn saw lanpaw Bawmtu, Thyaa Muisaw nynh pawpaw balyn ae ccangpah cih oh zah kae hopya vae oh paw balyn kha ae nysah thui cih oh.
27 Nae kya daenaw kae cciatawpya oh, ka kya-e daenaw kha kae pya oh; laephi ccungccaw hae nynh a pya hae hawte kae pya khyh oh. Lungvawsaw lungriathaete um nan oh, ri mah rih nan oh.
28 ‘Ka la cceih cih zah nae kalan bua kae thua cih,’ cite kae hopya oh paw kha phe na thae vae oh. Nae sungsah oh ze, Paaw kalan ka ccia lanpaw hynh nae lungtua cih; pawccecize ka Paaw tuh kae laeze a lesaehua.
29 Tuh-e he yn cyihkuh te na zyn nawlan oh, tuh-e acyiku maw atu kae hopya vae oh.
30 Nae kya bya patae ka ho vae lan khyh, pawccecize hynh-e laephi uktupaw tuh yn thua vae cih, tuhzemah aning nynh ka tungvaw kya pawsang mah kaw hoi khyh.
31 Thuasalama kae nynh Paaw kha ka sungsah cipaw laephi nynh a ny nawlan Paaw nynh kaw yn pya thyhawte kae nynh ka cyi. Thokuh oh, hein kyate cceih ccavae oh sih.