13
A Zuitu hae Ccu A Sing
Kawtaw Poi a thua mawkhe, Jesu nynh e laephi kyate Paaw kalan a ccianaw ccyh azaw vae cipaw a ny; laephi vawlan a um hae paw a ccungccaw hae kha sungsah hae zah athangnaw cia a sungsah hae. Zete zerya a mang lya hae khe, Satan nynh Simon ccapaw Judas Iskariot thinlung kyakhe Jesu phee lanpaw kha phe a sang vae. Paaw nynh pawpaw balyn kha a kuih lungkhu lang marya a pya vae cipaw kha thuasah, aning tuh Pachia kyate yn thua zah Pachia kalan bua a ccia lanpaw kha thuasah Jesu nynh a ny. Tukeiccuze ccaboi kyate thokuh zah a angkile kha a khahku, te pavua kha lawkuh zah a cce kya a voiku. Tukoute tui kha pakepi lungkhu lang ccae zah a zuitu hae ccu kha a singpya hae, te a cce kya a voikupaw pavua khate a hupya hae. Simon Peter kya he a thua tuh, Peter nynh, “Bawipaw, ka ccu nae sing cih tou?” a ci. Jesu nynh, “Ka cyipaw hynh atu na nyh khyh, thuasalama nyalang nae nyh cih,” a cipya. Peter nynh, “Ka ccu tuh kharouh nae sing lan khyh,” a cipya. Jesu nynh, “Na ccu kae sing khyh ze, nang tuh kae te na sekuh bua lan khyh,” a cipya. Simon Peter nynh, “Bawipaw, ka ccu kyalya thua leite ka kuih te ka lu mah yn singbia!” a cipya. 10 Jesu nynh, “Tui a singkuh vae paw tuh pong thyaa vae zah a ccu kyalya nynh sing aho vae; nanning tuh na thyaa vae oh, thuasalama nae balynte tuh na thyaa khyh oh,” a cipya. 11 Pawccecize hum nynh yn phee cih cipaw phe a ny vae; tukeiccuze, “Nae balynte tuh na thyaa khyh oh,” a ci.
12 Mih ccu kha a sing kou hae te, a angkile kha kikuh zah ccaboi kya bua a haung koute, “Nae tungvaw ka cyipaw hynh na nyh oh tou?Ref 13.12-15: Luk 22.27 13 Nanning nynh kae hynh Sazae cite, Bawipaw cite nae ko oh; na ho oh paw tuh akyhpaw nynh thua, pawccecize kae tuh ka thua sasaw. 14 Nae Bawipaw te nae Sazaepaw mang ka thua pite, nae ccu kha kae singpya oh ze, nanning mah lu kheit te lu kheit nae ccu na singpyaku oh aho. 15 Pawccecize nae tungvaw ka cyi hawte nanning nynh mah na cyibua oh ccaw cite dosuinku lanpaw kha kae cyipya vae oh. 16 Byaccaccing kae hopya oh, see tuh a bawipaw laeze lehua khyh, sawpaw ccungccaw mah a sawtupaw laeze lehua khyh.Ref 13.16: Mat 10.24; Luk 6.40; Joh 15.20 17 E uccaw hae hynh na nyh oh zah na cyi oh ze, nanning tuh lungtuapaw nynh na thua oh. 18 Nae balynte asekuh lante ka ho khyh, ka po hae paw kha ka ny hae, thuasalama Ccathyaa nynh, ‘Ka looh a aepaw nynh kae kha rawsete a ccu yn hangnua vae,’ a cipaw kha accing nawlan nynh thua.Ref 13.18: Sam 41.9 19 Tuh-e tuh he yn cyihkuh te, kae tuh aning nynh ka thua cipaw nae zyn nawlan oh, tuh-e acyiku maw atu kae hopya oh. 20 Byaccaccing kae hopya oh, humhung zemah ka sawpaw ccungccaw kha leh a khanpaw tuh kae kha leh yn khanpaw nynh thua; kae kha leh yn khanpaw ccungccaw tuh kae yn sawtupaw kha leh a khanpaw nynh thua,” a cipya hae.Ref 13.20: Mat 10.40; Mar 9.37; Luk 9.48, 10.16
A Phee lan hae paw A Hoty
(Mat 26.20-25; Mar 14.17-21; Luk 22.21-23)
21 Jesu nynh tuhte a ho koute a lungvawsaw zah, “Byaccaccing kae hopya oh, nanning laku e lu kheit nynh kae hynh yn phee cih,” a ci. 22 Hum nynh a honuathe cipaw kha zuitu hae nynh phe ria lan nyh khyh hae zah lu kheit te lu kheit a dokuh hae. 23 Zuitu hae kyaze Jesu nynh a sungsahpaw lukheitpaw tuh Jesu by vaw kya a ngeikuh. 24 Tukeiccuze hummou a honuathe cipaw kha a khia ccaw cite Simon Peter nynh tuh-e paw tuh a kuih te a tangpya. 25 Jesu by vaw kya a ngeikuhpaw nynh, “Bawipaw, tuh-e paw tuh hummou athua?” cite Jesu kha a khia. 26 Jesu nynh, “Aning tuh sanlou paekia kha pake lungkhu moh ka dung cih zah ka pyapaw kha nynh athua,” cite a khung. Te sanlou paekia kha moh a dung koute Simon ccapaw Judas Iskariot kha a pya. 27 Judas nynh sanlou paekia kha a lawkuh koute Satan tuh a lungkhu lang a tee vae. Jesu nynh, “Na cyi lanpaw kha arangte cyih ccavae,” a cipya. 28 Pawkeiccumou Judas kha tuhte a hopya cipaw tuh ccaboi kya a haung hae paw lu kheit nynh sanmah nyh khyh hae. 29 Judas Iskariot tuh phuabu ccytu athua keiccuze Jesu nynh poi kya aening hanlan ahopaw re lan nynh a naw cih, tuhkhyhze ryachi hae kha uccaw hankhakheit pya lan nynh a naw cih, cite abang nynh a tua hae. 30 Judas Iskariot tuh sanlou paekia kha he a lawkuh koute vaekheihmawte po a pou; tuh lya tuh khuazi nynh thua.
Kawbya Thawpaw
31 Tuhte Judas he a pou tuh Jesu nynh, “Atu Ccungccaw Ccapaw tuh phu-esah thua vae zah Pachia mah amaw liate phu-esah athua vae. 32 Aning liate Pachia tuh phu-esah athua ze, Pachia nynh mah amaw liate Ccungccaw Ccapaw kha a phu-esah cih zah, aro mawze a phu-esah cih. 33 Ka ccaaw hae, nae kya sosoh kyalya nynh ka um vae cih. Nanning nynh kae kha nae ccung cih oh; Judah hae kha, ‘Ka ccianaw lang na cceih kho lan khyh oh,’ cite ka hopya hae hawte, atu nanning mah kae hopya oh.Ref 13.33: Joh 7.34 34 Kawbya thawpaw kae pya oh: lu kheit te lu kheit sungsakuh oh. Kae nynh kae sungsah oh hawte nanning mah lu kheit te lu kheit sungsakuh oh.Ref 13.34: Joh 15.12, 17; 1 Joh 3.23; 2 Joh 5 35 Lu kheit te lu kheit sungsakunaw na hoi oh ze, tuh-e sungsakunaw liate ccungccaw hae balyn nynh nanning tuh ka zuitu hae cipaw ae nyh cih oh,” a cipya hae.
Peter nynh A Vua lanpaw A Hoty
(Mat 26.31-35; Mar 14.27-31; Luk 22.31-34)
36 Simon Peter nynh, “Bawipaw, teilangmou na cceih cih?” cite a khia. Jesu nynh, “Ka ccianaw lang tuh atu nae zui kho lan khyh, thuasalama nyalang nae zui cih,” cite a khung. 37 Peter nynh, “Bawipaw, pawccemou atu kae zui kho khyh? Na hanlan ka hiinnaw ka pyakuh cih,” a cipya. 38 Jesu nynh, “Ka hanlan na hiinnaw na pyakuh cih tou? Byaccaccing kae hopya, aw a khua mawze vae thum nae vua cih,” a cipya.