10
Kae tuh Tuurin Hoypaw
1 Jesu nynh, “Byaccaccing kae hopya oh, tuukhia lungkhu lang sakoih kyate tee leite, ccangpaw kyate kae zah a teepaw tuh miruh te damiah nynh thua.
2 Sakoih kyate a teepaw tuh tuu hae a rintu nynh thua.
3 Tuh-e paw tuh sakoih a ngawpaw nynh sakoih hungpah zah tuu hae nynh a roi kha a syntaw hae. A tuu hae kha mih min te ko hae zah a poukhae hae.
4 A tuu hae balyn kha he a poukhae hae ze, mih malang khe cciapah hae zah tuu hae nynh a zui hae, pawccecize a roi kha a syntaw hae.
5 Miccangpaw kha zui lan khyh hae, a roi kha a ny khyh hae keiccuze a ccuetaw cih hae,” a ci.
6 E tousenaw hynh Jesu nynh a hopya hae, thuasalama a hopya hae paw kha minmin nynh thaethya khyh hae.
7 Tukeiccuze Jesu nynh bua hopah hae zah, “Byaccaccing kae hopya oh, kae tuh tuu hae teenaw sakoih nynh ka thua.
8 Ka malang oun thuaty hae paw balyn tuh miruh hae te damiah hae nynh thua hae, tuu hae nynh mih roi kha ngaepah khyh hae.
9 Kae tuh sakoih nynh ka thua. Humhung zemah ka kyate a teepaw tuh khum athua cih; aning tuh a tee a pou cih zah rampaeenaw kha a muihkuh cih.
10 Miruh tuh ru khylan, chia khylan te syro khylan rou nynh yn thua. Kae tuh hiinnaw hoi hae zah, tuh-e hiinnaw tuh phe ccing lan a hoi nawlan hae nynh kae thua.
11 “Kae tuh tuurin hoypaw nynh ka thua. Tuurin hoypaw nynh tuh a hiinnaw kha tuu hae hanlan a pyaku.
12 Tuurintu athua leipaw, tuu mah a hoi leipaw, hohpaw ccungccaw nynh tuh suizaw yn thuapaw kha a muih ze, tuu hae kha cciataw zah phe a ccuetaw; suizaw nynh tuu hae kha kyng hae zah pong a phiasaku hae.
13 Hohpaw ccungccaw nynh tuh hohpaw athua keiccuze tuu hae kha peki leite a ccuetaw hae.
14 Kae tuh tuurin hoypaw nynh ka thua. Ka tuu hae kha ka nyh zah ka tuu hae nynh mah yn ny hae.
15 Ka Paaw nynh kae kha yn ny hawte, kae nynh mah ka Paaw kha ka ny. Ka hiinnaw kha tuu hae hanlan ka pyaku.Ref 10.15: Mat 11.27; Luk 10.22
16 E tuukhia kya a umbua leipaw ccangpaw tuu hae kha ka hoi, minmin kha mah ka cciakhae cih hae zah ka roi kha a ngae cih hae; tuurin lu kheit zakaw kya tuuphu phu kheit lang oun tang cih hae.
17 Ka hiinnaw kha ka pyakuh zah ka hiinnaw kha bua ka lawkuh cih keiccuze ka Paaw nynh kae kha yn sungsah.
18 Hum nynh san tuh-e hiinnaw tuh ka kyate lah kho khyh, tuh-e tuh kamaw lungthote ka pyaku. Ka hiinnaw pyakunaw kaw ka hoi zah lawthuinaw kaw mah ka hoi. Tuh-e kaw tuh ka Paaw kyate nynh ka mue,” a ci.
19 Hynh-e bya keiccuze Judah hae laku phiakunaw bua a um.
20 Minmin lakuze ccungccaw patae nynh, “Aning tuh raerangsaro bahkuh zah a ngaee vae, pawccemou a bya kha na ngae oh?” a ci hae.
21 Abang nynh, “E bya tuh raerangsaro bahkuhpaw bya thua khyh, raerangsaro nynh mitmohpaw mit kha a awsah kho cih tou?” a ci hae.
Judah hae nynh A Vua hae
22 Khuaccih ccyh lyakhe Jerusalem kya beikinn apnaw poi um zah,
23 Jesu tuh beikinn voidu lungkhu Solomon saeleih dawkuhpaw kya a cceih.
24 Judah hae nynh Jesu kha koihlu hae zah, “Hohseciamou kaening hynh lunghiinnaw nae hoisah ung cih? Messiah na thua ze ccaerarih lan oun hopah,” a ci hae.
25 Jesu nynh, “Phe kae hopya vae oh, thuasalama na zyn khyh oh; ka Paaw min te ka lawpaw ryalaw hae nynh kamaw kong kha ccaekia a khan hae.
26 Thuasalama nanning tuh ka tuu hae na thua khyh oh keiccuze na zyn khyh oh.
27 Ka tuu hae nynh ka roi kha a thae hae. Minmin kha ka nyh hae zah minmin nynh kae kha yn zui hae.
28 Minmin kha zungzae hiinnaw ka pya hae zah, minmin tuh papin chih vae lan khyh hae. Hum nynh sanmah minmin kha ka kuih kyate yn lua kho vae lan khyh.
29 Minmin kha ka kalan yn pyatupaw ka Paaw tuh pawpaw balyn laeze a lesaehua; hum nynh sanmah minmin kha ka Paaw kuih kyate lua kho lan khyh.
30 Kae te ka Paaw tuh ccangkheit nynh kae thua,” a ci.
31 Judah hae nynh amaw kha deih lan cite lung kha bua a khuinnuaku hae.
32 Jesu nynh, “Ka Paaw kya-e ahoypaw ryalaw patae kha phe kae langsahpya vae oh, tuh-e hae kyaze pawtecihpaw ryalaw keiccu mou lung te deih lan nae ry oh?” cite a khung hae.
33 Judah hae nynh, “Ahoypaw ryalaw keiccu lung te kae deih lan khyh, nang tuh ccungccaw huataw mang na thua pite Pachia lang na riakuh zah Pachia thethya na ho keiccu nynh lung te kae deih cih,” a ci hae.Ref 10.33: Lev 24.16
34 Jesu nynh minmin kha, “Nae kawbya ccauh kyaze, ‘Nanning tuh pachia hae nynh na thua oh, ka ci,’ cite zeikuh khyh tou?Ref 10.34: Sam 82.6
35 Pachia bya nynh a thuanua hae paw kha ‘pachia hae’ cite ko athua hae ze thuasah, Ccathyaa kha vua kho athua khyh ze thuasah,
36 Paaw nynh a thyaasah vae paw te laephi vawlan a saw vae paw kae nynh, ‘Pachia Ccapaw nynh ka thua,’ ka ci keiccuze nanning nynh kae kha, ‘Pachia saryanaw bya na ho,’ cite pawtemou na ho kho oh?
37 Ka Paaw ryalaw kha ka law khyh ze, yn zyn nan oh.
38 Thuasalama ka law lanze, kamaw hynh nae zyn khyh oh zemah ka ryalaw hae kha zyn oh; tuhteze nynh Paaw tuh ka kya um zah kae mah amaw kya ka um cipaw kha na nyh cih oh zah na thaethya cih oh,” a ci.
39 Tukeiccuze Jesu kha kyng lan bua a zuaku hae, thuasalama mih kuih kyate phe a lue.
40 Jesu tuh Jordan vaw khuraw lang, Johan nynh baptisma a pyanaw langkhe bua cceih zah tuin kya a um.Ref 10.40: Joh 1.28
41 Ccungccaw patae nynh amaw kalan oun cceih hae zah, “Johan nynh muihsahnaw a langsaku khyh zemah, hynh-e ccungccapaw konglang a hopaw balyn tuh marya ahme,” a ci hae.
42 Tuin kyakhe ccungccaw patae nynh amaw kha a zyn hae.