4
Laephi te Vaeccawkunaw
1 Nanning laku rhawtukkunaw te pekunaw tuh paw kyate mou oun thua hae? Nae pyn kya-e hae kya rhaw a tukkuh hae paw nae pynsaw hoysahnaw kyate oun thua khyh hae tou?
2 Na ry oh zah na hoi khyh oh keiccu ccungccaw na chia oh. Na duaa oh zah na mue khyh oh; tukeiccuze na buakuh oh zah rhaw na tukkuh oh. Na ngia khyh oh keiccu na mue khyh oh.
3 Na ngia oh zemah na mue khyh oh; pawccecize naemaw hoysahnaw kya mang khylan na ngiasei oh.
4 Zyn lan um leipaw ccungccaw hae! Laephi te vaeccawkunaw tuh Pachia ryte rhawkunaw nynh thua cipaw kha na nyh khyh oh tou? Tukeiccuze laephi te ruiban lang a tang rypaw tuh Pachia rhawpaw lang a raekuhpaw nynh thua.
5 “Pachia nynh aening lungkhu a nungpaw muisaw tuh a eiungpaw rynaw te phe abeih,” cite Ccathyaa nynh a hopaw hynh accakaepaw nynh thua cite tou na tua oh?
6 Thuasalama Pachia nynh houh ale huapaw thawccinaw kha oun pya. Tukeiccuze,
“Pachia tuh a lysakuh hae paw kha
rawse hae zah,
zakawsangsakuh hae paw kha
thaw a cci hae,” a ci.Ref 4.6: Ptb 3.34 (LXX)
7 Tukeiccuze Pachia rynaw kha zui oh. Satan kha dou oh lah, nanning kha ae ccuetaw cih oh.
8 Pachia kalan naekuh oh lah, aning mah nae kalan a naekuh cih. Misei hae, nae kuih kha ccikankuh oh, thinlung aphei hae paw, nae thinlung kha thyaasakuh oh.
9 Ngaethyate um oh, rawkhuite um oh lah rah oh. Nae nuinthuanaw kha rawkhuinaw lang tang sah oh lah, nae lungtuanaw kha ngaethyanaw lang tang sah oh.
10 Bawipaw malang zakawsangsakuh oh lah, aning nynh ae hangthung cih oh.
Na Uno kha Byapia Nan
11 Uteno hae, lu kheit te lu kheit thethya hokuh nan oh. A uno kha thethya ho zah bya a piapaw ccungccaw tuh kawbya kha thethya ho zah bya a piatu nynh thua. Nang nynh kawbya kha bya na pia ze, nang tuh kawbya a zuipaw thua leite bya a piatupaw nynh na thua.
12 Kawbya pyatu te byapiatu lu kheit kyalya um zah, aning tuh a khum khopaw te a roh khopaw nynh thua. Mingccangpaw kha bya a piatupaw nang tuh hummou na thua?
Awkhualan hanlan Pookunaw
13 “Atunin athua khyhze awkhualan kya tuhcihawpaw khahcihawpaw khua lang ccia lan zah tuin kya kum kheit um lan, kungku lan zah amia mue lan,” cite a ho hae paw nanning, atu ngaetua oh!Ref 4.13-14: Ptb 27.1
14 Awkhualan pawmou yn cyihkuh cih cipaw na nyh khyh oh. Nae hiinnaw tuh pawmou athua? Nanning tuh sosoh a langkuh koute phe avaepaw tuihu nynh na thua oh.
15 “Bawipaw nynh a ry lanze, aening ah hiin cih oh zah, hynh-e khyhze tuh-e tuh ah cyih cih oh,” cite nynh na ho lan oh accan.
16 Thuasalama atu nanning tuh na lysakuh oh zah na pookuh oh; khahcihawpaw pookunaw balyn tuh ahoy leipaw nynh thua.
17 Tukeiccuze ahoypaw cyi lanpaw kha nyh zah a cyih leipaw tuh misei nynh thua.