3
Munglae Sungkunaw
Ka u te ka neitaw hae, sazae kae thuapaw kaening tuh aru huapaw byapianaw kha kae mue cih cipaw nyte, ccangpahtu lang patae la tang nan oh. Pawccecize aening balyn tuh patae ah mesei oh. Bya a honaw kya a mesei leipaw ccungccaw tuh a pyn balyn kha a taekuh khopaw thua zah accingpaw nynh thua. Marang hae nynh aening kaw a ngae ccaw hae cite mih mung kya rangtei ah teisah oh zah, mih pyn balyn kha ah mae kho oh. Sanphalung hae kha mah dotua oh, myarya le hae zah khisan arupaw nynh a mung kho zemah a mawngtupaw nynh ditaripaw maenawpaw khate a rynaw langkhe a mae.
Tuhawte lae tuh pyn kya-e ditaripaw athua zemah myarya a pookuh thya. Maee-ia taraw nynh myarya akopaw loram kha a u kho cipaw tuatua oh! Lae tuh maee nynh thua. Lae tuh pyn kya-e hae kyaze hoyleinaw asueluakunaw thua zah, pyn balyn kha a thusah; ccungccaw hiinnaw balyn kha phe ccung lan u zah, amaw kha mah hell maee nynh a u. Pawccecize ramsaw phuin miakaw, pavaw phuin, vue te a vawpaw phuin, rili kya umpaw ngasaw phuin kha ngaesah kho thua zah ccungccaw hae nynh phe a la ngaesah hae. Thuasalama lae tuh hum nynh sanmah ngaesah kho khyh, uk kho leipaw athahpaw uccaw thua zah, a chisah khopaw asy te nynh phe abia. Tuh-e lae te ah Paaw Pachia kha the ah hoysah oh; Pachia muinsan alo lante raepaw ccungccaw hae kha tuh-e lae te thya ah law oh.Ref 3.9: Gen 1.26 10 Khalang ccangkheit kyate hythuanaw te thyalawnaw kha yn pou. Ka u te ka neitaw hae, tuhte cyiku lan ccan khyh. 11 Tuidy ccangkheit kyate tui epaw te tui khahpaw a pou boi tou? 12 Ka u te ka neitaw hae, thaeku ku nynh oliv thae kha athae kho tou? Misu ku nynh thaeku thae kha athae kho tou? Tuhawte loituipaw nynh tuithuapaw kha pousah boi khyh.
Hawnaw Phuin Ning
13 Nanning laku a hawpaw te a thaethyapaw hummou a um? Aning nynh hawnaw kya-e lungnenaw te ahoypaw a hiinnaw khate a ryalaw kha langsakuh sah. 14 Thuasalama nae thinlung kya akhahpaw eiungnaw te karankunaw na hoi oh ze, pookuh nan oh lah byaccing kha rawsete hyn nan oh. 15 Tuh-e hawnaw tuh luki langte yn thuapaw thua khyh, laephi hawnaw, pynsaw hawnaw te Satan hawnaw nynh thua. 16 Pawccecize eiungnaw te karankunaw a umnaw tuh keisukeilae umnaw te hoyleinaw aphuinphuin a um. 17 Thuasalama luki langte yn thuapaw hawnaw tuh masaty lan thyaararih, tukoute ccawkunaw te lungnenaw um zah soih lan azoi, ngaethyaumsahnaw te ahoypaw athae khate phe abeih, laesahkunaw te cyiruhnaw um khyh. 18 Ccawkunaw a raetu hae nynh dingnaw ccacii kha daenaw te a vua hae.