JOEL
Joel
Profeh Joel konglang hynh beihtaraw kyalya ny thua zah, hohtuh ccyh kya mou a hiin cipaw sanmah ccaethya khyh. Thuasalama e ccauh hynh Persia accozah she lya BC 500 khyhze BC 400 loukaw kya nynh a zei hae paw alo. Tungkhipaw nynh ri lan um lante Palestin ram a ropaw kong thuasah, khuaa sya rah khyh zah pawpaw balyn aroupaw kong thuasah Joel nynh a ho. E acyihkuhpaw hae hynh yn thua cih paw Bawipaw nin kong muihsahnaw cite thuasah, Bawipaw rynaw adingpaw kha a rawse hae paw tungvaw detahnaw ccyh cite thuasah Joel nynh a muih. Bawipaw nynh ccungccaw hae kha ngaesikuh oh lah, hythuanaw kae pyathui cih oh cite bya a kinpyaku hae paw kha Joel nynh ccungccaw hae kha a hopya hae. Syntawku lanpaw ccangkheit tuh, Pachia nynh nopi pise, adih ale ccungccaw balyn tungvaw kya a Muisaw kha a saw cih cipaw byakinpyakunaw nynh thua.
1
1 Pethuel ccapaw Joel kalan yn thuapaw Bawipaw bya:
Ram Ro keiccu Rawnaw
2 Pou piccan hae, e hynh thaetua oh,
ram kya um hae paw balyn,
nae nakaring te ngaetua oh!
E tahawpaw uccaw hynh
nae she kya acyihkuh boi vae tou?
Nae minpaaw hae she kya so
acyihkuh boi vae tou?
3 E konglang hynh
nae ccaaw hae kha hopah oh,
nae ccaaw hae nynh
mih ccaaw hae kha hopah hae sah,
mih ccaaw hae nynh
ccangpaw she kya-e hae kha
4 Tungkhipaw alepaw nynh
a ae bangpaw alaepaw kha
tungkhipaw aphu nynh a ae.
Tungkhipaw aphu nynh
a ae bangpaw alaepaw kha
tungkhipaw adihpaw nynh a ae,
tungkhipaw adihpaw nynh
a ae bangpaw alaepaw kha
ro a mangpaw tungkhipaw nynh a ae.
5 A zu a ae hae paw nanning,
nae inaw kyate thokuh oh lah,
rawtua oh; misutui alawe lan
a neih hae paw miakaw balyn,
emamiapaw misutui kha
nae mung kyate
thoh phia athua vae keiccuze
rawkhuite um oh.
6 Pawccecize athawsae zah
riatae um lei hae paw minphuin nynh
ka ram kha a thiing vae;Ref 1.6: Bya 9.8
tuh-e minphuin a haw tuh
chindeih haw hawte thua zah,
a nua tuh chindeih pinung
anua hawte nynh thua.
7 Tuh-e minphuin nynh
ka misu khokhu kha roh zah,
ka thaeku aku hae kha a khya;
akaloh kha kia zah a vua;
a karan hae tuh pong araw hae.
8 A zawthaw lya-e a vawpaw hanlan
buriboei a zingkuhpaw
liaccady hawte rawkhuitua oh.
9 Bawipaw inn kya
pya lanpaw ccathae te
misutui um khyh.
Bawipaw ryalahtu hae,
ranpibawi hae tuh
rawkhuite a um hae.
10 Loo hae tuh aroh hae,
laephi tuh rawkhuite a um;
pawccecize ccathae tuh aroh,
misutui tuh arou,
11 Loopho hae nanning,
nae bungzou sah, misu khokhu
do-oihtu hae nanning,
rawkhuite um oh,
pawccecize chanvuih, barli te
loo kya-e ruepaw
ccathae hae tuh aroh hae.
12 Misu ku tuh naan zah
thaeku ku tuh arou.
Ccalee thae, ungcci ku te epal—
loo kya-e thingku balyn tuh
pong arou hae; ccungccaw hae
mih lungtuanaw tuh
azo ccaccing.
Ngaesiku lan Hyynaw
13 Ranpibawi hae nanning,
buriboei kha zingkute rawkhuitua oh;
silawhang kya ryalahtu hae nanning,
rawkhuite umtua oh.
Ka Pachia rya a lahtu hae nanning,
rang oh lah, buri boeining lawkute
khuazi ccyh kha liasah oh!
Nae Pachia inn kya pya lanpaw
ccathae te misutui um khyh.
14 Looh-aesung ccyh kha thaesah oh,
athyaapaw pumkunaw kha rae oh.
Piccan hae te ram lungkhu
a um hae paw balyn kha
Bawipaw nae Pachia inn lang
suelua oh lah,
15 Tuh-e nin hanlan ngaethya lan kou um!Ref 1.15: Isa 13.6
Pawccecize tuh-e Bawipaw nin tuh anae vae,
tuh-e nin tuh Athunghuapaw kya-e
ronaw hawte yn thua cih.
16 Aening ah muihnaw oh kya maw
looh tuh phe athang khaw?
Ah Pachia inn kya lungtuanaw te
lungpawnaw um vae khyh khaw?
17 Laephi aroupaw kya ccacii tuh aroh,
uccaw ccakhungnaw inn hae tuh aroh hae,
looh a um khyh keiccuze
ccung-inn hae tuh aroh hae.
18 Sarangpaw hae tuh a hawkhaekuh hae!
Sahiin hae tuh rampaeekunaw
a um khyh keiccuze a khiavuikuh hae;
tuuphu hae mah a teing hae.
19 Pou Bawipaw , nang kha
thawte kae ko.
Pawccecize ramkaw e sahiin hae
rampaeekunaw hae kha
maee nynh a u vae,
ramkaw e thingku balyn tuh
maeesoi nynh a u vae.
20 Tuinaw hae tuh arou hae keiccuze
loramsaw hae heize
na kalan a sia hae,
ramkaw e sahiin hae
rampaeekunaw hae tuh