9
Abimelek
Jerubbaal ccapaw Abimelek tuh Shekhem khua e a nung puizia hae kalan cceih zah, minmin te a nung puizia hae balyn kyakhe, “Shekhem khua e uktu hae balyn nynh a thaenaw hae kyakhe, ‘Nae hanlan pawmou ahoyhua, Jerubbaal ccapaw hae sung sari nynh mih balynte ae uk oh paw tou, tuhkhyhze lu kheit nynh ae uk oh paw tou?’ cite la khiatua oh. Kae tuh nae ru te nae saw ka thuapaw hynh mah la ning nan oh,” a cipya hae. Tukeiccuze tuh-e bya balyn tuh a nung puizia hae nynh Shekhem khua e uktu hae a thaenaw hae khe Abimelek ccelang a hopya hae; minmin tuh Abimelek nulang zuiku rynaw thinlung a hoi hae, pawccecize minmin nynh, “Abimelek tuh aening uno nynh thua,” a ci hae. Minmin nynh Baal-berith inn lungkhu e ngunphua sung sari kha a pya hae, tuh-e ngunphua tuhte Abimelek nynh a nulang a zuikuh lanpaw ccungccaw, ccungkia leipaw te a hynhu hae paw kha a hoh hae. Ofrah khua umpaw a paaw inn lang cceih zah, Jerubbaal ccapaw hae, a uno hae sung sari kha lungpi ccangkheit vawlan khe a chia hae; thuasalama Jerubbaal a ccasoipaw Jotham tuh zya rekuh zah a hiinhy. Te Shekhem khua e uktu hae balyn te Beth-millo khuaccaaw hae balyn tuh sueluakuh hae zah, Shekhem khua e liathuinawpaw phaesi ku pe khe Abimelek kha siapharan lang a khang hae.
Thingku hae Tousenaw
Tuh-e konglang tuh Jotham kha he a hopah hae tuh, Gerizim Mua dung lang kae zah a thadyn, te thawte sia zah minmin kha, “Shekhem uktu hae, Pachia nynh nae bya ae ngaepya nawlan oh, ka bya hynh ngaetua oh.
Vae kheit tuh thingku hae nynh
mih siapharan lang
chitui thuh khylan cceih hae zah,
oliv ku kha, ‘Kaening hynh oun uk,’
a cipya hae.
Oliv ku nynh minmin kha,
‘Ccungccaw hae te pachia hae kha
sawtuanaw pyanawpaw
ka tho hoypaw hynh cciatawte,
thingku hae kha uk khylan
ka cceih cih aa tou?’ a ci.
10 Te thingku hae nynh thaeku ku kha,
‘Nang nynh yn cceih lah,
kaening hynh oun uk,’ a cipya hae.
11 Thuasalama thaeku ku nynh,
‘Ka enaw te athuapaw
ka thae kha nungsyate,
thingku hae kha uk khylan
ka cceih cih aa tou?’
a cipya hae.
12 Te thingku hae nynh misu ku kha,
‘Nang nynh yn cceih lah,
kaening hynh oun uk,’ a cipya hae.
13 Thuasalama misu ku nynh,
‘Ccungccaw hae te pachia hae kha
mih lungtuasahpaw
ka misutui kha cciatawte
thingku hae kha uk khylan
ka cceih cih aa tou?’ a ci.
14 Tukeiccuze thingku hae
balyn nynh hinpawbu kha,
‘Nang nynh yn cceih lah,
kaening hynh oun uk,’ a cipya hae.
15 Hinpawbu nynh thingku hae kha,
‘Nanning nynh siapharan lang
khang khylan thanccingte
chitui nae thuh oh zetuh,
oun cceih oh lah,
ka mynlyh kaw kya um oh;
thuasalama tuhcite
athua khyh zetuh, hinpawbu kyate
maee yn pou sah lah,
Lebanon kya-e sidar thing hae kha
u hae sah,’ a cipya hae.
16 “Tukeiccuze Abimelek kha siapharan lang khangkute nanning nynh lungzi sawtuate na um oh ze thuasah, Jerubbaal te a puizia hae kha hoyte na ccuepe oh zah, a ryalaw mee thyhte na liaru oh ze thuasah, 17 ka paaw nynh nae hanlan rhaw ae tukpah oh zah, a hiinnaw pyakute Midian hae kuih kyate ae luesah oh; 18 thuasalama atunin nanning nynh ka paaw puizia hae kha na dou oh zah, a ccapaw hae sung sari kha lungpi ccangkheit vawlan na chia oh; te a seenung ccapaw Abimelek tuh nae puizia athua keiccuze Shekhem khuaccaaw hae kya siapharan lang na nung oh. 19 Atunin nanning nynh Jerubbaal te a puizia hae kya lungzi sawtuate na um oh ze, Abimelek tungvaw nae lungtua sah lah, aning nynh mah nae tungvaw a lungtua sah; 20 thuasalama tuhte athua khyh zetuh, Abimelek kyate maee pou sah lah, Shekhem te Beth-millo khuaccaaw hae kha u hae sah; te Shekhem te Beth-millo khuaccaaw hae kyate mah maee pou sah lah, Abimelek kha u sah,” a ci. 21 Te Jotham tuh a uno Abimelek raw a ri keiccuze ccue zah, Beer khua lang cceih zah tuin kya a um.
Abimelek Chinaw
22 Abimelek nynh Israel kha kum thum a uk. 23 Pachia nynh Abimelek te Shekhem khuaccaaw hae laku kya muisaw hoyleipaw kha sawnua hae zah, Shekhem khuaccaaw hae nynh Abimelek tungvaw mih lungzi vae khyh. 24 Tuhte acyikupaw tuh, Jerubbaal ccapaw hae sung sari kha puathote theih hae zah, tuh-e hae chiise tuh a theihtupaw mih uno Abimelek tungvaw thuasah, a uno hae chia khylan thawzung a pya hae paw Shekhem khuaccaaw hae tungvaw thuasah accaw keiccu nynh thua. 25 Abimelek kha buh khylan Shekhem khuaccaaw hae nynh mua dung hae kyakhe ccungccaw nung hae zah, tuh-e hae nynh tuh-e laanpi kya a cceihpaw balyn kha uccaw a luade hae; tuh-e konglang tuh Abimelek kha a hopya hae.
26 Ebed ccapaw Gaal nynh a puizia hae ryte Shekhem khua lang nuekuh zah, Shekhem khuaccaaw hae nynh amaw kha a doliaku hae. 27 Loo lang cceih hae zah mih misu khokhu kya-e misu thae kha pumte su hae zah, poi a tua hae. Mih pachia inn lungkhu lang teete ae hae neih hae zah, Abimelek kha a sarya hae. 28 Ebed ccapaw Gaal nynh, “Kaening Shekhem khuaccaaw hae tuh ahum kae thua zah, Abimelek tuh ahum athua keiccu mou rya kae lawpya lanpaw tuh? Jerubbaal ccapaw te a kuihkaw e bawi Zebul nynh Shekhem paaw Hamor a ccungccaw hae kha ryalawpah khyh hae tou? Pawccemou kaening nynh Abimelek kha rya kae lawpya lanpaw tuh? 29 E ccungccaw hae hynh ka kuihkaw um hae ravo nyn! Tuhte a la thua ze, Abimelek kha ccaring ka dee cih zah, ‘Na rhawkaw hae kha lungsah chih hae lah, yn pou,’ ka ci cih paw,” a ci.
30 Ebed ccapaw Gaal bya kha Shekhem khua uktu Zebul nynh a thae te, a thinrianaw tuh maee lang arua. 31 Aning nynh Abimelek kalan, Arumah langkhe ccungccaw saw zah, “Dotua, Ebed ccapaw Gaal te a puizia hae nynh Shekhem lang oun cceih hae zah, nang kha dou khylan khuaccaaw hae kha a tuhou hae. 32 Tukeiccuze nang te na umkheih oh paw rhawkaw hae nynh khuazi khe cceih oh lah, loo kyakhe buh oh. 33 Awkhua takaw, khuanin thua takaw te, thokuh oh lah, khua kha thiing oh; aning te a umkheih hae paw rhawkaw hae nynh nanning dou khylan he oun pou hae te, na cyi kho thyh oh te na cyih cih oh,” a cipya.
34 Tukeiccuze Abimelek te a rhawkaw hae balyn tuh khuazi khe thokuh hae zah, phu pali lang phiakute Shekhem khua kha a buh hae. 35 Ebed ccapaw Gaal tuh toikuh zah khua koikua teenaw kya he a thadyn te, Abimelek te a umkheih hae paw rhawkaw hae nynh a buhnaw hae kyate a thonuaku hae. 36 Gaal nynh minmin kha he a muih hae te, Zebul kha, “Dotua, mua dung hae kyate ccungccaw hae oun rungbung hae!” a cipya. Te Zebul nynh, “Mua a mynlyh kha nynh ccungccaw hae lang na ria,” a cipya. 37 Gaal nynh bua hopah zah, “Dotua, ram angaelung kyate ccungccaw hae oun rungbung hae, phu kheit tuh Beidinhothya hae paw kya-e Phaesi ku kalan te oun cceih hae,” a cipya. 38 Te Zebul nynh amaw kha, “ ‘Kaening nynh rya kae lawpya lanpaw Abimelek tuh hummou athua?’ cite na hopaw na bya kha atu teimou a um vae. E ccungccaw hae hynh pawlang na ria lei hae paw kha thua khyh hae tou? Atu toikuh lah, tuktua hae,” a cipya. 39 Tukeiccuze Gaal tuh Shekhem khuaccaaw hae malang khe toikuh zah Abimelek te rhaw a tukkuh hae. 40 Abimelek nynh dee zah a malang khe Gaal tuh a ccue; koikua teenaw kyacia ccungccaw patae vaemaw muete a khuliakuh hae. 41 Te Abimelek tuh Arumah kya a um; Zebul nynh Gaal te a puizia hae kha Shekhem khua kya a um khyh nawlan hae ccaring a dee hae.
42 Awkhualan khe ccungccaw hae tuh loo lang a cceih hae. Tuh-e konglang tuh Abimelek he a hopah hae tuh, 43 a rhawkaw hae kha ko hae zah, phu thum lang phiate loo kya a buh hae. Khua kyate oun toikuh hae paw kha do zah he a muih hae tuh, thonuakuh hae zah a chia hae. 44 Abimelek te a umkheih hae paw aphu nynh malang naang hae zah khua koikua teenaw kyakhe a thadyn hae, tuh ccyh lyakhe phu ning hae nynh loo kya umpaw balyn kha naang hae zah a chia hae. 45 Abimelek nynh khuapi kha anin ninlang tuk zah a lah koute khua kya umpaw balyn kha a chia hae, khua kha khaleih roh zah loi a phing.
46 Shekhem Innhangpaw kya um hae paw balyn nynh tuh-e konglang tuh he a thae hae te, El-berith beikinn rhawlungrua lungkhu lang a tee hae. 47 Shekhem Innhangpaw kya um hae paw balyn tuh a sueluakuh hae cite Abimelek kha a hopya hae. 48 Tukeiccuze Abimelek tuh a umkheih hae paw rhawkaw hae balyn ryte Zalmon Mua lang a kae hae. Abimelek nynh hae zung kheit ccyngkute thingran ran kheit kha bae zah, a raw kya a khangku. Te aning nynh rhawkaw hae kha, “Ka cyipaw na muih oh thyhte arangte cyih oh,” a cipya hae. 49 Tukeiccuze rhawkaw miakaw nynh thingran kha ccarou baekuh hae zah Abimelek nulang zuikute khualungrua kha a pumnua hae, te khualungrua kha maee te soi hae zah, Shekhem Innhangpaw kya-e ccungccaw balyn, nopi pise thong kheit loukaw a chih hae.
50 Te Abimelek tuh Thebez khua lang cceih zah, Thebez kha ryahmin tahnuakute a law. 51 Thuasalama khuapi lungkhu kya sihkakinpaw innhangpaw ccangkheit a um, khua kya um hae paw nopi pise balyn tuh tuh-e innhangpaw kalan ccue hae zah a khawsungkuh hae; innhangpaw innccuvaw lang a kae hae. 52 Abimelek nynh tuh-e innhangpaw kha ccianuate tuk zah, maee te u khylan tuh-e innhangpaw teenaw kalan khe a naekuh. 53 Nopinung lu kheit nynh sungmia-lung te Abimelek lu kha sawphu zah, a luru akoi. 54 Tetuh a rhawtuk-uccaw a ccyngpahpaw ccangvaepaw kha ko kangmaw zah, “Na thaloi kha thuaakuh lah, yn theih; tuhteze nynh ccungccaw hae nynh, ‘Nopinung nynh aning kha a theih,’ cite yn ho lan khyh hae,” a cipya. Tukeiccuze ccangvaepaw nynh po zua lan thuing zah Abimelek tuh a chih. 55 Israel hae nynh Abimelek a chipaw kha a thae hae tuh, mimaw inn raveih lang a ki hae. 56 Tuhcite a uno sung sari kha theih zah a paaw tungvaw seinaw a rae keiccuze Pachia nynh Abimelek kha a liaru; 57 te Shekhem khuaccaaw hae hoyleinaw balyn kha mimaw lu vawlan Pachia nynh ccawsah zah, Jerubbaal ccapaw Jotham thyalawnaw tuh mih tungvaw accah.