6
Midian hae tungvaw Tuaasahnaw
Israel hae nynh Bawipaw muihnaw kya hoyleinaw kha rae hae zah, Bawipaw nynh minmin kha Midian kuih kalan kum sari a pya hae. Midian kuih nynh Israel kha a tae; Midian keiccuze Israel hae tuh mua kyakhe rekunaw hmin, lungkarung te rhawlungrua kha a raeku hae. Pawccecize Israel hae nynh ccacii a tunaw takyh hae kyakhe Midian hae, Amalek hae te nithua lang e ccungccaw hae nynh ccianua hae zah a dou hae. Tuh-e ccungccaw hae nynh ryahmin tahnuakuh hae zah Gaza khua pepan kyacia laephi kyate apoupaw ccathae kha roh hae zah, Israel ram kya pawpaw mah cciataw khyh hae, tuu, vaetua, lann kha mah cciataw khyh hae. Pawccecize minmin tuh mih sahiin hae, mih bu hae kha cciakhae biate tungkhipaw phu zeih alung lante a cceih hae; minmin te mih kalauh hae tuh riatae um khyh hae; tuhcite a tee lalia lan hae te ram tuh a ro hae. Te Israel tuh Midian keiccuze myarya a ryachi zah, Israel hae nynh bawmnaw mue khylan Bawipaw kalan a sia hae.
Midian hae keiccuze Israel hae nynh Bawipaw kalan he a sia hae tuh, Bawipaw nynh profeh lu kheit kha Israel hae kalan a saw; aning nynh minmin kyakhe, “Bawipaw , Israel Pachia nynh hynhte a ho: Izip ram kyate kae cciakhae thung oh zah seetangnaw inn kyate kae poukhae oh; Izip hae kuih kyate thuasah, nanning ae tuaa ae sah oh paw ccungccaw hae balyn kuih kyate thuasah kae luesah oh, minmin kha nae malang kyate ka dee hae zah mih ram kha kae pya oh; 10 kae nynh nanning kha, ‘Kae tuh Bawipaw nae Pachia nynh ka thua; mih ram kya na umnaw oh Amor hae pachia hae kha sawtuanaw na pya lan khyh oh,’ kae cipya oh. Thuasalama ka bya na ngae khyh oh,” a ci.
Gideon Konaw
11 Te Bawipaw vaawpaw tuh yn thua zah, Ofrah khua kya Abiezer minphuinpaw Joash kya-e phaesi ku kaw khe a haung; tuh lyatuin Joash ccapaw Gideon tuh a chanvuih kha Midian hae nynh muih nan hae sah cite misu mianaw khu kya a bua cciamang. 12 Bawipaw vaawpaw tuh Gideon kya yn langkuh zah, “Athungpaw te arawhoypaw nang, Bawipaw tuh na kya a um,” a cipya. 13 Gideon nynh vaawpaw kha, “Bawihaepaw, Bawipaw tuh kae kya a um lanze, hynh-e hae balyn hynh kae tungvaw kya pawccemou acyiku? ‘Bawipaw nynh aening hynh Izip ram kyate oun cciakhae thung khaw?’ cite kae minpaaw hae nynh oun hopya pathy hae paw ngaeangthua lan umpaw a ryalaw hae balyn kha teimou a um vae? Atu tuh Bawipaw nynh kaening hynh oun vua zah Midian hae kuih kya oun ap vae,” a cipya. 14 Tetuh Bawipaw nynh a kalan hawi zah, “E na thungnaw hynhte cceih lah, Israel kha Midian kuih kyate luesah tua; kae nynh nang kha kae naw,” a cipya. 15 Gideon nynh, “Bawihaepaw, pawtemou Israel kha ka luesah kho cih? Ka phin tuh Manasseh phin hae kyaze a thawzya huapaw thua zah, kae tuh ka puizia hae kyaze a nyaa huapaw nynh ka thua,” a cipya. 16 Bawipaw nynh Gideon kha, “Na kya ka um cih zah Midian hae kha lu kheit cci mawte na theih cih hae,” a cipya. 17 Te Gideon nynh, “Na malang maehoynaw ka ccou lanze, bya yn hopahpaw hynh namaw nynh na thua cipaw kha ka ny nawlan syntawnaw ccangkhakheit yn langsapyaku tua. 18 Na kalan kae thua zah, ka lasung kha ccyngpyate na malang ka nung mawlaezung, e kyate la cceih nan hin,” cipah zah aning nynh, “Nae ki mawlaezung ka la um cih,” a cipya.
19 Tukeiccuze Gideon tuh a inn lungkhu lang tee zah, miaa taraw sa kheit kha thuasah, vaekhui ephah ccangkheit te raekuhpaw ransi phing leipaw sanlou kha thuasah a paccyn; miaa saw kha shua lungkhu sang zah, miaa ehang kha ang lungkhu lang a sua koute vaawpaw a umnaw phaesi ku kaw langkhe cciakhae zah a pya. 20 Pachia vaawpaw nynh, “Miaa saw te ransi phing leipaw sanlou kha lah lah, e lung vawlan hin nungtua, te miaa ehang kha buthin tua,” a cipya. Te aning nynh tuhcite a cyi. 21 Tetuh Bawipaw vaawpaw nynh miaa saw te ransi phing leipaw sanlou kha a kuih te a kyngpaw hoitang dung khate a sua; te lung kyate maee yn rua zah miaa saw te ransi phing leipaw sanlou tuh marya a u; te Bawipaw vaawpaw tuh a muihnaw kyate phe a zo. 22 Bawipaw vaawpaw nynh thua cipaw kha Gideon nynh nyh zah, “Bawipaw PACHIA, yn bawmtua! Bawipaw vaawpaw kha hawiliakute ka muih vae,” a ci. 23 Thuasalama Bawipaw nynh, “Na kya daenaw um sah; rih nan, na chih lan khyh,” a cipya. 24 Tuin kyakhe Gideon nynh Bawipaw hanlan silawhang kha rae zah, Bawipaw tuh daenaw nynh thua, cite min a phu. Tuh-e tuh Abiezer minphuin hae kya-e Ofrah khua kya atunin cia a um.
25 Tuh-e khuazi khe Bawipaw nynh Gideon kha, “Na paaw tangnuapaw, sa ningnaw tangnuapaw kum sari accing vae paw kha sue lah, na paaw kya-e Baal silawhang kha roh, te tuh-e silawhang pe umpaw Asherah thing kha ngetua; 26 e rhawlungrua adung khe Bawipaw na Pachia hanlan silawhang kha kou hoy lan raetua; te sa ningnaw tangnuapaw kha na ngepaw Asherah thing khate u lah, maee-ute silawnaw lante raetua,” a cipya. 27 Tukeiccuze Gideon nynh a ryalahtu hae lu haw kha ko hae zah Bawipaw nynh a hopya hawte a cyi; a innbyn te a khuaccaaw hae raw a ri keiccuze tuh-e tuh khuazi khe a cyi.
Gideon nynh Baal Silawhang A Ro
28 Awkhua takaw khuaccaaw hae he a tho hae tuh, Baal silawhang tuh phe la roh zah, a pe umpaw Asherah thing tuh phe la pu, te sa ningnaw tangnuapaw tuh a raekuhpaw silawhang kyakhe pya a la thua. 29 Tetuh “E hynh hummou a cyih?” cite lu kheit te lu kheit a khiaku hae. Akaw-aleih a khia kou hae te, “Joash ccapaw Gideon nynh a cyih,” cite a ho hae. 30 Tetuh khuaccaaw hae nynh Joash kha, “Na ccapaw tuh chi khylan yn pousah tua, pawccecize Baal silawhang kha roh zah a pe umpaw Asherah thing kha a nge,” a ci hae. 31 Joash nynh amaw a rawse hae paw balyn kyakhe, “Baal kha tou na pankhae cih oh? Baal kha na thungkhaw cih oh tou? Baal a pankhaepaw miakaw tuh awkhua ccyh kya chia athua cih. A silawhang tuh ropya athua vae keiccuze aning tuh pachia athua ze, amaw te amaw thungkhawkuh sah,” a cipya hae. 32 Tukeiccuze tuin nin khe Gideon tuh Jerubbaal cite minphu athua, asuilan tuh, Gideon nynh a silawhang kha a ropya keiccuze, “Baal nynh amaw kha dou sah,” cipaw nynh thua.
33 Tetuh Midian hae, Amalek hae te nithua lang e ccungccaw hae balyn tuh pynkheihlan oun thua hae zah, Jordan vaw kha zuate Jezreel Accya kya ryahmin a tahku hae. 34 Thuasalama Bawipaw muisaw tuh Gideon tungvaw yn thua; te mungkae kha tu zah Abiezer phin hae kha a nulang zuiku khylan a ko hae. 35 Te locceihtu hae kha Manasseh phin hae ram kya po lekuh lan sawte, minmin kha mah a nulang zuiku khylan a ko hae. Asher, Zebulun te Naftali phin hae ram langkhe mah locceihtu hae kha saw hae zah, tuin ram e ccungccaw hae nynh mah minmin ryte tungku khylan oun cceih hae.
Tuuming te Syntawnaw
36 Gideon nynh Pachia kha, “Na ho vae hawte, Israel hynh ka kuih te na luesah lan athua ze, 37 huimin kyakhe tuuming ka nung cih; tuuming kya kyalya khe dangtui um zah, laephi balyn tuh arou lanze, na ho vae hawte, Israel kha ka kuih te na luesah cih cipaw ka nyh cih,” a cipya. 38 Te tuhcite acyihkuh. Awkhualan awkhua takaw te tho zah tuuming kha atui he a su tuh, dangtui tuh pakekhupaw kaw kheit acih. 39 Te Gideon nynh Pachia kha, “Ka tungvaw na thinrianaw tuh maee lang beih rua nan sah, vae kheit kyalya ka ho ung cih; tuuming te vae kheit kyalya syntawnaw raenaw kaw yn pya hin; tuuming kyalya hynh rou sah lah, laephi vawlan balyn tuh dangtui cia sah,” a cipya. 40 Tuh-e khuazi khe Pachia nynh tuhcite a cyi. Tuuming kyalya tuh rou zah, laephi vawlan balyn tuh dangtui te acia.