18
Mikah te Dan Phin hae
1 Tuh ccyh lya tuh Israel hae kya siapharan um khyh. Te tuh ccyh lyatuin Dan phin hae nynh khuasahnaw lanpaw ram a ccungku hae; pawccecize tuh-e ccyh kyacia Israel phin hae kya minmin nynh ram kha ccoubua loh khyh hae.
2 Tukeiccuze Dan phin hae nynh ram kha dophi khylan te dotua khylan mih phin pynpi kya-e arawthungpaw pise lu pangaw kha a umnaw hae Zorah khua te Eshtaol khua kyate a saw hae; te minmin nynh, “La cceih oh lah, ram kha la dophi oh lah, la dotua oh,” a cipya hae. Minmin nynh Efraim muaram, Mikah inn kya thua hae zah, tuin kya a rya hae.
3 Mikah inn kya a um lya hae khe Levi phin ccangvaepaw roi kha a syntaw hae; tukeiccuze ccianua hae zah amaw kha, “Hum nynh mou hynhlang ae cciakhae? E hmin kya pawmou na cyi? Hein kya paw rya mou na law?” cite a khia hae.
4 Aning nynh minmin kyakhe, “Mikah nynh tuhte khahte yn cyipya, kae hynh yn hoh zah, a ranpibawi lang ka tang,” a cipya hae.
5 Tetuh minmin nynh amaw kha, “Kaening nynh kae ccianuathepaw kya kae laan kae sui a ua cih tou, ua lan khyh tou cipaw kae ny ccaw, Pachia kalan khiatua,” a cipya hae.
6 Tuh-e ranpibawipaw nynh, “Ngaengante la cceih oh. Nae ccianuathe oh paw kya Bawipaw nynh ae do-oih cih oh,” a cipya hae.
7 Tuh-e lu pangaw hae tuh po cceih hae zah Laish khua he a thua hae te, khuaccaaw hae tuh khyndadyh lan um hae zah Sidon hae umtu hawte lunghiinnaw hoi leite daebabi lan a um hae, lae vawlan hobounaw um lei lante um hae zah, sisua mah a hoi hae. Tukoute Sidon hae te sawkuh hae zah, Siria hae te mah ccuepekuh khyh hae.
8 Minmin nynh Zorah khua te Eshtaol khua kya um hae paw mih puizia hae kya he a thua hae te, mih puizia hae nynh, “Pawtemou athua?” cite a khia hae.
9 Minmin nynh, “Rang oh, ccianua oh sih; pawccecize ram tuh kae muih zah myarya ahoy. Pawpaw mah cyi leite tou na um cih oh? Ccia lan nae thysung nan sah, tee oh sih lah ram kha ccou oh sih.
10 Na ccia oh ze, lunghiin leite a um hae paw ccungccaw hae kha na muih cih oh. Ram tuh myarya ako; lae vawlan hobounaw ccangkheit san a um leinaw hmin kha Pachia nynh nae kuih kya ae pya ccaccing vae oh,” a cipya hae.
11 Dan phin kya-e ccungccaw za taruh tuh rhawtuk-zunghe ccyngkute Zorah khua te Eshtaol khua kyate a cceih hae,
12 te cceihthung hae zah Judah ram kya umpaw Kiriath-jearim kya a rya hae. Tukeiccuze tuh-e hmin tuh atunin cia Mahaneh-dan a ci hae; tuh-e tuh Kiriath-jearim niccaw langkhe nynh a um.
13 Tuin kyate Efraim muaram langkhe cceih hae zah, Mikah inn kya a thua hae.
14 Tetuh ram (tuh-e tuh Laish) kha dophi khylan a cceih hae paw lu pangaw hae nynh mih vaeccaw hae kyakhe, “E inn hae kyahin ranpibawi angki, tera zohtuh te laeepaw zohtuh a um hae cipaw na nyh oh tou? Tukeiccuze na cyi lan oh paw kha tuakuh oh,” a cipya hae.
15 Tukeiccuze minmin nynh tuh-e hmin langkhe maekuh hae zah Mikah inn kya, Levi phin ccangvaepaw a umnaw inn kya thua hae zah amaw kha bya a beih hae.
16 Dan phin ccungccaw za taruh tuh rhawtuk-zunghe ccyngkute sakoih teenaw kya a thadyn lya hae khe,
17 ram dophi khylan a cceih hae paw lu pangaw hae nynh tee hae zah laeepaw zohtuh, ranpibawi angki te tera zohtuh kha a law hae. Ranpibawipaw tuh rhawtuk-zunghe ccyngkuh hae paw za taruh ryte teenaw sakoih pe khe a thadynbua.
18 Lu pangaw hae nynh Mikah inn lungkhu lang tee hae zah laeepaw zohtuh, ranpibawi angki te tera zohtuh kha he a lah hae tuh, ranpibawipaw nynh, “Pawmou na cyi oh?” cite a khia hae.
19 Minmin nynh, “Yccae nan! Na mung kha na kuih te phang huhkuh lah, kae kya cceihbua, paaw lang te ranpibawi lang nae tangpah cih. Lu kheit innbyn elang ranpibawi lang tang tou namaw hanlan ahoyhua, tuhkhyhze Israel minphuin kya-e phin kheit kya ranpibawi lang tang tou ahoyhua?” a cipya hae.
20 Tetuh ranpibawipaw nynh a nawccah zah, ranpibawi angki, tera zohtuh te laeepaw zohtuh kha lah zah, tuh-e hae kya a cceihbua vae.
21 Te imua hae, sahiin hae te uccaw hae kha mih malang cciasah hae zah a ki vae hae.
22 Mikah inn te hary asawnaw kya he a thua hae tuh, Mikah inn pe e inn hae kya a um hae paw kha ko hae zah, Dan phin hae kha deehuite a phya hae.
23 Dan phin hae kha he a sianua hae tuh, Dan phin hae nynh maeleihnuakuh hae zah Mikah kha, “Hynhzeih ccungccaw hae ryte ccianua lan ciate paw bya mou a um?” a cipya hae.
24 Mikah nynh, “Ka raekupaw ka pachia hae te ranpibawi kha na lah oh zah na cciakhae oh, tuhlaepaw ka hoipaw pawmou a um ung? Nanning nynh, ‘Paw bya mou a um?’ cite pawtemou pharung nae khia ngan oh,” a cipya hae.
25 Te Dan phin hae nynh amaw kha, “Kaening nynh na bya kae thae khyh ze ahoyhua cih, tuhkhyhze tuh mih thinria hae paw nynh nang kha ae zia cih hae zah, na hiinnaw te na innbyn hae innbyn kha nae shungsei cih,” a cipya hae.
26 Te Dan hae tuh a cceih hae. Mikah nynh amaw hanlan minmin tuh myaryasankae a thung hae cipaw he a muih tuh, maeleihkuh zah a inn lang a ki vae.
Dan Phin hae Laish kya Khuasah hae
27 Mikah nynh a raekupaw uccaw hae te a ranpibawipaw kha cciakhae hae zah, lunghiinnaw hoi leite daebabi lan um hae paw Laish khuaccaaw hae kya a thua hae, thaloi te bae hae zah, khuapi kha maee te a soi hae.
28 Tuh-e khua tuh Sidon khua te sawkuh zah, humhung te mah a ccuepeku khyh hae keiccuze a pankhaetu um khyh. Tuh-e khua tuh Beth-rehob khua nynh a hoipaw accya kya nynh a um. Dan phin hae nynh tuh-e khua tuh sakthui hae zah a umnaw hae.
29 Israel ccapaw mih minpaaw Dan min kha lee hae zah, tuh-e khua tuh Dan cite min a phu hae; tuh-e khua a min rynpaw tuh Laish acikuh.
30 Te Dan phin hae nynh tuh-e zohtuh tuh mimaw elang a thadynsaku hae. Moses ccapaw Gershom a ccapaw Jonathan te a ccapaw hae tuh, ramccang hae nynh ram kha a law makhia hae, Dan phin hanlan ranpibawi lang a tang hae.
31 Shiloh khua kya Pachia inn a um lungkhu balyn tuh, Mikah nynh a raekupaw zohtuh kha mimaw zohtuh lang a nungku hae.