JUDE
CCAKY
Jude
Jude Kyate Ccaky hynh zyntu hae nynh kae thua cite a ho hae paw ahme leipaw ccangpahtu hae kha raeringnaw pyanawpaw ccaky nynh thua. E dyntarawpaw ccaky lungkhu kya Peter Ccaky Kyningnaw te a lokunaw hae patae um zah, ccawzeitu nynh a ccawriatu hae kya “Pachia nynh a ccungccaw hae kya vaekheit te zungzae azaw lante a pya hae paw mih zynnaw kya tynkaring lan thadyn oh,” cite thaw a pyanaw hae paw nynh thua.
1
Jesu Khri seepaw, James neitawpaw kae, Jude nynh Paaw Pachia sungsahnaw kya um hae paw, Jesu Khri thungkhawnaw kya um hae zah ko athua hae paw kalan ccaw kae ky oh.Ref v.1: Mat 13.55; Mar 6.3
Ngaethyaumsahnaw, daenaw te sungsakunaw tuh nae kya la lungthung sah.
Ahme leipaw Ccangpahtu hae
Ka sungsah hae, aening nynh ah mue kalang oh paw khumnaw kong kha nae kalan zei lan thawte ka zuakuh lyakhe, mithyaa hae kalan vaekheit te zungzae cia a la pya hae paw zynnaw hanlan thawte na dou nawlan oh nanning kha hyy khylan ccaw zei aho cite ka muih. Pawccecize ccungccaw abang tuh aphirute oun tee vae hae, minmin tuh Pachia thawccinaw kha ohhuaku rynaw lang a rulae hae paw, Pachia pawlangria lei hae paw te a makhae kyalyapaw Bawipaw te ah Bawipaw Jesu Khri kha a vua hae paw thua hae zah, langmawpi te byapianaw teing lan nungdae athua hae paw nynh thua hae.
Nanning nynh na la ny vae oh zemah bua kae liathuisah ry oh paw tuh, Bawipaw nynh Israel hae kha Izip ram kyate a khum kou hae te, a zyn lei hae paw kha bua a ro hae.Ref v.5: Exo 12.51; Nam 14.29-30 Mimaw kawhoinaw lungkhu um leite mih umnaw hmin a cciataw hae paw vaaw hae kha byapia khylan alesaepaw nin kyacia Pachia nynh mohnaw kyakhe zungzae atynpaw sivawrui te phang a khung hae. Tuhawte Sodom te Gomorrah te mih pepan e khuapi hae mah tuh-e hae hawte nopi pise seinaw rae hae zah, aphung thua leipaw chiisaw rynaw kalan a zuiku hae keiccuze zungzae maee te detahnaw kha teing hae zah, dosuinkupaw lang a tang hae.Ref v.7: Gen 19.1-24
Tuhawte hynh-e maan a sahtu hae nynh mah mih pynsaw kha a thusaku hae, Pachia kawhoinaw kha pawlangria leite a lesae hae paw kha thethya a ho hae. Thuasalama vaaw lupi Mikhael tuh Moses a rhua konglang te Satan ryte doukuh hae zah bya he a eikuh hae tuh, Satan kha saryate seibenaw bya honua ngan leite, “Bawipaw nynh nang kha ae pe sah,” cite kyalya a hopya.Ref v.9: Dan 10.13, 21, 12.1; Bya 12.7; Deu 34.6; Zek 3.2 10 Thuasalama hynh-e ccungccaw hae nynh a ny lei hae paw uccaw hae kong kha thethya a ho hae; nythyanaw a hoi lei hae paw sarangpaw hae hawte puikhaepaw mih nynaw khate mimaw toulou kha a rosaku hae. 11 Minmin hanlan ngaethya lan kou um! Pawccecize minmin nynh Kain laanpi kha a zui hae, amee mue khylan Balaam a cyiseinaw kalan khe a dekuh bua hae, Korah hawte rhawtho hae zah tuh-e rhawthonaw kyakhe a roh hae.Ref v.11: Gen 4.3-8; Nam 22.1-35, 16.1-35 12 Vaeccawkunaw poi tuakute nanning ryte na aekheih lya oh khe, maethya ny leite mimaw kyalya looh a dangkuh hae paw, athupaw abekuhpaw nynh thua hae. Minmin tuh khisan nynh a cciakhaepaw khuaatui a um leipaw maeking hawte thua hae zah, atharui kyate khohbia hae paw vae ning chihpaw, athae a um leipaw tangvaw ccyh e thingku hae hawte nynh athua hae; 13 mimaw maethyanaw kha tuiphue hawte a pousahpaw rili tuileih kou rupaw hawte thua hae zah a zou bungthungpaw awsi hae hawte nynh athua hae, tuh-e awsi hae hanlan marae zipaw mohnaw kha zungzae paccynpya athua hae.
14 Adam kyate she sarinaw athuapaw Enok mah hynh-e hae kong hynh profehbya a ho. A hopaw tuh: “Dotua, Bawipaw tuh,Ref v.14: Gen 5.18, 21-24 15 ccungccaw balyn kha byapia khylan, Pachia pawlangria lei hae paw balyn nynh Pachia pawlangria leite a cyi hae paw mih cyisahnaw balyn hanlan thuasah, Pachia pawlangria lei hae paw misei hae nynh amaw kha rawsete rehahan lan a ho hae paw mih bya hanlan thuasah byapia khylan riatae leipaw a mithyaa hae ryte yn thua cih,” a ci. 16 Tuh-e hae tuh palei ccohkuh hae paw, milae seinaw a ccungpahtu hae te mih pynsaw rynaw thyhte a hiin hae paw nynh thua hae; mih khalang te tansakunaw bya kha ho hae zah, mimaw amia muenaw elang ming hae kha leih a poo hae.
17 Thuasalama ka sungsah hae, ah Bawipaw Jesu Khri a locceihtu hae nynh langmawlya te a la hodae hae paw bya hae kha la liathui oh. 18 Minmin nynh, “Nyathyakou ccyh kya, Pachia pawlangria leite mih pynsaw rynaw thyhte a hiin hae paw, ccungccaw saryatu hae oun langkuh cih hae,” cite ae hopya oh paw kha la liathui oh.Ref v.18: 2Pe 3.3 19 Tuh-e ccungccaw hae tuh ccungccaw a phiasakuh hae paw, Muisaw hoi leite pynsaw kya a hoysah hae paw nynh thua hae.
20 Thuasalama ka sungsah hae, nanning tuh athyaa huaccepaw nae zynnaw vawlan khe palei lethung oh lah, Thyaa Muisaw kya sawsang oh. 21 Pachia sungsahnaw kya tyn oh lah, zungzae hiinnaw hanlan ah Bawipaw Jesu Khri kya-e ngaethyaumsahnaw kha ngaehoi oh. 22 Lunghiinnaw a hoi hae paw kha thawccih oh; 23 ccungccaw abang kha maee lungkhu kyate thuaa oh lah, khum oh; pynsaw keiccu anungsikuhpaw boeining kha heize hua oh lah, rawrinaw te minmin kha thawccih oh.
Athangnaw Sawsang
24 Nanning kha khuliakunaw kyate na khyn nawlan oh ae rin kho oh zah, seinaw hoi leite lungtuanaw ryte a phu-enaw a umnaw malang ae thuakhae kho oh paw, 25 aening oun Khumtu, a makhae kyalyapaw Pachia tungvaw kya phu-enaw, lesaenaw, uknaw kaw te kawhoinaw tuh ah Bawipaw Jesu Khri liate atu te zungzae cia la um sah. Amen.