38
Bawipaw nynh Job Bya A Khung
1 Te Bawipaw nynh Job kha khiccung lungkhu te byakhung zah:
2 “Nynaw a um leipaw bya te
ka paccynnaw a mohsahpaw hynh
hummou athua?
3 Pise a zaw vae paw hawte
na taevoiboei kha voiku tua,
bya kae khia cih zah nae khungru cih.
4 “Laephi thotakawnaw ka la rae lya kha
teimou na um?
Na ny ze yn hopya tua.
5 Laephi ako aby hynh hum nynh mou
byapae? Na ny ccaccing aho!
Tuhkhyhze laephi vawlan
tounawpaw rui kha
hum nynh mou a raw?
6 Laephi aleihpaw tuh
paw vawlan mou abingku?
Tuhkhyhze awkhua takaw e
awsi hae tuh pynkheihlan
hlawsah hae zah,
7 vaawccungccaw balyn tuh
lungtuate a sia lya hae khe,
laephi apaki lang e abyapi huapaw
lung kha hum nynh mou a bing?
8 “Rili hynh a nung vue kyate
he yn pui lya kha,Ref 38.8-11: Jer 5.22
hum nynh mou rili kha
thuakaw te a khawsung?
9 Rili a boeining lang maeking kha
ka raepah zah,
lungde nawlan marae zipingpaw
mohnaw kha ka raepya lyakhe,
10 rili hanlan ramri ka nungpya,
te accaw hae te thuakaw hae kha
ka nungpah zah,
11 ‘E kyacia nae thua cih,
e kya alawe lan nae cceih lan khyh,
alysakuhpaw na tuileih hae tuh
e kyahin athang cih hae,’ ka cipya.
12 “Na pui takaw te awkhua ccyh kha
kaw na pya boi tou?
Awkhua takaw kha a umnaw hmin
na nysah boi tou?
13 Awkhua takaw e awnaw nynh
laephi apaki kha kyng zah,
ccungccaw hoylei hae paw kha
laephi kyate dae thui lan
vua athua nawlan hae, awkhua takaw kha
kaw na pya boi tou?
14 Tazeihtung te dydepaw
anglae hawte rulaekuh zah,
boeining hawte azong so athua.
15 Ccungccaw hoylei hae paw hanlan
awnaw tuh khee thua zah,
a hangthung hae paw
16 “Rili tuidy lungkhu lang
na tee boi vae tou?
Akhu phe adianaw hmin kya so
na khiakuh boi vae tou?
17 Chinaw koikua kha langsapyaku
na thua vae tou?
marae zipingpaw mohnaw koikua kha
na muih boi vae tou?
18 Laephi pynpi ako zia hynh
na nyhthya tou?
E balyn hynh na ny zetuh hotua.
19 “Awnaw a umnaw hmin kalan
ccianawpaw laanpi tuh teimou a um?
mohnaw hmin so teimou a um?
20 Nang nynh awnaw te mohnaw kha
a phiakunaw hae ramri kalan
na cciakhae kho hae tou?
mih umnaw inn lang cceihpaw
laanpi kha na nyh kho tou?
21 Nang tuh langmawlya
na la pui vae paw zah,
na nyh sasaw cih,
na she myarya sae vae hynhsa!
22 “Vuiraw ccakhungnaw
inn lungkhu lang na tee boi tou?
Hya ccakhungnaw inn kha
na muih boi tou?
23 Khah-e hae kha vawsawnaw nin
hanlan te rhawtukkunaw te
doukunaw nin hanlan taekhiate
ka nung hae.
24 Awnaw hynh pawcihawpaw
laanpi kyate mou yn phiaku?
Nithua lang e khisan hynh
pawcihawpaw laanpi kyate mou
25-26 “Ccungccaw um leinaw ram kya te
ccungccaw um leinaw laesia ram kya
khuaarawsah khylan hum nynh mou
khuaa accanpaw hanlan tuizy zypah zah,
riakawnaw laanpi kha so a raepah?
27 Ramrou te ccungccaw um leinaw
ram kya tui bynsah khylan te
laephi kyate lonua posah khylan
28 “Khuaatui nynh paaw a hoi tou?
Hum nynh mou dangtui accawpaw
hynh a umsah?
29 Tuiting hynh hum vue kyate mou
yn pou?
Vaawlang e dangtui hynh hum nynh
mou a saah?
30 Tui tuh lung hawte tang zah,
rili vawlan e tui tuh ahaw.
31 “Awsitaruh arui kha
na khiide kho tou?Ref 38.31: Job 9.9; Amo 5.8
Orion awsiphu kya-e arui kha
na phou kho tou?
32 Mazzaroth awsi hae kha
mimaw ccyh azaw khe
na langsakuh kho hae tou?
Awsipi kha a taw hae ryte
na cciakhae kho hae tou?
33 Vaawlui phungzae hae kha
na nyh tou?
Tuh-e phungzae hae uknaw tuh
laephi vawlan na rae kho tou?
34 “Tui alepaw nynh nang kha
ae vu ccaw cite,
maeking hae kalan roi na saw kho tou?
35 Khozaw nynh laekuh zah nang kha,
‘E kya nynh kae um,’ ae cipya nawlan,
khozaw kha na laesakuh kho tou?
36 Hawnaw kha ccungccaw lungkhu kya
hummou a nung kho?
Nythyanaw kha ccungccaw thinlung
kalan hum nynh mou a pya?
37-38 Maeking rianawpaw hawnaw kha
hummou a hoi?
Tuhkhyhze laenoi hae tuh
sueluakuh hae zah,
laephiccan hae tuh pynkheihlan
he a beekuh hae te,
vaawlui e saphua tui-ung kha
39-40 “Chindeih taw hae nynh
mih karung kya a rya lya hae khe,
tuhkhyhze thabu kaw kya
saw a buhku lya hae khe,
chindeih pinung hanlan saw
na thuakhaepah kho tou?
Tuhkhyhze mih vuelawpaw
chindeih taw hae kha
mih vue na sosah kho hae tou?
41 Va-aw taw hae tuh aerua
a hoi khyh hae keiccuze
Pachia kalan sia hae zah,
a khiavuiku lya hae khe,
hum nynh mou aepaw a pya hae?