36
Elihu nynh Pachia Thehoysah
Elihu nynh a bya kha po pia zah:
“Ccapyhtari yn ngaesangpah lah,
nang kha kae muihsah cih,
pawccecize Pachia ccelang
ho lanpaw ka hoi ung.
Asawnaw langte ka hawnaw kha
kae thuakhae cih zah,
kae yn Raetupaw tuh a ding cipaw
ka langsakuh cih.
Pawccecize ahme leipaw
bya ka ho ccaccing khyh;
nynaw te phe accingpaw
ccungccaw tuh na kya phang a um.
 
“Accaccingte, Pachia tuh
athungpaw thua zah,
humhung kha mah dothatheih khyh;
aning tuh hawnaw,
thawzung te phe abeih.
Ccungccaw hoylei hae paw hiinnaw kha
haang khyh,
thuasalama vawsawnaw
a teing hae paw nynh mue lan
a ccan hae paw kha a pya hae.
Miding hae kyate a mit kha
ccanglang hawitaw khyh hae,
minmin kha bawitungkhung vawlan e
siapharan hae ryte
zungzae umsah kheih hae zah,
minmin kha a hangthung hae.
Te minmin kha sivawrui te
khii thua hae zah,
vawsawnaw arui te khii athua hae ze,
Pachia nynh mih ryalawnaw kha thuasah,
lysakute a cyiseimenaw hae kha thuasah
a langsapyaku hae.
10 Thuiheinaw thae ry nawlan
mih nakaring kha uasah hae zah,
hoyleinaw kyate
a maeleihku nawlan hae kaw a pya hae.
11 Pachia bya ngae hae zah
a rya a law hae ze,
mih nin kha hoirumnaw te
thangsah hae zah,
mih kum kha lungtuanaw te
a thangsah hae.
12 Thuasalama kaw a ngae khyh hae zetuh,
thaloi rhaw te a chih cih hae zah,
nythyanaw hoi leite a chih cih hae.
 
13 “Pachia nyh lei hae paw nynh
thinrianaw kha a ry hae;
Pachia nynh minmin kha he a khiide hae te,
bawmnaw mue khylan sia khyh hae.
14 A zawthaw lya hae khe chih hae zah,
mih hiinnaw tuh maethyanaw te athang.
15 Vawsawnaw a teing hae paw kha
mih vawsawnaw toulou
mawkhate luesah hae zah,
mih nakaring kha riathaenaw khate
a uasahpya hae.
16 Nang zemah riathaenaw hmin kyate
kheekunaw a um leinaw
akopaw hmin kalan ae soih,
te na ccaboi vawlan khe
aepaw niapaw te phe abeih.
 
17 “Thuasalama ccungccaw hoylei hae paw nynh
a ing hae paw kha na ing;
na seinaw te atekuhpaw
detahnaw kha na ing.
18 Thinrianaw nynh dothatheihkunaw
mue khylan ae soih khyh nawlan
raeringkuh lah,
myarya lepaw shawkhawnawpaw nynh
nang kha ccanglang ae maeleih nan sah.
19 Na rawnaw nynh riathaenaw kyate
ae thungkhaw cih tou?
Na thawzung thungnaw balyn nynh so
ae thungkhaw cih tou?
20 Ccungccaw hae kha mih umnaw kya
ro athua ccyh hae khuazi kha ngae nan.
21 Raeringkuh! Hoyleinaw kalan
maekuh nan;
pawccecize tuh-e hoyleinaw keiccuze
vawsawnaw khate syntawtua na thua vae.
22 Dotua, Pachia tuh a huhan liate
hangthung athua vae;
Pachia te alokuhpaw
sazae hummou a um?
23 Hum nynh mou Pachia laanpi kha
synriapah zah,
hum nynh mou, ‘Phe na cyisei vae’
cite a hopah kho?
 
24 “Ccungccaw hae nynh hlawsah te
a thehoysah hae paw
a ryalaw thehoysah lanpaw kha
la ning nan.
25 Ccungccaw balyn nynh a ryalaw kha
a muih vae hae;
ccungccaw miakaw nynh asawnaw te
a dolang hae.
26 Accaccingte, Pachia tuh lesae zah
amaw kha ah nyh kho khyh oh;
Pachia kum tuh riatae um khyh.
27 Dangdy tui kha palung lang
suethung zah,
a tuihu kha khuaa lang a rawsah,
28 vaawlui kyate khuaarah zah,
ccungccaw hae tungvaw khe
thawte khuaa arah.
29 Hum nynh mou maeking
adawkuhpaw kha nyhthya zah,
a umnaw kya-e kholungthyhpaw kha
a nyhthya?
30 Dotua, a pepan khe a awnaw kha
pazaesakuh zah,
rili kaw akhu huanaw kha mah
phe a bong.
31 Tuhcite ccungccaw hae kha
uk hae zah,
looh patae a pya hae.
32 A kuih te khozawlaekuhpaw kha
kyng zah,
a eenaw kha tungsah lan kaw a pya.
33 Kholungthyhpaw nynh
khise yn tho lanpaw kha
langsah zah, vaetua hae nynh mah
khise yn tho lanpaw kha a ny hae.