29
Job nynh Nyathyakou A Ho
1 Job nynh bya bua ho zah:
2 “Langmawlya e ninsaw hae,
Pachia nynh yn do-oih lya hawte
ka thua hin sah lah;
3 tuh lya tuh ka lu vawlan
Pachia maeekhua aw zah,
tuh-e amaw awnaw liate
mohnaw kya ka cceih kho;
4 ka ngawphue lya,
Pachia kya-e ccuepekunaw
ka inn kya a um lya hawte
ka thua hin sah lah;
5 tuh lya tuh Athunghuapaw tuh
ka kya um zah,
ka ccaaw hae nynh yn koihlu hae;
6 ka ccianaw laanpi kya mateitui lua zah
lung nynh ka hanlan chitui kha
a phyhsah lya hawte thua hin sah lah!
7 Khua kya-e koikua kalan ka cceih zah,
khualae laanluepi kya ka haung lyakhe,
8 ccangvae hae nynh yn muih hae zah
nulang yn sitawku hae,
piccan hae tuh thokute a thadyn hae;
9 cciakhaetu hae tuh
byaho sungkuh hae zah,
mih kuih te mih mung kha a huku hae;
10 piccanhua hae roi tuh zya dae zah,
mih lae tuh mih dan kya abekuh.
11 Ka bya he a thae hae te,
ka the yn hoysah hae zah,
he yn muih hae te,
ka ccaekia lang a tang hae;
12 pawccecize a rah hae paw
ryachi hae te
bawmtu hoi leipaw ngawraw hae kha
ka khum hae.
13 Lungriathae hae paw nynh
oun thuakhae hae paw
hythuanaw kha ka ccou,
nomae hae kha lungtuanaw
hlaw ka sahsah hae.
14 Dingnaw kha boeining hawte
ka lawku;
byading tuh ka hanlan angkiccua te
pungde hawte nynh thua.
15 Mitmoh hae hanlan mit ka thua zah,
ccukhou hae hanlan ccu nynh ka thua.
16 Ryachi hae hanlan paaw ka thua zah,
mikhia hae kha mih byathan kya
ka pankhaw hae.
17 A ding lei hae paw mih nua kha
ka khyapah hae zah,
a tei hae paw saw kha
mih haw kyate ka lua hae.
18 ‘Ka bu kya ka chih cih,
ka hiin nin hae tuh laesia zeih acih cih,
19 ka tharui hae tuh tui kalan khe
pazaekuh zah,
ka karan hae vawlan khe
dangtui zidae accah;
20 ka phu-enaw tuh po tyn zah,
ka li tuh ka kuih kya thawrarih lan
zungzae a um,’ cite ka la tuaku.
21 “Ming hae nynh ka bya kha
ngae hae zah phang yn ngaw hae,
tuanaw ka pya hae paw kha
yccae khyh hae.
22 Bya ka ho koute minmin nynh
bya bua ho vae khyh hae,
ka bya tuh dangtui hawte
mih tungvaw accah.
23 Khuaatui ngaw hawte kae kha
yn ngaw hae;
hawkhuaa hawte mih khalang kha
yn awnua hae.
24 Zynkunaw a hoi khyh lya hae khe
nuinzazyh lan ka umpya hae;
ka mitmae hoynaw kha nynh
lungthawsaenaw a pya hae.
25 Mih laanpi kha ka popah hae zah
lupi lante ka haung,
a rhawkaw hae laku umpaw
siapharan hawte thuasah,
a rah a khui hae paw kha
lungtangnaw a pyatupaw
hawte thuasah ka umpya hae.