21
Job Bya
1 Oute Job nynh khung zah:
2 “Ka bya hynh hoyte
yn ngaepya tua oh,
tuh-e tuh lungtangnaw
nae pya oh paw lang tang vae sah.
3 Yn ngaesangpah hin oh, ka ho cih;
ka ho koute nae sarya ry oh ze
nae sarya cih oh.
4 Ka bokhaekupaw hynh
ccungccaw hae kalan zawtou ka bo?
Pawccemou thindyn leite ka um cih?
5 Kae hynh yn do oh lah,
nae ngaeangthua sah,
nae kuih khate nae mung kha
huhkuh oh.
6 Ka tungvaw acyihkuhpaw hynh
ka tua vae ze,
ka lungroh zah ka thyngkuh.
7 Pawccemou ccungccaw hoylei
hae paw nynh hiin hae zah,
phe taw lan shesaete huhan
hoi hae zah a lesae hae?
8 Mih ccaaw hae tuh mih malang khe
tynkaring lan um hae zah,
mih ciihan hae tuh
mih mitmuihnaw khe
tynkaring lan a um hae.
9 Mih inn tuh rinaw kyate khyn zah,
Pachia detahnaw tuh
mih tungvaw ccah khyh.
10 Mih tangnuapaw nynh
a ciihan saw zah,
mih vaetuapi tuh ataw roh boi khyh.
11 Mih ccaaw taraw hae kha
tuuphu hawte saw hae zah,
mih ccaaw hae tuh thohkute
a law hae.
12 Tyng te daw khuakute
hlawsah hae zah,
phyly roi khate mih lungtua.
13 Hoirumnaw te mih hiinshe kha
liasah hae zah,
michi khua lang daenaw te
a cceih hae.
14 Ccungccaw hoylei hae paw nynh
Pachia kha, ‘Kae makhaete
oun cciataw!
Na laanpi kha ny kae ry khyh.
15 Kaening nynh a ryalawpya lan ciate
Athunghuapaw tuh
pawcihawpaw mou athua?
Amaw kalan saw kae sang ze,
thanenaw pawmou kae mue cih?’
a ci hae.
16 Mih hoirumnaw tuh mimaw kuih kya
um ccaccing khyh khaw?
Ccungccaw hoylei hae paccynkunaw kha
17 Ccungccaw hoylei hae mih maeekhua kha
vae hohzeihmou a thepya boi hae?
Shethya nynh vae hohzeihmou
mih tungvaw a thuanua boi hae?
Pachia nynh thinriate ccinaw kha
vae hohzeihmou a sawnua boi hae?
18 Khisan malang e ccatanphue hawte thuasah,
khise nynh a mungpaw
vaekang hawte thuasah
vae hohzeihmou athua boi hae?
19 ‘Pachia nynh mih hoyleinaw kha
mih ccaaw hae hanlan
a ccakhungpya hae,’ na ci oh.
Minmin nynh a ny nawlan hae,
minmin kha liaru thua hae sah.
20 Mimaw mit ccaccei te
mih ronaw kha muih hae sah lah,
Athunghuapaw thin-unaw tui kha
neih hae sah.
21 Mih hiinnaw ccyh athang vae ze,
mih nukhu e mih innbyn hae kha
pawlangria ung hae vema?
22 Ahangnaw kya a um hae paw kha
bya a piatupaw Pachia kha
hum nynh mou a ccangpah cih?
23 Lukheitpaw tuh hoirumnaw
phe beih lante,
lungtua ngaengante a chih,
24 tuh-e paw a cce tuh
myarya tho zah,
a ru kya mah kintui phe abeih.
25 Ccangpaw lu kheit tuh
ccihtaci lante
hoynaw kharouh taang boi leite
a chih.
26 Mih lu ning mawte phe lokuh lante
laenoi kya ih hae zah,
zanpaw hae nynh pong a bong hae.
27 “Na tuanaw te ka tungvaw
seinaw rae lan
na paccynkupaw kha phe ka ny.
28 ‘Alesaepaw ccungccaw inn tuh
teimou a um?
Ccungccaw hoylei hae paw nynh
a umnaw hae paw bu tuh
teimou a um?’ na ci.
29 Khycce cceih hae paw kha
na khia boi khyh oh tou?
Minmin nynh a ho hae paw kha
na nyh boi khyh oh tou?
30 Ccungccaw hoylei hae paw kha
shethya ccyh kya haang athua hae paw te
Pachia a thinria nin kya
luesah athua hae paw kha
na thae boi khyh oh tou?
31 Ccungccaw hoyleipaw
a cyisahnaw kha amaw malang khe
hum nynh mou a ho?
A la cyipaw kha hum nynh mou
a liaru?
32 Aning kha shawku lang
cciakhae he athua te,
a shawku kyakhe ngawtu kha
a nung hae.
33 Aning hanlan akhunaw e
laeccan tuh a e;
a nulang te ccungccaw miakaw nynh
a zui cih hae zah,
a malang cceih hae paw tuh
riatae lei acih hae.
34 Tukeiccuze pawtemou
accakaepaw bya te
lungtangnaw nae pya cih oh?
Nae khung oh paw bya tuh
hynbya cci nynh thua.