14
“Nopi nynh saahpaw
ccungccaw tuh a she dyn zah
vawsawnaw te phe abeih,
haetapaw hawte paw zah anaan,
mynlyh hawte ccue zah tyn khyh.
Tuhcihawpaw ccungccaw kha
na mit te na do ry tou?
Byapianaw kalan nang nynh
nae thuakhae tou?
Athyaa leipaw lungkhu kyate
athyaapaw uccaw kha
hummou a thuakhae kho?
Humhung nynh mah
thuakhae kho khyh.
A nin tuh khyapya thua zah,
a sawpaw sah hohzeihmou
cipaw phe na ny,
a lawe kho leipaw ramri kha
na nungpya vae,
amaw nin kya vaeluatupaw hawte,
a lungtua nawlan, amaw kha
ccanglang hawitaw lah, sibiatua.
 
“Thingku tuh nge zemah,
toih leite um lan khyh zah,
bua a toihthui cih cite
ngaehoinaw a um.
A tharui tuh lae kaw khe
taw vae zah,
a ccungmuing tuh lae vawlan
a chi vae zemah,
tuihu liate a toih cih zah,
aku taraw hawte akaran hae tuh
a toihthung cih.
10 Thuasalama ccungccaw tuh
chih zah a uu hae;
ccungccaw tuh a chih koute
teimou a um?
11 Kuapi kya tui aky hawte thuasah,
tui kan zah vawkhu tuh
karae arou hawte thuasah
12 ccungccaw tuh ih zah,
bua tho vae khyh;
vaawlui azo mawlaezung
thaekuh lan khyh,
a inaw kyate tho vae lan khyh.
13 Sheol kya beih yn thuruh,
na thinrianaw adae mawlaezung
yn thuruhtua,
accyh yn khyapah lah,
beih yn ning nan!
14 Ccungccaw tuh a chi ze,
a hiinthui ung cih tou?
reihkute rya ka law ccyh balyn kha
ka luenaw ccyh azaw
mawlaezung ngaesangte
ka ngaw cih.
15 Nae ko cih zah kae oi cih;
na kuih te na raepaw kha
na lungrythua cih.
16 Tetuh ka ccunoh kha
nae ria vae lan khyh zah,
ka seinaw kha mah
nae dokhaw vae lan khyh;
17 ka cyiseinaw kha
zaw kyakhe tazeihkhia
athua cih zah,
ka hoyleinaw kha
nae bongpah vae cih.
 
18 “Thuasalama mua tuh
pong ting zah phe azo,
lungpi tuh a umnaw kyate
nue athua;
19 tui nynh lung kha
phe zo lan asoh; tui alepaw nynh
lae hoypaw kha a lou;
tuhawte nang nynh
ccungccaw hae
ngaehoinaw kha na ro.
20 Ccungccaw kha zungzae
na tae zah phe azo;
a mitmae kha na rulae zah
ccaring na cciasah.
21 A ccaaw hae nynh sawtuanaw
a mue hae zemah nyh khyh;
minmin kha nyaasah
athua hae zemah,
tuh-e tuh nyhlae khyh hae.
22 A pyn ccinaw kyalya kha mue zah,
a makhae kyalya te a rah,” a ci.