10
Job: Ka Hiinnaw Ka Ngaemyng
1 “Ka hiinnaw hynh
ka ngaemyngkhaekuh;
ka lungccingkhaeku leinaw hynh
synku leite ka ho cih;
thinlungccite ka ho cih.
2 Pachia kalan hynhte
ka hopah cih, Sei yn be nan;
pawccemou nae rawse cipaw
beih yn nysah.
3 Vawsawnaw pyate,
na kuih te na raepaw kha
dothatheihte,
ccungccaw hoylei hae
paccynkunaw kha
nawccawkhaepaw hynh
ahoy na ci tou?
4 Pynsaw mit tou na hoi?
Ccungccaw nynh
muih hawte tou na muih?
5 Na nin hae tuh ccungccaw nin tetou aloku?
Na kum hae tuh
ccungccaw kum tetou aloku?
6-7 Ka cyisei leinaw kha na nyh zah,
na kuih kyate a lue khopaw
humhung mah um khyh cipaw
mang na nyh pite,
pawccemou ka hoyleinaw kha
na ccung zah,
ka seinaw kha nae ccungpya?
8 Na kuih te nae ccaan zah
nae raeku; atu vae tuh
na paleihkuh zah nae ro.
9 Anglae te raeku hawte
nae raekupaw kha ning nan;
laenoi kalan bua nae kisah
vae cih tou?
10 Mateitui lae hawte
nae lae khyh tou?
Mateitui hawsahpaw hawte
karae nae hawsah khyh tou?
11 Ving te saw khate boei lang
nae bong zah,
ru te tharui khate nae huide.
12 Hiinnaw te atynpaw
sungsahnaw kha nae pya zah,
na do-oihnaw nynh
ka muisaw kha a khynsah.
13 Tuhzemah hynh-e hae hynh
na thinlung kya na thuruh zah,
tuh-e tuh na eenaw nynh thua
cipaw ka ny.
14 Ka sei ze, phe nae syntaw zah,
ka hoyleinaw kha
nae ngaethya khyh.
15 Ccungccaw hoyleipaw
ka thua ze, ka hanlan
ngaethya lan kou um!
Adingpaw ka thua zemah,
maehoynaw ka ccou lae khyh,
pawccecize myaryamaw
ka thethah zah
riathaenaw ka teing.
16 Ka laan ka sui a ua vae ze,
chindeih hawte kae kha
nae deehui zah,
ka tungvaw kya ngaeangnaw kha
leih nae raenua.
17 Kae kha rawsete ccaekia
palei na hoi zah,
ka tungvaw na thinrianaw kha
na lesah; kae kha rawsete
rhawkaw thawpaw hae kha
18 “Pawccemou ka nung vue kyate
nae la puisah?
Humhung nynh san
yn muih mawkhe
ka la chi lanpaw,
19 A um boi leipaw hawte
ka la thua sah lah,
ka nung vue kyate
shawku lang me yn la
cciakhae lan hae paw.
20-21 Ka hiinshe tuh dyn khyh tou?
Kithui ci um vae leite,
ngaethyanaw te akhupaw
mohnaw ram lang
ka ccia maw hin,
ngaengannaw beihtaraw
ka mue nawlan,
ka makhaete beih yn umsah tua.
22 Tuin kya tuh ngaethyanaw te
nua-inua-ae a umnaw ram,
awnaw tuh mohnaw hawte
athuanaw nynh thua,” a ci.