JOB
Job
Job ccauh kyahin ccungccaw hoypaw lu kheit, vawsaw riathae a teingnaw kong a um—a ccaaw hae marya chih hae, a hoirumnaw kha pong shung zah, ri lan umpaw ccinaw nynh a thuanua. Job te a ruiban hae nynh tuh-e vawsawnaw te asekuh lante pawtemou a muih hae cipaw kha ccawzeitupaw nynh hlawbya phuin thum te a ho. Nyathyakou kya, Pachia nynh ccungccaw a ccuepenaw kong tuh abyapi huapaw lang tang zah Pachia amaw maw tuh Job kya a langkuh.
Job a ruiban hae nynh Job a teingnaw kha mih minpaaw hae beiknaw phungzae thyhte a ccaesahpya hae. Minmin nynh a tuanaw hae tetuh, Pachia nynh ccungccaw hoypaw kha lasung leih pya zah ccungccaw hoyleipaw kha de leih a tah keiccuze atu Job nynh a teingpaw hynh a sei keiccu nynh thua, a ci hae. Thuasalama tuh-e tuanaw tuh Job hanlan eih azoi kaesy; Job tuh mihoypaw te midingpaw ccaccing athua keiccuze tuhcihawpaw detahnaw accihpaw tetuh ngaekuh khyh. Job tahawpaw ccungccaw tungvaw kya Pachia nynh tuhcihawpaw hoyleinaw a thuasahpaw kha a thaethya khyh keiccuze Job nynh Pachia kha rawhoyte bya a khungru. Job nynh a zynnaw kha zosah khyh, thuasalama Pachia malang thyaaccoutupaw lang tang ry zah ccungccaw hoypaw lante sawtuanaw ccouthui a ry.
Job nynh bya a khiapaw kha Pachia nynh khung khyh, thuasalama atyn-are a cyih khotu te a nyhtu athuanaw kha Job kha nysah zah tuh-e tuh nynh Job kha a ngae a ngansah. Tetuh Job nynh Pachia tuh ahawpaw te alesaepaw nynh thua cipaw nyhthya zah a la hopaw byarepaw te thinrianaw bya kha a ngaesikuh.
Athangnaw kya Job tuh langmaw hawte bua thuathui zah atakaw lya lae heize a hoirumhua. Job a teingnaw asuilan kha a ruiban hae nynh a thaethya khyh hae keiccuze Pachia nynh Job a ruiban hae kha seisahnaw bya te a pe hae. Pachia tuh minpaaw hae beiknaw laeze alesaehua cipaw Job kyalya nynh a nyh.
1
Job te A Innbyn
1 A min Job cikuhpaw ccungccapaw lu kheit tuh Uz ram kya a la um. Tuh-e paw tuh ccaenaw um leipaw te adingpaw thua zah, Pachia rawrihpaw te hoyleinaw a sibiapaw nynh thua.
2 Aning nynh ccapaw lu sari te ccanung lu thum a saah.
3 Tuu thong sari, kalauh thong thum, tangnuapaw toi za pangaw, lann pinung za pangaw te ryalahtu patae a hoi; tukeiccuze e paw tuh nithua lang e ccungccaw balyn kyaze alesae huaccepaw nynh thua.
4 Job ccapaw hae nynh mih pui nin takyh vae ze lu kheit inn koute lu kheit inn kyakhe atuete poi kha leih a tuakheih hae; mimaw ryte aekheih niakheih khylan mih ccianung lu thum kha leih a kobua hae.
5 Mih poi he athang te Job nynh ko hae zah a thyaasah hae; te awkhua takaw te tho zah mih balyn hanlan milu thyhte maee-ute silawnaw kha a raepya hae; pawccecize Job nynh, “Ka ccaaw hae nynh seinaw raesei hae zah mih thinlung kya Pachia kha thyalawsei kho hae,” a ci. Tuhcite Job nynh zungzae leih a rae.
Pachia te Satan Tungkunaw
6 Nin kheit tuh Pachia ccapaw hae nynh Bawipaw malang langku khylan oun thua hae zah, minmin kya Satan mah a umbua.Ref 1.6: Gen 6.2
7 Bawipaw nynh Satan kha, “Teitemou nae thua?” a ci. Satan nynh Bawipaw kha, “Laephi vawlan ka khiakuh zah ka ccia bungthungnaw kyate nynh kae thua,” cite a khung.
8 Bawipaw nynh Satan kha, “Ka seepaw Job kha na nyh boi tou? Laephi vawlan aning tahawpaw lu kheit san um khyh, ccaenaw um leipaw te a dingpaw, Pachia rawrihpaw te hoyleinaw a sibiapaw nynh thua,” a cipya.
9 Tetuh Satan nynh Bawipaw kha, “Job nynh Pachia kha accakaepaw hanlan a rih cih zawtou?Ref 1.9-11: Bya 12.10
10 Amaw te a inn te a hoipaw balyn kha po voilu lan hohung na koihkhawpah khyh tou? A ryalaw kha hythua na pya zah, a hoirumnaw tuh ram lungkhu a lungthung.
11 Thuasalama atu na kuih dyng lah, a hoipaw balyn kha na lawpya zetuh na malang mawkhe thya ae law cih,” cite a khung.
12 Bawipaw nynh Satan kha, “Kou hoy, aning nynh a hoipaw balyn tuh na kaw nynh akhya; amaw kha than nynh na kuih dyngnua nan!” a cipya. Tukeiccuze Satan tuh Bawipaw umnaw kyate a pou vae.
Job A Shungnaw
13 Nin kheit tuh Job a ccapaw hae te a ccanung hae nynh atawccapaw inn kya ae hae zah, misutui a nia cciamang lya hae khe,
14 Job kalan thethaesahtu lu kheit yn thua zah, “Tangnuapaw hae tuh leithue hae zah, lann pinung hae tuh mih pepan khe ram a paeekuh hae,
15 te Seba hae nynh oun ccianua hae zah marya a lawku hae, ryalahtu hae kha thaloi te marya a chia hae; ka makhae rou nynh nang kha thethaesah khylan me ka lue,” a cipya.
16 Tuhte a hopya cciamang lyatuin ccangpaw lu kheit yn thua zah, “Vaawlang te Pachia maee yn ccah zah, tuu hae te ryalahtu hae kha a u hae keiccuze marya chih hae; ka makhae rou nynh nang kha hopya khylan me ka lue,” a cipya.
17 Tuhte a hopya cciamang lyakhe, ccangpaw lu kheit yn thua zah, “Khaldi hae nynh phu thum lante kalauh hae kha oun thiing hae zah marya a cciakhae hae, ryalahtu hae kha thaloi te phe a chia hae; ka makhae rou nynh nang kha thethaesah khylan me kae lue,” a cipya.
18 Tuhte a hopya cciamang lyakhe, ccangpaw lu kheit yn thua zah, “Na ccapaw hae te na ccanung hae tuh atawccapaw inn kya ae hae zah misutui a nia cciamang lya hae khe,
19 ramkaw langte myarya athawsaepaw khise tuh vaekheihmawte yn zaw zah, inn apaki ki pali mawte phe a mung, te inn nynh tuh-e zawthaw hae tuh deih hae zah phe a chih hae; ka makhae rou nynh nang kha thethaesah khylan me ka lue,” a cipya.
20 Tetuh Job nynh thokuh zah a boeining kha a seii, a lu kha ookuh zah laephi kya a bakhung, te Pachia kha a beik.
21 Job nynh, “Ka nung vue kyate ka sasete ka pui zah, ka sasete ka ki cih; Bawipaw nynh yn pya zah Bawipaw nynh phe a law vae; Bawipaw min tuh thehoyte um sah,” a ci.
22 E kya balyn hynh Job tuh sei khyh zah, Pachia kha seisah khyh.