9
Yn Thua Cih paw Siapharan
Thuasalama lungriathaete um hae paw hanlan ngaethyanaw um vae lan khyh. Langmawlya tuh Zebulun ram te Naftali ram kya theihryanaw kha a la thuakhae, thuasalama nyalang tuh rili kin a cceihpaw laanpi, Jordan vaw khuraw lang, minphuin ccangpaw hae a umnaw hae Galilee ram kha a phu-epaw lang a rae cih.Ref 9.1: Mat 4.15
Mohnaw kya a cceih hae paw
ccungccaw hae nynh
awnaw alepaw kha
a muih vae hae; marae amohnaw
ram kya a um hae paw kyakhe
awnaw tuh a ak vae.Ref 9.2: Mat 4.16; Luk 1.79
Nang nynh minphuin kha
na pungthungsah vae,
mih lung houhouh na tuasah vae hae;
loohrue lya-e lungtuanaw hawte thuasah,
ccungccaw hae nynh
luadepaw uccaw
a neeku lya hae mih lungtua hawte thuasah
namaw malang mih lungtua.
Pawccecize mih phupaw aripaw
a puihnaw hae paw ccong,
mih raw vawlan e ccong te
tuaasahtu hae kya-e ccungngue kha
Midian ccyh lya hawte
na khyapya vae hae.
Rhawdoutu hae kya-e ccukoh balyn te
chii kya ohkuhpaw boeining balyn kha
maeesoinawpaw morei hawte
u athua cih hae.
Pawccecize aening hanlan
imua lu kheit a pui vae,
ccapaw lu kheit pya ah thua oh;
aning tuh uknaw kaw a hoi cih;
amaw kha Ngaeang lan umpaw
Tuanaw pyatu, Athungpaw Pachia,
Zungzae tynpaw Paaw,
Daenaw Siapharan
cite minphu athua cih.
A uknaw kaw tuh houhouh a lethung cih,
David kya-e bawitungkhung te
a peenaw hanlan athangthya leipaw
daenaw a um cih.
Tuh-e tuh aning nynh byading te
dingnaw khate atu te
malang zungzae cia
a tynsah cih zah a uk cih.
E hynh vaaw Bawipaw nynh
lungthote a cyih cih.
 
Lysakunaw te Tuaasahkunaw kha ByapianawRef 9.7: Luk 1.32-33
Bawipaw nynh Jakob ciihan kha
bya sawnua zah, tuh-e bya tuh
Israel hae tungvaw accah;
Efraim ccungccaw hae te Samaria ram
um hae paw ccungccaw balyn nynh
tuh-e tuh a ny hae,
thuasalama minmin nynh
lysakute lungkhungte a ho hae paw tuh,
10 “Anglae inn tuh ating vae,
thuasalama lung inn lante
kae sak cih;
saikamor thaeku thing hae tuh
nge athua vae hae,
thuasalama tuh-e thing hae umnaw kyakhe
sidar thing hae khate
kae sanlae cih,” a ci hae.
11 Tukeiccuze Bawipaw nynh
minmin a rawsetu hae kha
hangthung hae zah,
mih rhaw hae kha a tuhou hae,
12 Nithua langte Siria hae,
niccaw langte Filistin hae nynh
mih khalang aw hae zah
Israel kha a laang hae.
Tuinte mah a thinrianaw tuh
daelae khyh zah,
a kuih kha po a dyng ung.
 
13 Tuh-e ccungccaw hae nynh
minmin tungvaw de a tahtupaw
kalan khe ki khyh hae,
vaaw Bawipaw kha ccung khyh hae.
14 Tukeiccuze Bawipaw nynh
Israel phin kyate alu te
aleihmae kha thuasah,
ungcci ku ange te phaeku kha thuasah
nin kheit lungkhu a bae cih;
15 lu tuh piccan hae te
sawtua lan um hae paw kha thua zah,
leihmae tuh hynbya a ccangpah hae paw
profeh hae kha nynh thua;
16 e ccungccaw hae a cciakhaetu hae nynh
minmin kha cciakhaesei hae zah,
ccungccaw hae kha mih lungnuasah hae.
17 Tukeiccuze Bawipaw nynh
mih ccangvae hae kha
ngaethyaumsah khyh hae,
ngawraw hae te nomae hae kha mah
thawccih khyh hae,
pawccecize mih balyn mawte
Pachia pawlangria lei hae paw te
hoyleinaw a rae hae paw thua zah,
ngaeepaw bya kha a ho hae.
Tuinte mah a thinrianaw tuh
daelae khyh zah,
a kuih kha po a dyng ung.
 
18 Hoyleinaw tuh maee hawte arua,
thabu te hinpawbu kha
phe ccung lan a u;
tuhpi kya-e thing hae kha u zah,
aku hae tuh maeekhuh ryte
a zouthung hae.
19 Vaaw Bawipaw thinrianaw keiccuze
ram tuh u zah,
ccungccaw hae tuh maee-unawpaw
maeelooh lang a tang hae;
lu kheit te lu kheit thawccihkuh khyh hae.
20 Mih ranglang kuih te karankute
a ae hae zemah, mih vuelaw mamin,
mih voilang kuih te a ae hae zemah,
bynlae khyh hae;
mih puiziapaw ngesaw toulou kha a ae hae;
21 Manasseh phin hae te
Efraim phin hae tuh a doukuh hae,
e phin ning hae nynh parouhte
Judah phin kha a dou hae.
Tuinte mah a thinrianaw tuh
daelae khyh zah,
a kuih kha po a dyng ung.