60
Apazaekuh hae paw Sueluanaw
Thokuh lah, awtua;
na awnaw tuh yn thua vae zah,
Bawipaw phu-enaw tuh
na tungvaw alangkuh vae.
Mohnaw nynh laephi kha
phang a bong cih zah,
marae zipingpaw mohnaw nynh
ccungccaw hae kha a bong cih hae;
thuasalama Bawipaw tuh
na tungvaw yn langkuh cih zah,
a phu-enaw tuh na tungvaw
yn langkuh cih.
Minphuin hae tuh na awnaw kalan
oun thua cih hae zah,
siapharan hae tuh na kya-e
awkhua takaw e awnaw kalan
oun thua cih hae.
 
Ngawdo lah, na pepan balyn kha dotua;
minmin balyn tuh pynkheihlan
sueluakuh hae zah
na kalan oun cceih hae;
na ccapaw hae tuh asawnaw kyate
oun cceih cih hae zah,
na ccanung hae tuh
imua do-oihtu hae nynh
mih kuih te a dua cih hae.
Tetuh na muih cih zah,
myarya na lungtua cih,
na bung thyngku biate
na lung apaw cih,
pawccecize rili lungkhu e
hoirumnaw tuh na kalan
oun cciakhae cih hae zah,
minphuin hae sisua tuh
na kalan yn thua cih.
Kalauh patae tuh na kalan
oun thua cih hae,
Midian ram te Efah ram kyate
anopaw kalauh hae nynh
ae thuanua cih hae;
Sheba ram e hae balyn tuh
oun thua cih hae.
Minmin nynh sui te frankinsen kha
oun phu cih hae zah,
Bawipaw thehoysahnaw kha
a siakhae cih hae.
Kedar ram e tuuphu balyn tuh
na kalan oun sueluakuh cih hae,
Nebaioth ram e tuutepaw hae nynh
na rya ae lawpah cih hae;
khah-e hae kha ka silawhang vawlan
mang lan nawccaw athua cih hae zah,
aphu-epaw ka beikinn kha
phu ka esah cih.
 
Maeking hawte thuasah,
mih bu kalan a zou hae paw
vahu hae hawte thuasah
a zou hae paw khuh-e hae khuh
hum hae mou?
Bawipaw na Pachia min hanlan thuasah,
Israel Pachia Athyaapaw hanlan thuasah
na ccaaw hae kha mih sui mih ngun ryte
asawnaw kyate cciakhae khylan
rili khunglang e ram hae nynh
kae kha yn ngaw hae zah,
Tarshih ccingbaw hae tuh
masaty nynh thua,
pawccecize aning nynh nang kha
phu-enaw ae pya vae.
10 Ramccang hae nynh
nae khualungrua kha
ae raepah cih oh zah,
mih siapharan hae nynh
nanning kha rya ae lawpah cih oh;
pawccecize ka thinria zah
nanning kha de kae tah oh,
thuasalama ka thawccinaw liate
nae tungvaw ngaethya
kae umsah vae oh.
11 Minphuin ccangpaw hae tuh
mih siapharan hae nynh
ataruinte cciakhaekuteRef 60.11: Bya 21.25-26
mih sisua kha nae kalan
oun cciakhae nawlan hae,
nae koikua hae kha
khuazi khuadae khaw leite
zungzae po hungkuh sah.
12 Na rya ae lawpah cih leipaw
ram te peenaw tuh aroh cih;
tuhcihawpaw ram hae tuh
marya mawte ro athua cih hae.
13 Ka beikinnthyaa hmin kha
puithyasah khylan,
Lebanon phu-enaw athuapaw
saipres thing, plane thing te
maeccaw thing hae tuh
na kya oun thua cih hae;
ka ccu ka khangnaw hmin kha
a phu ka esah cih.
14 Nang ae tuaa ae sah hae paw
mih ciihan hae tuh
oun thua cih hae zah
ae bakhungpah cih hae,
nang ae theihrya hae paw balyn tuh
na cculeihpaw khe
a bakhung cih hae;
minmin nynh nang kha
Bawipaw Khuapi,Ref 60.14: Bya 3.9
Israel Pachia Athyaapaw kya-e
Zion khua cite ae ko cih hae.
15 Lu kheit nynh sanmah
na kya po ccia lei lan ciate
nang kha ae hua hae zah
ae vua hae zemah,
zungzae alesaepaw,
she kheit koute she kheit
lungtuanaw hmin lang kae rae cih.
16 Minphuin hae mateitui kha
na neih cih zah,
siapharan hae matei kha na zu cih,
kae, Bawipaw tuh nang ae Khumtu,
nang ae Shawkhawtu te
Jakob Pachia Athungpaw
ka thuapaw kha na nyh cih.
 
17 Sohin ccelang sui kha
kae thuakhaepah cih zah,
sivaw ccelang ngun,
thingphe ccelang sohin,
lung ccelang sivaw kha
kae thuakhaepah cih.
Nang ae uktu lang Daenaw kha
kae nungpah cih zah,
na ryalaw a nawtu lang
Dingnaw kha kae nungpah cih.
18 Na ram lungkhu kya
puathonaw the kha thuasah,
na ramri lungkhu kya
vawsaw riathaenaw te
ronaw the kha thuasah
thae thua vae lan khyh;
na khualungrua kha Khumnaw cite
na ko cih zah,
na koikua hae kha
Thehoynaw cite na ko cih.
Pachia tuh Zion Phu-enaw
19 Khuadae kya khuanin tuh
na awnaw thua vae lan khyh zahRef 60.19: Bya 21.23, 22.5
khuazi kya sawpaw nynh
awnaw ae pya vae lan khyh;
pawccecize Bawipaw tuh
zungzae tynpaw na awnaw athua cih zah,
na Pachia tuh na phu-enaw athua cih.
20 Na khuanin tuh ccah vae lan khyh,
na sawpaw mah
nulang sihkuh vae lan khyh;
pawccecize Bawipaw tuh
zungzae tynpaw na awnaw athua cih zah,
na raw na khuinaw ccyh tuh
athang vae cih.
21 Na ccungccaw hae balyn tuh
a ding cih hae zah,
ram kha zungzae a pee cih hae.
Kae kha phu-esah ka thua nawlan,
minmin tuh ka linpaw atoihpaw,
ka kuihhae nynh thua hae.
22 Minmin kyaze adih huapaw tuh
phin phinkheit lang a tang cih zah,
anyaa huapaw lu kheit tuh
athungpaw minphuin phuin kheit lang
a tang cih;
kae tuh Bawipaw nynh ka thua;
accyh azaw te tuh-e tuh
arangte ka ccingsah cih.