6
Pachia nynh Isaiah A Ko
Uzziah siapharan a chi kum khe, hang zah a sung-epaw bawitungkhung kya a haungpaw Bawipaw kha ka muih; a boeining rae tuh beikinn kya phe abeih.Ref 6.1: 2Si 15.7; 2Sh 26.23 Vaawccungccaw hae tuh a pe khe um hae zah, sake ccangtaruh cci a hoi hae: sake ccangning te mih mae kha bongkuh hae zah, ccangpaw ccangning te mih ccu kha a bongku hae, te ccangpaw ccangning khate a zou hae. Te lu kheit te lu kheit hokuh hae zah:
“Athyaa, athyaa, vaaw Bawipaw tuh athyaa;
laephi pynpi tuh a phu-enaw te
phe abeih,” a ci hae.Ref 6.3: Bya 4.8
Tuh-e a sia hae paw roi keiccuze thuakawtung hae tuh hy zah, inn tuh maeekhuh te phe abeih.Ref 6.4: Bya 15.8 Te kae nynh, “Ka hanlan ngaethya lan kou um! Phe ka thang vae, pawccecize kae tuh munglae a thyaa leipaw ka thua zah, munglae a thyaa lei hae paw laku a umpaw nynh ka thua; tuhzemah ka mit te Siapharan, vaaw Bawipaw kha ka muih vae!” ka ci.
Tetuh vaawpaw lu kheit nynh silawhang vawlan e tetakia te takeihkuhpaw maee-e zaezae epaw ccangkheit kha ka kalan yn zoukhae. Tuh-e maee-e tuh ka mung kya yn nae zah: “E maee-e nynh phe ae ty vae, na cyiseinaw tuh zo vae zah, na seinaw tuh ngaethya athua vae,” a ci. Te Bawipaw nynh, “Hummou ka saw cih? Kaening hanlan hummou a cceih cih?” cite a hopaw roi kha ka thae. Te kae nynh, “E kya mang ka um; kae hynh yn saw!” ka ci. Te Bawipaw nynh, “E ccungccaw hae kalan cceih lah,
‘Ngae oh lah mah, asuilan
na nyhthya lan khyh oh;
do oh lah mah, na thaethya lan khyh oh,’
cite hopah hae.Ref 6.9-10: Mat 13.14-15; Mar 4.12; Luk 8.10; Joh 12.40; Loc 28.26-27
10 E ccungccaw hae nynh mih mit te
a muih khyh nawlan hae te
mih nakaring te a thae khyh nawlan hae te
mih thinlung te
a nythya khyh nawlan hae te
maeleihkute a dan khyh nawlan hae,
mih thinlung kha ngaeesah hae,
mih nawpansah hae lah,
mih mit kha masisah hae,” a ci.
11 Tetuh kae nynh, “Pou Bawipaw ,
hohsemou aro cih?” ka ci.
Bawipaw nynh, “Khuapi hae tuh
roh hae zah khuaccaaw hae um leite
accawnghan makhia cia,
te inn hae tuh ccungccaw um leite
accawnghan hae makhia cia,
ram tuh ccungccaw phe adae makhia cia,
12 te Bawipaw nynh ccungccaw miakaw kha
asawnaw lang saw hae zah,
ram lungkhu kya kharouh accawnghan
makhia cia tuh-e ccyh tuh aro cih.
13 Ram lungkhu ccungccaw pum haw kyaze
pum kheit a la lae ung ze heize,
tuh-e a laepaw tuh ro athua ung cih,
tuh-e a laepaw tuh maeccaw ku te
phaesi ku kha nge thua hae zah,
mih ccungmuing tuh
a thadyn hawte athua cih,” a ci.
Athyaapaw ccacii tuh
tuh-e ccungmuing tuh nynh thua.