55
Hiin Hoynaw kalan Konaw
Pou tui a hawpaw miakaw,
tui a umnaw lang rangtua oh;
phua a hoi lei hae paw,
rang oh lah, rekute aetua oh!
Rang oh lah, misutui te mateitui kha
phua leite, amee leite reku tua oh.Ref 55.1: Bya 21.6, 22.17
Pawccemou looh thua leipaw hanlan
nae phua kha na mang oh zah,
byn lan a um leipaw hanlan
nae ryalaw mee kha
na thangsah han oh?
Ka bya hynh hoyte
yn ngaepah oh lah,
ahoypaw looh kha ae oh,
athuapaw aepaw kyakhe
nae lungrythuakhaekuh sah.
Nae nakaring kha
oun tuakuh oh lah,
ka kalan rang oh;
na hiin ccaw oh ngaetua oh.Ref 55.3: Loc 13.34
Nanning ryte zungzae tynpaw
byakinnaw kha ka rae cih zah,
David kya ka kinpyakupaw atynpaw
sungsahnaw kha kae pya cih oh.
Dotua oh, David kha
ccungccaw hae hanlan
ccaekia lang ka rae zah,
cciakhaetu te kawpyatu lang
ka rae vae.
Dotua, na ny leipaw minphuin hae kha
na ko cih hae,
Israel Pachia Athyaapaw,
Bawipaw na Pachia liate,
nang ae nyh leipaw minphuin hae nynh
na kalan oun ccue cih hae,
pawccecize tuh-e Pachia nynh
nang kha phu-enaw ae pya vae.
 
Bawipaw kha muih kho
a um lyakhe ccung oh,
anaenaw a um lyakhe
amaw kalan sawsang oh;
ccungccaw hoylei hae paw nynh
mih laanpi kha vua hae sah lah,
a ding lei hae paw nynh
mih tuanaw kha vua hae sah;
minmin nynh Bawipaw kalan
naekuh hae sah, tuhteze nynh
minmin kha thaw a ccih cih hae,
ah Pachia kalan maekuh hae sah,
tuhteze nynh seinaw kha marya
a ngaethya cih hae.
Ka tuanaw tuh nae tuanaw te lokuh khyh,
ka cyisahnaw mah
nae cyisahnaw te lokuh khyh.
Vaawlui tuh laephi laeze
ahanghua hawte,
ka cyisahnaw tuh nae cyisahnaw laeze
hanghua zah, ka tuanaw tuh
nae tuanaw laeze ahanghua.
 
10 Khuaa te vuiraw tuh
vaawlang te yn ccahbung zah,
laephi nynh aku posah zah
athae a thaesah nawlan te
ccacii a ccoutu kha ccacii pya zah,
looh a aetu kha looh a pya nawlan,
laephi kha tui a ciasah
mawlaezung ki khyh,Ref 55.10: 2Ko 9.10
11 tuhawte nynh ka khalang kyate
a poupaw ka bya tuh athua cih;
alakaw lante kamaw kalan
yn ki lan khyh,
ka eenaw kha a ccingsah cih zah,
ka sawnuathepaw kha
a ccingsah cih.
 
12 Nanning tuh lungtuate
na pou cih oh zah,
daenaw te kikhae thui
na thua cih oh;
mua hae te sangpyng hae tuh
nae malang khe lungtuate
hlaw a sah cih hae,
loram kya-e thingku balyn tuh
mih kuih a bia cih hae.
13 Hinpaw ku a umnaw khe
maeccaw ku a poru cih;
thabu a umnaw khe
amynkhuhpaw martal ku a poru cih;
tuh-e tuh Bawipaw malang
liathuinaw athua cih zah,
azo kho leipaw zungzae tynpaw
muihsahnaw athua cih.