50
Bawipaw nynh hynhte a ho:
Nae nung kha ccanglang
ka cciasahnawpaw,
myakunawpaw ccaw kha teimou a um?
Laebah ka um keiccuze laebah
yn umsahtupaw hum kalan mou
nanning kha kae zua oh?
Kae zua khyh oh.
Nae seinaw keiccuze nynh
nanning kha zua na thua oh zah,
nae cyiseimenaw keiccuze nynh
nae nung kha ccanglang ka cciasah.
Kae he ka thua tuh,
pawccemou ccungccaw a um khyh?
He ka ko hae tuh pawccemou
lu kheit nynh sanmah yn oi khyh hae?
Kae tuh shawkhaw kho lei lan ciate
ka kuih adyn tou?
Tuhkhyhze luesahnaw lanpaw
huhan ka hoi khyh tou?
Rili kha kaw ka pya zah karae ka rousah,
vaw hae kha laesia ram lang ka tangsah;
tui a um khyh keiccuze
mih ngasaw hae tuh athuh hae,
tui kanmawte a chih hae.
Vaawlui kha amanpaw boeining
ka lawsakuh zah,
buriboei kha ka bongsaku.
 
Ryalahtu hae Zakawsangsakunaw
A lungthangpaw kha
bya te thawzung pyathya nawlan
Bawipaw PACHIA nynh
ccangpya thyanaw
munglae kha yn pya vae.
Awkhua takyh kya kae kha yn tho,
ccawccangkuhpaw hawte
bya ngae khylan yn tho.
Bawipaw PACHIA nynh
ka nakaring kha yn uasah zah,
kae nynh mah kaw-ei leite
nulang ka sihtawkuh khyh.
Kae yn zia hae paw kha
ka ke ka tuapakuh hae zah,
ka khawming yn khaee hae paw kha
ka byaki ka tuapyaku hae.
Saryakunaw kyate thuasah,
tuing te thoikunaw kyate thuasah
ka mae kha ccanglang ka hawi khyh.Ref 50.6: Mat 26.67; Mar 14.65
 
Bawipaw PACHIA nynh kae kha
yn bawm keiccuze
thethyanaw ka ccou khyh;
tukeiccuze ka mae kha
rihlung hawte ka nung zah,
maethyanaw ka ccou lan khyh
cipaw ka ny;
kae kha thyaa yn ccousahpaw tuh
ka pe a um.
Hum nynh mou yn rawse ngan cih?
Thadynkhaeku tua oh sih.
Kae yn rawse hae paw tuh hum hae mou?
Yn rawsetua hae sah.Ref 50.8-9: Rom 8.33-34
Kae yn bawmtupaw tuh
Bawipaw PACHIA nynh thua;
hum nynh mou sei yn be ngan cih?
Mih balynte boeining hawte a pue cih hae;
laehaw nynh marya a ae cih hae.
 
10 Nanning laku kyaze hummou
Bawipaw kha rih zah,
a ryalahtupaw bya kha a ngae?
Mohnaw kya cceih zah
awnaw a hoi leipaw nynh
Bawipaw min kha doliakuh sah lah,
a Pachia kya reihpekuh sah.
11 Nanning balyn tuh maee a tuatu,
maee a ruasahtu nynh na thua oh.
Nae maeesoi kya te na tua oh paw
maee lungkhu khe cceih oh!
Tuaasahkunaw teingte na toukuh cih oh.
E hynh nanning nynh ka kuih kyate
na mue lan oh paw nynh thua.