45
Pachia nynh A Nawpaw Sairas
1 Bawipaw nynh Sairas kha
siapharan lang chitui a thuh,
minphuin hae kha tae khylan te
siapharan hae boeining kha
khah khylan,
koikua hae kha khaw leite
thuakaw hae kha hung khylan
Sairas a ranglang kuih kha
Bawipaw nynh kyng zah
a hopyapaw tuh:
2 Na malang ka cceih cih zah,
mua hae kha phe nging lan
ka tuphae cih,
sohin thuakaw hae kha
zoihtatyh lan ka khya cih zah,
sivaccaw hae kha ka khya cih,
3 mohnaw lungkhu e sisua hae te
alang leinaw hmin kya thuruhpaw
hoirumnaw kha kae pya cih,
tuhteze nynh kae hynh Bawipaw ,
na min te ae kotupaw Israel Pachia nynh
ka thua cipaw nae nyh cih.
4 Ka ryalahtu Jakob te
ka popaw Israel hanlan
na min te kae ko zah,
nae ny khyh zemah
na min thawpaw kha kae phu.
5 Kae tuh Bawipaw nynh ka thua,
te ccangpaw um khyh;
kamaw laelan ccangpaw Pachia um khyh.
kae hynh nae ny khyh zemah
thungnaw kae pya,
6 tuhteze nynh nithua lang e hae te
niccaw lang e hae nynh
kamaw laelan humhung mah
um khyh cipaw a nyh cih hae;
kae tuh Bawipaw nynh ka thua,
ccangpaw um vae khyh.
7 Awnaw kha ka rae zah,
mohnaw kha mah ka rae,
hiin hoynaw kha ka rae zah,
ngaethyanaw kha mah ka rae.
Kae, Bawipaw nynh
atyn-are balyn hynh ka rae.
8 Pou vaawlui hae,
avaw langte khuaarawtua,
vaawlui hae nynh dingnaw kha
khuaa lang rawsah hae sah;
laephi hungkuh sah lah,
khumnaw kha pouthung sah,
dingnaw kha mah yn pothung sah;
kae, Bawipaw nynh
9 Amaw a Raetupaw kha
a rawsepaw hanlan te
ang raetupaw kha a rawsepaw
laephi ang hanlan tuh
ngaethya lan kou um!
Anglae nynh amaw a raetupaw kha,
“Pawmou na rae?
Na raepaw hynh kyngnawpaw um khyh,”
cite a hopah zawtou?Ref 45.9: Rom 9.20
10 A paaw kha, “Paw ccungccaw mou
na saah?” cite khia zah,
a nung kha, “Paw ccaaw mou na saah?”
cite a khiatupaw hanlan
ngaethya lan kou um.
11 Bawipaw , Israel Pachia Athyaapaw,
Israel a Raetupaw nynh a hopaw tuh:
Pawccemou ka ccaaw hae kong kha
nae khia oh?
Pawccemou ka ryalawnaw kong kha
kaw nae pya oh?
12 Laephi kha ka rae zah,
laephi vawlan khe
ccungccaw kha ka rae;
ka kuih te vaawlui kha
tharae ka daw zah,
vaawlui kya a umpaw balyn kha
kaw ka pya.
13 Sairas kha dingnaw liate
ka langsaku vae,
a laanpi balyn kha ka lawsah cih;
aning nynh ka khuapi kha
a rae cih zah, amee khyhze
lasung kha lawku leite,
a kyng hae paw ka ccungccaw hae kha
a luesah cih hae, cite
vaaw Bawipaw nynh a ho.
14 Te Bawipaw nynh a hopaw tuh:
Izip sisua, Ethiopia ram e kungkunaw te
mih pynrua hangpaw Seba hae nynh
kungkunaw hae paw uccaw hae tuh
na kalan a thua cih zah
na uccaw lang a tang cih,
minmin nynh nang kha
ae zui cih hae;
sivawrui te khiikute
oun cceih cih hae zah,
na malang a bakhung cih hae,
nang kha, “Pachia tuh
namaw kya rou nynh a um,
tuh-e Pachia laelan
ccangpaw Pachia um khyh,”
cite ae bohkuh cih hae.
15 Pou Israel Pachia, Khumtu,
thanccingte, nang tuh amaw te
amaw a rekuhpaw Pachia nynh na thua.
16 Zohtuh a raetu hae balyn tuh
maethyanaw mue hae zah
mih ngaeangthua,
pynkheihlan thethyanaw a ccou hae.
17 Thuasalama Bawipaw nynh Israel kha
zungzae tynpaw khumnaw khate a khum;
nanning tuh maethyanaw te
ngaeangthuanaw kha
zungzae cia na mue lan khyh oh.
18 Vaawlui a raetupaw Bawipaw ,
laephi kha rae zah a tynsahpaw,
laephi kha alakaw lan rae leite,
ahysuepaw nynh a um nawlan
a raetupaw Pachia nynh a hopaw tuh:
Kae tuh Bawipaw nynh ka thua,
kamaw laelan ccangpaw Pachia um khyh.
19 Aphiruh lante bya ka ho khyh,
amohnaw hmin kya ka ho khyh;
“Kae hynh alakawpaw hmin kya
yn ccung oh,” cite Jakob ciihan hae kha
ka hopah khyh hae.
Kae, Bawipaw nynh byaccing kha ka ho,
akyhpaw kha ka ho.
Zohtuh hae nynh Babilon Khum Kho Khyh
20 Nanning nynh sueluakuh oh lah,
pynkheihlan oun cceih oh,
minphuin hae kyaze
a hiinhy hae paw nanning,
oun naeku tua oh!
Thing te raekuhpaw mih zohtuh hae kha
khiakhaekute a khum kho
leipaw pachia kalan
saw a sang hae paw tuh
hawnaw hoi khyh hae.
21 Nae byathan kha oun thuakhae
oh lah, hotua oh;
minmin nynh mih tuanaw kha
pynkheihlan hotua hae sah!
E byathan hynh langmawlya te
hum nynh mou a la ho?
Hum nynh mou
khawlya te a la hodae?
Kae, Bawipaw nynh
ka la ho khyh tou?
Kamaw laelan ccangpaw
Pachia um khyh,
kae tuh adingpaw Pachia te
Khumtu nynh ka thua;
kamaw laelan humhung mah um khyh.
22 Laephi adianaw e ccungccaw balyn,
ka kalan oun maeleihkuh oh lah,
khum na thua cih oh!
Pawccecize kae tuh
Pachia nynh ka thua,
ccangpaw Pachia um khyh.
23 “Ccungccaw miakaw nynh
ka malang ccukharu a tung cih hae,
mih munglae raveihte
bya a kinkuh cih hae,” cite
kamaw ccaccei nynh
byakinkute ka ho vae,
tuh-e tuh ka mung kyate
dingnaw te toikuh zah,
yn kithui cih leipaw bya nynh thua.Ref 45.23: Rom 14.11; Fil 2.10-11
24 Bawipaw kya rou nynh dingnaw te
thawzung a um, cite a ho cih hae;
aning tungvaw mih thinriapaw balyn tuh
amaw kalan a cceih cih hae zah
maethyanaw a mue cih hae.
25 Bawipaw liate Israel ciihan balyn tuh
taenaw a mue cih hae zah