44
Israel tungvaw Pachia Hythuanaw
Ka ryalahtu Pou Jakob,
ka popaw Israel, atu ngaetua!
Nang ae raetupaw, vue lungkhu kya
nang ae raetupaw te ae bawm cih paw
Bawipaw nynh a hopaw tuh:
Ka ryalahtu pou Jakob,
ka popaw Jeshurun, rih nan.
Pawccecize tui ahawpaw ram kha
tui ka bu cih zah,
aroupaw laephi kyakhe
vaw ka luasah cih;
na ciihan hae tungvaw kya
ka muisaw kha ka bu cih zah,
na ccaaw na no hae tungvaw kya
ka hythuanaw kha ka bu cih.
Minmin tuh hinlalyhpaw lonua hawte
a toih cih hae zah,
vawkhu kin e su ku hawte
a toih cih hae.
Lu kheit nynh, “Kae tuh
Bawipaw ccungccaw
nynh ka thua,” cite a ho cih zah,
ccangpaw lu kheit nynh
Jakob min kha a phukuh cih,
ccangpaw lu kheit nynh
a kuih kyakhe, “Bawipaw kya-e,”
cite azeikuh cih zah,
Israel min kha a phukuh cih.
 
Israel Siapharan Bawipaw ,
amaw a Shawkhawtu,
vaaw Bawipaw nynh a hopaw tuh:
Kae tuh masaty te
nyathyakou nynh ka thua;
kamaw laelan
ccangpaw pachia um khyh.Ref 44.6: Isa 48.12; Bya 1.17, 22.13
Kae yn lopaw hummou a um?
Aning nynh hotua sah,
langsakuh tua sah lah,
ka malang nungtua sah.
Langmaw acyihkuh vae paw te
malang yn cyihkuh cih paw kha
hummou a ho?
Yn cyihkuh cih paw kha
kaening oun hopya tua sah.
Rih nan oh lah,
nae thinphang nan sah;
langmawlya mawte
kae hopah khyh oh tou?
Nanning tuh ka ccaekia hae nynh
na thua oh!
Kamaw laelan ccangpaw
Pachia a um tou?
Ccangpaw Lungpi um khyh;
lu kheit sanmah ka nyh khyh.
 
Athane leipaw Zohtuh Beiknaw
Zohtuh a raetu hae balyn tuh accakaepaw nynh thua hae, minmin nynh mih lungrythuapaw uccaw hae tuh thanenaw um khyh; mih ccaekia hae tuh ngawmuih khyh hae zah thaethya khyh hae. Tukeiccuze minmin tuh maethyanaw a mue cih hae. 10 Hoynaw a rae kho leipaw zohtuh khyhze pachia kha hum nynh mou a rae? 11 Tuh-e zohtuh a beik hae paw balyn tuh maethyanaw a mue cih hae; tuh-e a raetu hae tuh ccungccaw maw kha nynh hung athua hae. Mih balyn te sueluakuh hae sah lah, thadyn hae sah; thinphang bungzoute a um cih hae zah maethyanaw a mue cih hae.
12 Sivasuhpaw nynh hae kha suh khylan, maeephu lungkhu uing zah, a kuih thawzung thuate, khynlyng te a deih, a vuelaw zah a thawzyabung, tui neih khyh zah a thawbang. 13 Lehccama nynh aring ring zah syntawnawpaw te a syntaw, te a zunghe khate rae zah, kompa khate syntawnaw a rae; hminthyaa kya nung khylan ccungccaw muinsan lante ccungccaw puithya hawkhate a rae. 14 Aning nynh ramkaw e sidar ku khyhze ahoypaw phaesi ku khyhze maeccaw ku kha nge zah a mang. Sidar ku kha lin zah, tuh-e aku tuh khuaatui nynh a lesah thung. 15 Tetuh tuh-e aku tuh maeething lang mang kho athua. Tuh-e aku kya-e abang kha lah zah amaw maee eku nawlan a mang, maeetua zah sanlou kha a thou. Te pachia kha raekuh zah a beik, zohtuh lang suekuh zah, tuh-e zohtuh malang khe a bakhung. 16 Tuh-e thing angankuh kha maeetua nawlan a mang; tuhlaepaw angankuh khate sawthungkuh zah phe byn lan a ae. Maee eku nawlan mang zah, “Alei, kae tuh ka khualung vae, maee ka ekuh kho vae!” a ci.
17 Tuhlaepaw thing khate pachia, a zohtuh kha raekuh zah, bakhungnua zah a beik; tuh-e kalan khe sawsang zah, “Ka pachia na thua keiccuze beih yn khumtua!” a cipya.
18 Tuh-e ccungccapaw tuh nyh khyh zah thaethya khyh; pawccecize a muih kho khyh nawlan a mit kha masisah zah, a thaethya khyh nawlan a thinlung kha marae a ping. 19 Aning nynh, “Thing angankuh kha maeething lang ka mang zah sanlou ka thounaw, saw ka thungnah zah ka ae. Te alaepaw thing kha anungsikuhpaw lang ka rae cih tou? Thingtung malang khe ka bakhung lan accan tou?” cipaw tuasethyanaw, hawnaw te nythyanaw hoi khyh. 20 Aning nynh buhhaw kha a ae; angaeepaw thinlung nynh amaw kha a cciakhaesei vae, amaw te amaw kha khumkuh kho khyh, “Ka ranglang kuih kya umpaw e uccaw hynh lingkunaw thua khyh tou?” cipaw nyh kho khyh.
 
Israel kha Ning Khyh
21 Pou Jakob, pou Israel,
e uccaw hae hynh ning nan,
pawccecize nang tuh
ka ryalahtu nynh na thua;
nang kha kae raeku, nang tuh
ka ryalahtu nynh na thua.
Pou Israel, nang kha
kae ning lan khyh.
22 Na cyiseimenaw kha
maeking hawte
ka zosah vae zah, na seinaw kha
tuihu hawte ka zosah vae;
ka kalan yn ki ccavae,
nang kha kae shawkhaw vae.
 
23 Pou vaawlui hae, hlawsah oh,
pawccecize Bawipaw nynh
tuh-e tuh phe a rae vae;
laephi akhunaw hmin hae, siatua oh.
Pou mua hae, pou tuhpi hae te
tuin kya umpaw
thingku miakaw, hlawsahte roisawtua oh!
Pawccecize Bawipaw nynh
Jakob kha phe shawkhaw vae zah,
Israel liate amaw kha
thehoysah athua cih.
 
24 Nang ae Shawkhawtu,
vue lungkhu kya nang ae raetupaw
Bawipaw nynh a hopaw tuh:
Kae tuh atyn-are a raetu
Bawipaw nynh ka thua,
vaawlui kha ka makhaete tharae ka daw zah,
laephi kha kamaw ccaccei nynh ka rae.
25 Kuihdothya hae paw nynh
hynbya a ho hae paw kha ka roh zah,
beidin athya hae paw kha
ka ngaeesah hae;
ahaw hae paw kha ka buleih hae zah,
mih hawnaw kha
ngaeenaw lang ka tangsah;Ref 44.25: 1Ko 1.20
26 ka ryalahtupaw bya kha ka tynsah zah,
ka locceihtu nynh
a hodaepaw kha ka ccingsah;
Jerusalem khua kha, “Na kya
ccungccaw a um cih,” ka cipya,
Judah khuapi hae kyakhe,
“Nanning kha sakthui na thua cih oh zah,
arohpaw kha ka thadynsah
thui cih,” ka cipya hae;
27 rili kha, “Karae na rou cih—
na kya-e vawpi hae kha
ka rousah cih hae,” ka cipya;
28 Sairas kha, “Nang tuh
ka tuurintu na thua zah,
ka eenaw balyn kha
na ccingsah cih,” ka cipya;
Jerusalem kha, “Nang tuh raethui
na thua cih,” ka cipya;
beikinn kha, “Na thonaw aleihpaw kha
bing athua cih,” ka cipya.Ref 44.28: 2Sh 36.23; Ezr 1.2