40
Pachia Ccungccaw hae Lungtangnaw Mue hae
1 Lungtangnaw pya oh,
ka ccungccaw hae kha
lungtangnaw pya oh,
cite nae Pachia nynh a ci.
2 A ryalaw ccyh tuh phe a thangsah vae,
a seinaw mee kha pyaru athua vae,
a seinaw balyn hanlan
Bawipaw kuih kyate
leit ning a teing vae,
cite Jerusalem kha byanepaw te
3 Roi roikheit ccae zah:
“Ramkaw kya Bawipaw
laanpi kha paccynpah oh,
ah Pachia hanlan laesia ram kya
laanpi kha lawbabin lan raepah oh.Ref 40.3: Mat 3.3; Mar 1.3; Joh 1.23Ref 40.3-5: Luk 3.4-6
4 Akhupaw miakaw kha
bia athua cih zah,
mua te sangpyng miakaw kha
tuphae athua cih;
akoupaw laanpi kha
lawbabin lan rae athua cih zah,
karynkare a umpaw kha
nginsah athua cih.
5 Tetuh Bawipaw phu-enaw kha
alangkuh cih zah,
ccungccaw balyn nynh
pynkheihlan a muih cih hae,
pawccecize Bawipaw munglae nynh
6 Roi roikheit nynh, “Siakhae oh!” a ci.
Kae nynh, “Pawmou ka siakhae cih?” ka ci.
Ccungccaw balyn hynh
lonua nynh thua hae,
mih phu-enaw tuh ramkaw e
haetapaw hawte nynh thua.Ref 40.6-8: Jam 1.10-11; 1Pe 1.24-25
7 Bawipaw hy nynh he a mung vae ze,
lonua tuh naan zah,
haetapaw tuh akhuakuh,
accaccingte ccungccaw hae tuh
lonua nynh thua hae.
8 Lonua tuh naan zah
haetapaw tuh akhuakuh;
thuasalama ah Pachia bya tuh
zungzae atyn cih.
9 Thehoypaw yn phutu, pou Zion,
mua ahangpaw kalan kaetua;
thehoypaw yn phutu, pou Jerusalem,
thawte na roisawtua, ri leite siatua;
Judah khuapi hae kha,
“E kya nae Pachia phang um!”
cite hopah hae.
10 Dotua, Bawipaw PACHIA tuh
thungnaw te yn thua cih zah,
a thawzung te a uk cih hae;
a ryalaw mee tuh amaw kya um zah,
a lasung tuh amaw malang a um.Ref 40.10: Isa 62.11; Bya 22.12
11 Tuurinpaw hawte a tuuphu kha
looh a dang cih; tuutaw hae kha
a kuih te a dua cih hae,
a by kya a pompae cih hae zah,
a taw umpaw tuupinung hae kha
zyazyate a cciakhae cih hae.Ref 40.11: Eze 34.15; Joh 10.11
12 Tui kha a kuihphe te a tou khopaw,
vaawlui kha a khaw te
a khaw khopaw,
vuiping kha tounawpaw te
a ruin khopaw,
mua hae te sangpyng hae kha
zawccu te a khin khopaw,
hummou a um?
13 Hynhte cyih cite
Bawipaw Muisaw kha tuanaw
a hopah khopaw a um tou?
A ccangpah khotu te
tuanaw a pya khotu a um tou?Ref 40.13: Rom 11.34; 1Ko 2.16
14 Hum te mou tuanaw a suelua hae?
Hum nynh mou dingnaw
laanpi kha a ccangpah?
Hum nynh mou hawnaw kha
ccangpah zah,
nythyanaw laanpi kha a muihsah?
15 Minphuin hae heize bangting kyate
a ccawpaw tui hawte thua hae zah,
zawccu vawlan a umpaw
vuiping hawte nynh tua athua hae;
tuikoih hae tuh zawbahaepaw
vuiping hawte nynh athua hae.
16 Lebanon ramkaw kya umpaw
sarangpaw hae tuh maee-ute silawnaw
lang zaw khyh,
Lebanon ramkaw e thing hae tuh
maeetua nawlan zaw khyh.
17 Minphuin balyn hynh
amaw malang tuh
paw sanmah thua khyh hae;
minmin tuh accakaepaw te
pawpaw san a um leipaw laeze
azya huapaw lang nynh a ria hae.
18 Pachia kha hum te mou
na touse kho cih?
pawcihawpaw muinsan te mou
amaw kha na khinkhia kho cih?Ref 40.18-19: Loc 17.29
19 Zohtuh khate tou? Zohtuh tuh
a kuihhae hoypaw nynh rae zah,
sui alaeethyapaw nynh
sui te a thei koute, ngun rui kha a sui.
20 Sui te ngun ahlu a taening leipaw nynh
amawe cih leipaw
thing hoypaw kha a poku;
te akhuliakuh cih leipaw
zohtuh kha thadynsah khylan,
a kuihhae hoypaw
21 Na nyh khyh oh tou?
Na thae khyh oh tou?
Langmawlya te ae hopah khyh oh tou?
Laephi athotakaw lya mawte
na thaethya khyh oh tou?
22 Aning tuh laephi apyngnaw
luki khe a haung,
laephi vawlan a umpaw
ccungccaw hae tuh
tungkhipaw hawte nynh athua hae;
vaawlui kha boei hawte
tharae daw zah,
umnawpaw bu hawte a daw;
23 Athungpaw uktu bawi hae kha
sahbung hae zah, laephi uktu hae kha
accakaepaw lang a tangsah hae.
24 Minmin tuh ccou sasaw kyalya te
hung ccoukupaw aku,
lin sasaw kyalya te
hung linkupaw aku taraw thua hae zah,
atharui tuh laephi kya tee sasaw kyalya te
hung a teepaw aku nynh thua hae,
Bawipaw nynh minmin kha
he a mung hae tuh, karae rou hae zah,
khise nynh ccatanphue hawte a mung hae.
25 Tukeiccuze kae kha hum te mou
nae khinkhia cih?
Kae te alokuhpaw hummou a um? cite
Athyaapaw Pachia nynh a ci.
26 Ahangnaw langkhe dothung oh lah,
muihtua oh:
Khuh-e hae khuh hummou a rae?
Mih phupi kha a cciakhaetu hae paw nynh
minmin kha accanlu phe ria hae zah,
mih min te pong a ko hae;
a thungnaw tuh myaryamaw le zah,
huhan te phe abia keiccuze
ccangkheit sanmah zo khyh.
27 Pou Jakob, Pou Israel,
“Bawipaw nynh ka laanpi kha nyh khyh,
ka Pachia nynh mue lan ka ccanpaw kha
pawlang yn riapah khyh,” cite
pawccemou na ho?
28 Na nyh khyh oh tou?
Na thae khyh oh tou?
Bawipaw tuh zungzae tynpaw
Pachia nynh thua,
laephi adianaw cia Raetu nynh thua.
Aning tuh a thawbang khyh zah
a thawzya khyh;
a hawnaw tuh nythya kho thua khyh.
29 Bawipaw nynh mih thawbangpaw kha
thawzung pya hae zah,
mih thawzyapaw kha thungnaw a pya hae.
30 Zawthaw hae heize mih thawthang cih zah
a bang cih hae,
ccangvae hae tuh mih thawbang;
31 thuasalama Bawipaw
a ngaehoikuh hae paw tuh
thawzung thawpaw a hoi cih hae,
mosipi hawte mih sake te
a zouthung cih hae,
a ccue hae ze bang lan khyh hae,
a ccia hae zemah mih thawthang lan khyh.