37
Hezekiah nynh Isaiah Tuanaw A Ngia
(2Si 19.1-7)
1 Hezekiah Siapharan nynh tuh-e bya kha he a thae te, a boeining kha seii zah buriboei kha a zingku, te Bawipaw beikinn lang a cceih.
2 Siapharan inn do-oihtu Eliakim, ryaccinkhan Shebna te buriboei a zingkuh hae paw ranpibawi piccanhua hae kha Amoz ccapaw profeh Isaiah kalan a saw hae.
3 Minmin nynh Isaiah kyakhe, “Hezekiah nynh a hopaw bya tuh: Atunin tuh ngaethya nin, thuihei nin te thethya nin nynh thua; imua pui zaw zah a pui nawlan thawzung um khyh.
4 Ahiinpaw Pachia kha sarya khylan Assiria siapharan nynh yn sawpaw a ryalahtu Rabshakeh bya kha Bawipaw na Pachia nynh la thae vae sah, te Bawipaw nae Pachia nynh a thaepaw bya kha detah vae sah; tukeiccuze a laehypaw ccungccaw hae hanlan saw la sang,” a cipya hae.
5 Hezekiah Siapharan a ryalahtu hae nynh Isaiah kya he a thua hae te,
6 Isaiah nynh minmin kyakhe, “ ‘Bawipaw nynh hynhte a ho: Assiria siapharan a ryalahtu hae nynh ka thethya yn ho hae paw bya kha na thae keiccuze rih nan.
7 Aning nynh laanbya kha thae zah a ram lang a ki nawlan, a thinlung kya ka sang cih; a ram kyakhe thaloi te ka chisah cih a ci,’ cite nae bawipaw kha la hopah oh,” a cipya hae.
8 Rabshakeh tuh yn ki zah, Assiria siapharan nynh Libnah khua a tuk cciamangpaw kha a muih; pawccecize siapharan tuh Lakhish khua kyate a pou vae cipaw kha a thae vae.
9 Te Ethiopia Siapharan Tirhakah tuh Assiria rhawkaw kha dou khylan yn thokuh vae cipaw kha Assiria siapharan nynh he a thae te, locceihtu hae kha Hezekiah kalan saw hae zah,
10 “Judah Siapharan Hezekiah kha hynhte na hopah cih oh: Jerusalem tuh Assiria siapharan kuih kalan pya thua lan khyh, cite ae kinpyakupaw bya khate na Pachia kha lingsakuh nan.
11 Assiria siapharan hae nynh ram hae balyn kha khaleih roh hae zah pawtemou a cyi hae cipaw kha phe na thae vae. Na lue cih zawtou?
12 Ka minpaaw hae nynh a la ro hae paw Gozan, Haran, Rezef khua hae te Telassar khua a um hae paw Eden ccungccaw hae kha mih pachia hae nynh a khum hae zawtou?
13 Hamath siapharan, Arpad siapharan, Sefarvaim khuapi e siapharan, Hena siapharan te Ivvah siapharan kha teimou a um hae?” cite ccaw a ky.
Hezekiah A Sawsangnaw
14 Hezekiah nynh tuh-e ccaw tuh locceihtu hae kuih kyakhate lawkuh zah a ria; oute Hezekiah nynh Bawipaw beikinn lang cceihthung zah, tuh-e ccaw tuh Bawipaw malang khe a daw.
15 Hezekiah nynh Bawipaw kalan sawsang zah a hopaw tuh:
16 “Cherubim vawlan a haungpaw, pou vaaw Bawipaw , Israel Pachia, nang tuh Pachia nynh na thua, laephi vaw e peenaw balyn kyaze nang rou nynh Pachia na thua; vaaw te lae kha na rae.Ref 37.16: Exo 25.22
17 Pou Bawipaw , na nakaring kha beih yn tuakuh lah thaetua; pou Bawipaw , na mit kha dae lah beih muihtua; Sennakherib nynh ahiinpaw Pachia kha sarya khylan ccungccaw sawte a hosah hae paw bya balyn kha thaetua.
18 Thanccingte, pou Bawipaw , Assiria siapharan hae nynh minphuin hae te mih ram hae balyn kha roh hae zah,
19 mih pachia hae kha maee lungkhu a phungpya hae, tuh-e pachia hae tuh pachia thua khyh hae, ccungccaw kuih te raepaw thing te lung athua hae keiccuze ro athua vae hae.
20 Tukeiccuze, pou Bawipaw kae Pachia, kaening hynh Assiria siapharan kuih kyate oun khumtua, tuhteze nynh laephi vaw e peenaw balyn nynh, nang rou nynh Bawipaw na thua cipaw kha a nyh cih hae,” a ci.
Siapharan kalan Isaiah Byatawnaw
(2Si 19.20-37)
21 Tetuh Amoz ccapaw Isaiah nynh Hezekiah kalan ccungccaw saw hae zah, “Israel Pachia Bawipaw nynh hynhte a ho: Assiria Siapharan Sennakherib te asekuh lante ka kalan saw na sang keiccuze,
22 Bawipaw nynh aning te asekuh lante bya a hopaw tuh hynhte nynh thua:
‘Ccanung liaccady Zion nynh
nang kha pawlang ae ria khyh zah ae nuinse;
Jerusalem ccanung nynh
na nulangte a lu ae henua.
23 ‘Nang nynh hummou nuinsete
na ruin na san?
Na sianua zah lysakunaw mit te
na dopaw kha hum cite mou na tua?
Israel Pachia Athyaapaw lakha na rawse!
24 Na ryalahtu hae kha mangte
Bawipaw kha na sarya zah,
“Ka marangle patae ryte
mua ahangnaw kalan,
ahang huapaw Lebanon mua dung hae kalan
ka kaethung vae;
ahang huaccepaw a sidar ku hae te
ahoy huaccepaw a maeccaw ku hae kha
ka nge hae; ahang huaccenaw,
thing athaaw huaccenaw ramkaw kya
phe ka thua.
25 Tuisung ka thae zah
tui ka neih,
Izip ram e vawkhu balyn kha
ka ccukaw te ka rousah,” na ci.
26 ‘E hynh langmawlya te
ka la paccynku vae cipaw
na thae boi khyh tou?
Lungrua te koihlupaw khuapi hae kha
aronahpaw apumkuhpaw lang
na rae nawlan,
khawlya te ka la paccynpaw kha
atu tuh ka ccingsah vae.
27 Tuin kya a um hae paw tuh
mih thawzya, siikuh hae zah
mih lung pong muakhaekuh vae;
minmin tuh loo lungkhu e
aku hae hawte thuasah,
nebaleihpaw lonua hawte thuasah,
innccukaly umpaw lonua hawte thuasah,
ale kheccung mawze
baleih anaanpaw
aku hawte thuasah athua hae.
28 ‘Na thokunaw te na haungnaw,
na pounaw te na teenaw,
te ka tungvaw na thinrianaw kha
phe ka ny.
29 Ka tungvaw na thinria zah
na lysakunaw kha
ka thae vae keiccuze,
na napaw kae tho cih zah,
na mung kha rangtei kae teisah cih;
nae thuanaw laanpi kyakhate
30 “ ‘Nang na hanlan muihsahnaw tuh hynhcite athua cih: Atu kum tuh amaw le lan alethungpaw ccathae kha ae oh, khuavae kya mah tuhcite alethungpaw kha ae oh; hankum kya tuh ccathae kha ccoukuh oh lah, rue oh, misu khokhu kya lin oh lah, misu thae kha ae oh.
31 Ahiinhy hae paw Judah phin hae tuh akawlan mih tharui a sawthui cih zah, avawlan khe mih thae athae cih;
32 pawccecize ahiinhy hae paw tuh Jerusalem kyate oun pou cih hae zah, ahiin hae paw phu tuh Zion Mua kyate oun pou cih hae. E hynh vaaw Bawipaw nynh lungthote a cyih cih.
33 “ ‘Tukeiccuze Assiria siapharan te asekuh lante Bawipaw nynh a hopaw tuh: Aning nynh e khua lungkhu lang tee lan khyh, khuapi lungkhu kya the ccangkheit san kaw lan khyh, khawriaphua ccyngkute khuapi malang langkuh lan khyh, khuapi kha rawsete po voilu lan laephi adohpaw kha pumnua lan khyh hae.
34 Oun thuanaw laanpi kyakhate a kithui cih; aning nynh e khuapi lungkhu lang tee lan khyh, cite Bawipaw nynh a ci.
35 Kamaw hanlan te ka ryalahtu David hanlan, e khua hynh khum khylan ka thungkhaw cih,’ a ci,” cite a hopya.
Sennakherib A Shungnaw te A Chinaw
36 Tetuh Bawipaw vaawpaw tuh yn langkuh zah, Assiria rhawkaw ryahmin kya-e milu cciing kheit sung tarya thong pangaw kha a chia hae; awkhua takaw khua he yn dae tuh, michi rhua lang pong a tang vae hae.
37 Tetuh Assiria Siapharan Sennakherib tuh toikuh zah, inn lang ki zah Nineveh khua kya a um vae.
38 A pachia Nisrok kha beikinn kya a beik cciamang lyakhe a ccapaw hae Adrammelek te Sharezer nynh amaw kha thaloi te phe a chia hae, minmin tuh Ararat ram lungkhu lang po a ccue hae. A ccapaw Esar-haddon nynh a paaw ccelang siapharan lang a tang vae.