25
Thehoysahnaw Hlaw
1 Pou Bawipaw , nang tuh
ka Pachia nynh na thua;
nang kha kae hangthung cih,
na min kha kae thehoysah cih;
pawccecize ngaeang lan umpaw
uccaw hae kha na rae vae,
langmawlya te na la paccynpaw kha
lungzite na ccingsah vae.
2 Khuapi kha aronahpaw
athupaw apumkuhpaw lang
na tangsah zah,
khualungrua akoihkuhpaw khuapi kha
arohpaw lang na tangsah;
ramccang hae kya-e siapharan inn
a umnaw khuapi tuh phe zo vae,
raethui ci um vae lan khyh.
3 Tukeiccuze athawsaepaw
minphuin nynh
nang kha ae thehoysah cih;
a rysawthahpaw minphuin hae kya-e
khuapi hae nynh nang kha
ae rih cih hae.
4 Pawccecize nang tuh ryachi hae hanlan
khynnaw na thua zah,
anyaa hae paw nynh
mih vawsaw lya khynnaw,
khise kyate luenawpaw rekunaw te
khuaninso kyate
luenawpaw mynlyh nynh na thua.
Rysawthah hae paw thinrianaw tuh
khuaccihsaw lya-e khise hawte
atho vae ze thuasah,
5 ramccang hae siaruanaw tuh
ram rounaw kya khuaninso hawte
athua vae ze thuasah,
maeking mynlyh khate
khuaninso kha na tae;
rysawthah hae paw nynh
hlawsah hae paw roi kha na daesah.
6 Vaaw Bawipaw nynh e mua vawlan hin
ccungccaw balyn hanlan
loohdangkunaw poi te
misutui poi kha a rae cih,
tuh-e poi tuh looh athua huapaw te
misutui athua huapaw khate a rae cih.
7 Ccungccaw balyn tungvaw
bong athuapaw boei kha thuasah,
minphuin balyn tungvaw
adawkhawkuhpaw kha thuasah
aning nynh e mua vawlan hin a roh cih;
aning nynh chinaw kha
zungzae po a laang cih.
8 Te Bawipaw PACHIA nynh
ccungccaw balyn mae kyate
mitphi kha a hupah cih hae,
a ccungccaw hae thethyanaw kha
laephi pynpi kyate a lah cih,
pawccecize Bawipaw nynh a ho vae.Ref 25.8: 1Ko 15.54; Bya 7.17, 21.4
9 Tuin nin khe hynhte a ho cih hae,
Aning tuh kae Pachia nynh thua;
kaening oun khum ccaw cite
amaw kha kae ngaehoi.
Aning tuh kae ngaehoipaw
Bawipaw nynh thua;
a khumnaw kyakhe
lungtua lungpawte um oh sih.
10 Pawccecize Bawipaw kuih tuh
e mua vawlan hin a um cih.
Ccatanphue kha vaetua ia te
tuiccua kya syde athua hawte,
Moab hae kha mih umnaw kya
syde athua cih hae.Ref 25.10-12: Isa 15.1—16.14; Jer 48.1-47; Eze 25.8-11; Amo 2.1-3; Zef 2.8-11
11 Tui a zeihkuhpaw nynh a kuih kha
dyng zah a zeihku hawte,
Moab hae nynh mih ram kya
mih kuih a dyng hae zemah,
mih lysakunaw te mih zuakunaw kha
nyaasah bung athua cih.
12 Moab a rhawlungrua myarya
hangpaw kha a tingsah bung cih,
laekhu kyacia a nesah cih zah,
vuiping kya a khuliakuh cih.