22
Jerusalem Ronaw Raeringnaw Pyanaw
1 Vizin accya konglang hotypaw bya:
Nae balynte innccukaly lang
na kae oh paw tuh
paw rynaw mou athua?
2 Khuapi tuh siaruanaw te phe abeih,
nawpankeilae umpaw khuapi,
a lungtuapaw khuapi nynh thua.
Achihpaw na ccungccaw hae hynh
thaloi keiccu chih khyh hae,
rhawtuknaw kya mah
chih khyh hae.
3 Na kya-e uktu hae balyn tuh
pynkheihlan a ccue vae hae;
mih li kaw mang leite phe kyng hae.
Asawnaw lang a ccue vae hae zemah
muih athuapaw balyn kha
kyng athua hae.
4 Tukeiccuze ka hopaw tuh:
Ka kyate ccanglang hawitua,
ka sungsahpaw ka ccungccaw hae tuh
a ro keiccu hae ze
thawmawte ka rah cih,
kae hynh soihbia lan zuakuh nan.
5 Bawipaw vaaw PACHIA nynh
vizin accya kyakhe
siaruanaw, sydenaw te
lungmuanaw ccyh kha a thuasah,
khualungrua hae kha tingsah zah,
bawmnaw mue khylan siaruanaw roi tuh
mua hae kya accae.
6 Elam hae tuh the te
li bawng ccyngkuh hae zah
marangle hae te marang rhawkaw hae ryte
oun cceih hae, Kir hae nynh
khawriaphua kha a thuaaku hae.
7 Na kya-e ahoy huaccepaw accya hae tuh
marangle te phe beih zah,
marang rhawkaw hae tuh
koikua malang a thadyn hae.
8 Judah rhawlungrua tuh pong ating.
Tuin nin khe zunghe na ccakhungnaw Ramkaw e Inn kha na do zah,
9 David khuapi kya aronahpaw patae kha na muih, te akawlan e tuikua kyate apoupaw tui kha na suelua.
10 Jerusalem e inn hae kha na ria zah, khualungrua koih nawlan inn hae kha na phou hae.
11 Tui tungnawpaw tuikua arynpaw kyate apoupaw tui kha tung nawlan tuikuapi kha khualungrua ccangning laku khe na rae. Thuasalama e uccaw a raetu kha na tuabia khyh, langmawlya te hynh-e uccaw a la paccyntupaw kha pawlang na ria khyh.
12 Tuin nin vae tuh Bawipaw
vaaw PACHIA nynh
rawkhuite hawkhaeku lan,
lu-oku lan te buriboei
zingku lan ae ko oh;
13 thuasalama lungtua lungpawnaw
poi tuakute, vaetua te tuu chiate
saw na ae oh zah misutui na nia oh.
“Ae oh sih lah, neih oh sih,
pawccecize awkhualan
ah chih cih oh,” na ciku oh.Ref 22.13: 1Ko 15.32
14 Vaaw Bawipaw nynh
ka nakaring kya yn hopyapaw tuh:
Thanccingte e nae hoyleinaw hynh
na chi makhia oh
ngaethya thua lan khyh, cite
Bawipaw PACHIA nynh a ci.
Shebna kha Raeringnaw Pyanaw
15 Bawipaw vaaw PACHIA nynh hynhte a ho: Synriatu athuapaw, siapharan inn uktu Shebna kalan cceih lah:
16 E kya pawmou na se? Ahangnaw hmin kya shawku raekute, lungpi kya umnaw na karynkuh zah, shawku raeku lan ciate hein kya na puizia a um tou?
17 Bawipaw nynh nang kha asawnaw lang ae vua vae cih, ka ban. Nang kha phang ae kyng cih zah,
18 miabung miathung ae mia cih, te ram akonaw langkhe bawlung hawte ae vua cih; tuin kyakhe na chih cih, myarya lypaw na marangle hae tuh tuin kya a um cih hae, na bawipaw inn kha the na thyasah!
19 Na ryalaw kae phoh cih zah, na ryalawnaw hmin kyate kae ccawsah bung cih.
20 Tuin nin vae tuh Hilkiah ccapaw ka ryalahtu Eliakim kha ka ko cih,
21 te na angkiccua kha ka kisakuh cih zah, na taeccia kha ka cciasakuh cih. Na kya-e kawhoinaw kha ka pya cih zah, aning tuh Jerusalem um hae paw te Judah phin hae hanlan paaw athua cih.
22 David ciihan kya-e toh kha a raw vawlan ka khang cih; aning nynh a hung cih zah, hum nynh sanmah khaw lan khyh; aning nynh a khaw cih zah, hum nynh sanmah hung lan khyh.Ref 22.22: Bya 3.7
23 Aning kha akhynnaw hmin khe pang reihnawpaw ccong hawte ka tynsah cih zah, a minpaaw hae ciihan kyaze sawtua lan umpaw bawitungkhung lang a tang cih.
24 Te a minpaaw inn kya-e phu-enaw aphuinphuin, ciihan te ccaawno, adihpaw angphe miakaw, banang hae te ccekoh hae balyn kyacia a tungvaw khe a baw cih hae.
25 Tuin nin khe vaaw Bawipaw nynh a hopaw tuh: Akhynnaw kya tynkaring lan a umpaw uccaw bawnawpaw ccong tuh a nuekuh cih; bae athua cih zah a ccah cih, a tungvaw bawkuhpaw uccaw miakaw tuh aroh cih, pawccecize Bawipaw nynh a ho vae.