19
Izip Konglang Hotypaw Bya
1 Izip konglang Pachia nynh a hotypaw bya tuh:
Dotua, Bawipaw tuh
arangpaw maeking ccikute
Izip ram lang yn thua vae;
Izip ram e zohtuh hae tuh
amaw malang a thyngkuh cih hae zah,
Izip hae tuh mih rawthah vae cih.Ref 19.1-25: Jer 46.2-26; Eze 29.1—32.32
2 Izip hae kha mimaw te mimaw
rhawku lan ka tuhou cih hae zah,
lu kheit te lu kheit a doukuh cih hae,
innpaw te innpaw,
khua kheit te khua kheit,
ram kheit te ram kheit
a doukuh cih hae;
3 Izip hae thinlung kha
ka zosah cih zah,
mih khuakhannaw kha ka roh cih;
minmin nynh zohtuh hae,
michi hae muisaw,
naawthya hae paw te
muisaw hae kha tuanaw
a ngiakuh cih hae;
4 Izip hae kha a puathopaw bawi kuih kalan
ka ap cih hae;
a rysawthahpaw siapharan nynh
a uk cih hae cite
Alesaepaw, vaaw Bawipaw nynh a ci.
5 Nal vawkhu e tui tuh akan cih zah,
arou cih;
6 Vawpi kyate tuizypi a zy hae paw tuh
athuh cih zah,
Izip kya-e Nal vawpi kyate
a phiakuh hae paw vaw hae tuh
adih cih hae zah arou cih hae,
phaeku hae te thabu hae tuh
anaan cih hae.
7 Nal vaw kin tuh aku a um leinaw
hmin lang a tang cih;
Nal vawkhu pe ccoupaw aku balyn tuh arou cih,
khisan nynh a mung cih zah azo cih.
8 Ngasaw kyngte vue a kuakuh hae paw tuh
ngaethyate a rah a khui cih hae;
Nal vaw kya ngasaw bawtu balyn tuh
mih ngaethah cih zah,
tui vawlan paih a rawtu hae tuh
mih lungthawthang cih.
9 Buri law te boeikuathya hae paw tuh
mih lungthang cih zah,
mih thanenaw azyabung vae cih.
10 Boeikuathya hae paw tuh
mih lungroh cih zah,
vaeluapaw balyn tuh mih ngaethah cih.
11 Zoan khua e cciakhaetu hae tuh
mingaee hae nynh thua;
Faro siapharan kya-e
tuanaw pyatu hae nynh
ngaeepaw tuanaw kha a pya hae.
“Kae tuh a hawpaw lu kheit,
te langmawlya e siapharan ciihan nynh ka thua,”
cite pawtemou Faro kha
na hopya ngan oh?
12 Na mihaw hae tuh atu teimou a um hae?
Vaaw Bawipaw nynh Izip kha
rawsete pawtemou a paccyn cipaw kha
minmin nynh ae hopah hae sah lah,
ae nysah hae sah.
13 Zoan khua e cciakhaetu hae tuh
a ngaee vae hae,
Memfis khua e cciakhaetu hae tuh
mihyn hae nynh thua;
Izip cciakhaetu hae nynh Izip kha
a cciakhaesei vae hae.
14 Bawipaw nynh cciakhaetu hae kha
mih thinlung a muasah vae hae;
aruipaw nynh amaw a lua toulou kya
a thei hawte, minmin nynh Izip kha
a cyipaw miakaw kya a cyiseisah hae.
15 Izip a lu nynh thuasah,
a leihmae nynh thuasah,
ungcci ku akaran nynh thuasah,
phaeku nynh thuasah
Izip hanlan pawpaw mah cyih kho lan khyh.
16 Tuin nin khe Izip hae tuh nopi hawte athua cih hae zah, vaaw Bawipaw nynh minmin tungvaw a hangnua hae paw a kuih malang khe rawrite a thyngkuh cih hae.
17 Te vaaw Bawipaw nynh Izip hae hanlan a paccynpaw keiccuze Judah ram tuh Izip hae hanlan ri lan umpaw lang a tang cih.
Izip, Assiria te Israel Hythua Ccounaw
18 Tuin nin khe Izip ram e khuapi khuapangaw nynh Kanaan bya a ho cih hae zah, vaaw Bawipaw min te thyalawkute bya a kinkuh cih hae. Tuh-e khuapi kya-e khua kheit tuh Khuanin Khuapi cite a ko cih hae.
19 Tuin nin khe Izip ram angaelung kya Bawipaw hanlan silawhang ccangkheit a um cih; Izip ramri khe Bawipaw hanlan lungbing a um cih.
20 Tuh-e tuh Izip ram kya vaaw Bawipaw hanlan muihsahnaw te ccaekia athua cih; tuaasahtu hae keiccuze minmin nynh Bawipaw kalan he a sia hae ze, aning nynh khumtu a sawpah cih hae, te tuh-e khumtu nynh a thungkhaw cih hae zah a khum cih hae.
21 Bawipaw nynh amaw kha Izip hae kya a nysakuh cih hae; tuin nin khe Izip hae nynh Bawipaw kha a nyh cih hae zah, silawnawpaw te maee-ute silawnaw khate a beik cih hae; Bawipaw kalan byakinnaw a rae cih hae zah, bya a kinku hae thyhte a cyih cih hae.
22 Bawipaw nynh Izip kha de a tah cih, thuasalama bua a dansah cih; minmin nynh Bawipaw kalan a maeleihkuh cih hae zah, a ngia hae paw kha a thaepah cih hae zah a dansah cih hae.
23 Tuin ccyh khe Izip ram te Assiria lang laanpi a um cih, te Assiria hae nynh Izip ram lang a cceih cih hae zah, Izip hae nynh Assiria ram lang a cceih cih hae, te Izip hae tuh Assiria hae ryte a beikkheih cih hae.
24 Tuin ccyh khe Izip te Assiria ryte Israel tuh ram thumnaw athua cih zah, laephi pynpi hanlan hythuanaw athua cih,
25 vaaw Bawipaw nynh minmin kha hythuapya hae zah, “Ka ccungccaw Izip, ka raepaw Assiria te ka rho Israel tungvaw hythuanaw um sah,” a cipya hae.