14
Judah Kithuinaw
1 Bawipaw nynh Jakob kha ngaethya a umsah cih zah Israel kha bua a po cih, te minmin kha mimaw ram kya a umsah cih hae; ramccang hae nynh minmin ryte a mungkuh cih hae zah Jakob ciihan te a umkheih cih hae.
2 Minphuin hae nynh minmin kha mimaw umnaw kalan a cciakhae cih hae, te Israel ciihan hae nynh Bawipaw ram kyakhe ramccang hae kha seenung te seepaw lang a hoi cih hae; minmin a la kyngtu hae kha a kyng cih hae zah, minmin a la tuaasahtu hae kha a uk cih hae.
Babilon Siapharan Shungnaw
3 Bawipaw nynh nanning kha ccinaw, teingnaw te nangsekute nawkupaw ryalaw rupaw kyate haeungnaw he ae pya oh te,
4 Babilon siapharan kha hynhte na sarya cih oh:
Yn tuaa yn sahtupaw tuh phe chih vae hynhsa!
A puathonaw tuh phe adae vae hynhsa!
5 Bawipaw nynh ccungccaw hoylei
hae paw kya-e hoitang kha a khyapya vae,
6 ccungccaw hae kha thindynte, apaekuh lei lan
thung hae zah, ram hae kha tuaasahnawte
thindynte a uk hae paw kya-e ccoi kha
a khyapya vae hae.
7 Tetuh laephi pynpi tuh daenaw te
ngaengannaw te um zah,
lungtuate hlaw a sah hae.
8 Lebanon ram e maeccaw ku hae te
sidar ku hae tuh mih lungtua zah,
“Nang tuh na khuliakuh vae zah,
kaening kha nge khylan hum sanmah
yn thua vae khyh,” a ci hae.
9 Nang he nae thua vae ze,
nang te tungku khylan
akawlan e michi khua tuh a paccynkuh;
nang kha cciadue khylan michi hae te
laephi cciakhaetu hae balyn kha
a thosah hae; ram hae kya-e
siapharan hae balyn kha
mih bawitungkhung kyate
a thosahku hae.
10 Mih balynte nang kha
ae hopah cih hae zah:
“Nang mah kaening hawte
na thawzyabua vae!
Kaening hawte na thuabua vae!”
ae cipah cih hae.
11 Na lesaenaw te na tintang hae roi tuh
michi khua lang sawbung athua vae;
zanpaw vawlan na ih zah,
na thykupaw boei mah
12 Pou awkhua ccapaw, Nizy Awsi,
nang tuh vaawlui kyate na ccah vae!
minphuin hae kha a la taepaw nang tuh
laephi kya khuliasaku na thua vae!Ref 14.12: Bya 8.10, 9.1
13 Na thinlung kyakhe nang nynh,
“Vaawlang ka kae cih;
ka bawitungkhung hynh
Pachia awsi hae
luki lang ka hangthung cih;
palung lang e a pumkunaw hae
mua vawlan khe ka haung cih;Ref 14.13-15: Mat 11.23; Luk 10.15
14 maeking dung lang
ka kaethung cih zah,
Ahang Huaccepaw hawte
ka um cih,” na ciku.
15 Thuasalama nang tuh
Hunghua akhunaw lang,
Michi khua lang sawbung na thua vae.
16 Nang ae muih hae paw nynh
nang kha riri dote
na konglang a tua cih hae zah:
“E ccungccapaw hynh
laephi a thyngsakuhpaw,
ram hae kha a siisakuh hae paw athua tou?
17 Laephi kha laesia ram lang tangsah zah,
khuapi hae a rohtupaw,
amaw nynh thong a saw hae paw kha
mih inn lang a kisah lei hae paw
athua tou?” cite a ho cih hae.
18 Laephi vaw e siapharan balyn tuh
alypaw mih shaw raveih kya a ih hae;
19 thuasalama nang tuh anungsikuhpaw
sathuhpaw hawte na shawku te
asawkunaw langkhe ccaring ae vua hae;
michi rhua te thuasah, thaloi te
thuingpaw michi khate thuasah,
Hunghua lungkhu e lung vawlan
a ccahpaw michi khate thuasah
nang kha bong na thua zah,
ccu te sydepaw
michi rhua hawte nynh na thua.
20 Ming hae ryte uukheih na thua lan khyh,
pawccecize na ram kha na roh zah,
na ccungccaw hae kha
Hoyleinaw a rae hae paw ciihan hae
mih min tuh papinmaw um nan vae sah!
21 Mih minpaaw hae seinaw keiccuze
siapharan ccapaw hae
chianaw kha paccyn oh.
Minmin nynh laephi uk khylan te
laephipi kya khuapi raeku khylan kha
papinmaw thokuh nan vae hae sah.
22 Vaaw Bawipaw nynh a hopaw tuh, minmin kha ka thonuakuh cih hae zah, Babilon min te a laehy hae paw kha thuasah, ciihan te ccaawno hae kha thuasah ka roh cih hae cite Bawipaw nynh a ci.
23 Babilon kha sazi umnaw, tui a ynku nawlan ka rae cih, ronaw innphi te ka phi cih, cite vaaw Bawipaw nynh a ci.
Assiria Konglang Hotypaw Bya
24 Vaaw Bawipaw nynh byakinkute a hopaw tuh:
Khua ka khan thyhte acyihkuh cih;
ka paccyn thyhte cyi athua cih:Ref 14.24-27: Isa 10.5-34; Nah 1.1—3.19; Zef 2.13-15
25 Ka ram kyakhe Assiria hae kha
ka theih cih hae zah, ka mua vawlan khe
ccu te ka syde cih hae; Assiria hae kya-e
puihnawpaw ccong tuh
ka ccungccaw hae kyate vua athua cih zah,
Assiria kya-e phupaw aripaw kha
ka ccungccaw hae raw kyate khah athua cih.
26 E hynh laephi pynpi te asekuh lante
a paccynpaw nynh thua;
e hynh minphuin balyn tungvaw
a dyngpaw a kuih nynh thua.
27 Vaaw Bawipaw nynh a paccyn vae paw kha
hum nynh mou a roh kho cih?
A dyngpaw a kuih kha
hum nynh mou a khingsah kho cih?
Filistin Konglang Hotynaw
28 Ahaz Siapharan a chi kum khe e bya hynh a hoty:Ref 14.28: 2Si 16.20; 2Sh 28.27
29 Pou Filistin hae balyn,
nanning buanawpaw ccungngue
akhya keiccuze nae lungtua nan sah,
khah-e hupaw phin kyate huparepaw
yn langkuh cih,
tuh-e huparepaw a taw tuh
azouthyapaw hupaw,
maeesoi tahawpaw athua cih.Ref 14.29-31: Jer 47.1-7; Eze 25.15-17; Joe 3.4-8; Amo 1.6-8; Zef 2.4-7; Zek 9.5-7
30 Ryachi hae lakuze
a ryachihua hae paw tuh
a ae cih hae, ahobou hae paw tuh
khyndadyh lan a ih cih hae;
thuasalama na ciihan hae tuh
ccakannaw te ka chisah cih hae,
na kya-e a laehy hae paw kha
ka theih cih hae.
31 Pou koikua, rawtua;
Pou khuapi, rawte siaruatua;
Pou Filistin, nae balynte rawrite um oh!
Pawccecize thahlang te
maeekhuh yn pou zah,
tuh-e aphu kyatuin a rawthahpaw
32 Filistin ram kyate oun thua hae paw
locceihtu hae kha pawtemou
byakhung lan hae?
“Bawipaw nynh Zion khua kha a rae vae,
a ccungccaw hae kyaze
a ryachi hae paw nynh
tuh-e khua kya khynnaw
a muihkuh cih hae,”