11
Adaepaw Peenaw
Jessi ccungmuing kyate
thingno thawpaw yn toih cih zah,
a tharui kyate akaran tuh yn lethung cih.Ref 11.1: Bya 5.5, 22.16
Bawipaw muisaw tuh
a tungvaw a um cih, hawnaw te
nythyanaw muisaw, tuanaw pyakunaw te
thungnaw muisaw, nynaw muisaw te
Bawipaw rawrinaw kha
a tungvaw a um cih.
Bawipaw rawrinaw kha
a lungrythuakhaekuh cih.
 
A mit nynh a muih thyhte
byapia lan khyh,
a naw nynh a thae thyhte mah
byapae lan khyh;
ryachi hae kha dingnaw te
bya a piapah cih hae zah,
laephi vaw e a nyaa hae paw kha
ahmete bya a paepah cih hae,
a mung kya-e a bya ccungngue khate
laephi kha a bua cih zah,
a khalang kya-e hy khate
ccungccaw hoylei hae paw kha
a theih cih hae.Ref 11.4: 2Th 2.8
Dingnaw tuh a tae kya-e
taeccia athua cih zah,
lungzinaw tuh a tae kya
voikupaw taeccia athua cih.Ref 11.5: Efe 6.14
 
Suizaw tuh tuu te a umkheih cih hae,
kaesing tuh miaa ataw te
a ryakheih cih hae,
vaetuataw, chindeih taw te
athopaw sahiin taw hae tuh
a aekheih cih hae zah,
imua taraw nynh a cciakhae cih hae.Ref 11.6-9: Isa 65.25
Vaetua te vong tuh
a aekheih cih hae zah,
mih taw hae tuh a ryakheih cih hae;
chindeih nynh tangnuapaw hawte
ccatanphue kha a ae cih.
Matei zu ungpaw imua nynh
huparepaw pe khe a zue cih,
matei phiakuh vae paw imua nynh
huparepaw khu kha a kuih te a pu cih.
Minmin nynh athyaapaw
ka mua vawlan khe
vawsaw pyakunaw te ronaw kha
rae lan khyh hae;
pawccecize rili tuh tui te phe abia hawte,
laephi tuh Bawipaw nynaw khate
phe abeih cih.
 
Israel te Judah KithuinawRef 11.9: Hab 2.14
10 Tuin nin khe Jessi tharui tuh ccungccaw hae hanlan syntawnaw lante yn thadyn cih; minphuin hae nynh amaw kha akaw-aleih a khia cih hae zah, a umnaw tuh a phu-e cih.Ref 11.10: Rom 15.12
11 Tuin nin khe Bawipaw nynh a kuih a dyng cih zah, Assiria ram, Izip ram, Pathros ram, Ethiopia ram, Elam ram, Shinar ram, Hamath ram te rili kin e ram hae kyate a laehypaw a ccungccaw hae kha vaeningnaw a kikhae cih hae.
12 Minphuin hae hanlan syntawnawpaw kha
a hangthung cih zah,
a zawpui hae paw Israel hae te
phiariphiarae um hae paw Judah hae kha
laephi ki kipali kyate a suelua cih hae.
13 Efraim tuh eiungnaw thinlung
hoi vae lan khyh zah,
Judah tuh rhawku rynaw thinlung
hoi vae lan khyh;
Efraim nynh Judah tungvaw eiungnaw
hoi vae lan khyh zah,
Judah nynh mah Efraim tungvaw
rhaw rynaw thinlung hoi vae lan khyh.
14 Minmin nynh niccaw lang e Filistin hae kha
a tuk cih hae zah,
nithua ccungccaw hae kya-e uccaw kha mah
a luade cih hae.
Edom hae te Moab hae tungvaw
mih kuih a hangnua cih hae,
Ammon hae nynh mih kaw a ngae cih hae.
15 Bawipaw nynh Izip rili akouleihnaw kha
a kangsah cih,
Vawpi vawlan khe a thawsaepaw khisan ryte
a kuih a he cih zah,
Vawpi kha vaw vawsari lang a phia cih,
ccu te zua nawlan laanpi kha a rae cih;Ref 11.15: Bya 16.12
16 Izip ram kyate he a pou hae tuh,
Israel hae hanlan laanpi a um hawte,
a laehypaw a ccungccaw hae hanlan
Assiria ram kyate ccianaw
laanluepi a um cih.