8
Hopiatu
1 Atu ah ho oh paw uccaw hae kong abyapi tuh: Vaawram kya Lesaenaw bawitungkhung ranglang a dahungpaw, khahcihawpaw Ranpibawi Lupi kha aening ah hoi oh.Ref 8.1: Sam 110.1
2 Aning tuh ccungccaw nynh sak leipaw, Bawipaw nynh a sakpaw beikbu ccaccing athuapaw beikinnthyaa kya Pachia ryalahtu nynh thua.
3 Pawccecize ranpibawi lupi miakaw tuh lasung hae te silawnawpaw khate silawpya khylan khangpaw nynh thua. Tukeiccuze hynh-e paw mah silaw nawlan ccangkhakheit a hoi aho.
4 Pawccecize aning tuh laephi vawlan a la um lanze, ranpibawi la thua lan khyh, pawccecize kawbya thyhte lasung te silawpahpaw ranpibawi hae a um.
5 Minmin tuh vaawlang e beikinnthyaa pungsan te alokuhpaw mynlyh kyakhe nynh rya a law hae. Tuh-e keiccu Moses nynh beikbu kha sak lan vae cite he a noukuh tuh, “Mua vawlan nang na kya langsahpya athuapaw pungsan thyhawte pawpaw balyn kha na rae nawlan raeringkuh,” cite Pachia nynh Moses kha raeringnaw a pya.Ref 8.5: Exo 25.40
6 Thuasalama Jesu tuh ahoy huapaw byakinpyakunaw kya thadynsah thua zah ahoy huapaw byakinnaw kya-e hopiatu mah athua keiccuze atu aning tuh ahoy huaccepaw ryalaw kha phe a mue vae.
7 Pawccecize masaty e byakinnaw tuh seimenaw a la um khyh lanze, vaeningnaw byakinnaw kha ccung la thua vae lan khyh.
8 Pawccecize ccungccaw hae kya Pachia nynh seimenaw muihpah hae zah a hopaw tuh:
“Israel phin te Judah phin hae ryte
byakinnaw thawpaw
kae rae ccyh tuh solei yn thua cih;Ref 8.8-12: Jer 31.31-34 (LXX)
9 Izip ram kyate minmin kha
kuih te ka sue hae zah
ka cciakhae lya hae ze,
mih minpaaw hae ryte
ka raepaw byakinnaw thyhte
thua vae lan khyh;
pawccecize ka byakinnaw kya
minmin nynh atyn khyh hae keiccuze
kae mah minmin kha
ka do-oih khyh hae cite
Bawipaw nynh a ci.
10 Tuh-e nin hae koute
Israel phin kya ka rae lanpaw
byakinnaw tuh hynhte nynh athua:
Ka kawbya hae kha
mih lungkhu kya ka nung cih zah,
mih thinlung kya ka zei cih;
te kae tuh mih Pachia
ka thua cih zah, minmin tuh
ka ccungccaw hae athua cih hae.
11 ‘Bawipaw kha nytua,’
cite lu kheit te lu kheit
ccangpyakute hopakuh
vae lan khyh hae,
pawccecize adih huaccepaw kyate
ale huaccepaw kyacia
mih balynte kae kha
yn nyh vae cih hae.
12 Pawccecize mih hoyleinaw kha
ngaethya ka umsah cih hae zah,
mih seinaw kha
ka liathui vae lan khyh,” a ci.
13 “Byakin Thawpaw” a cipaw kya masaty byakinnaw kha arynpaw lang a tangsah vae. Ryn zah apuepaw uccaw tuh aro mawze azo cih.