3
Sawsang Ngianaw
1 Nyathyakou kya uteno hae, Bawipaw bya tuh nanning kya acyiku hawte, teitei balyn pong pazaekuh kangmaw zah phu-esah athua nawlan kae hanlan saw oun la sangpah oh.
2 Ccungccaw hoyleipaw te ccungccaw thya hae kuih kyate kaening hynh oun luesah nawlan saw oun la sangpah oh; pawccecize ccungccaw balyn nynh zynnaw hoi khyh hae.
3 Thuasalama Bawipaw tuh a lungzipaw nynh thua; aning nynh thawzung ae pya cih oh zah ccungccaw hoyleipaw kyate ae thungkhaw cih oh.
4 Kaw kae pya oh paw kha na cyih oh zah po na la cyih cih oh cite nanning konglang te Bawipaw kya zynkunaw kae hoi.
5 Bawipaw nynh nae thinlung kha Pachia sungsahnaw te Khri kya-e lungsaenaw kalan ae la cciakhae vae oh sah.
A Thawnawpaw Raeringnaw Pyanaw
6 Uteno hae, kaening kyate a mue hae paw phung thyhte hiin leite, a thawnawpaw zyntu hae kha la sibia oh cite ah Bawipaw Jesu Khri min te kaw kae pya oh.
7 Pawccecize naemaw ccaccei nynh kaening kha pawtemou dosuinku lan hae cipaw na ny oh; pawccecize nae kya kae um lya kae thawnaw khyh.
8 Ccungccaw lukhakheit looh kha amee pya leite kae ae khyh; nanning lukhakheit kya phuripaw kae thua khyh nawlan, khuazi khuadae thawbangte zuakute rya kae lawkuh.
9 Tuhte rya kae lawkupaw tuh nae kya-e lawku lan kaw kae hoi khyh keiccu thua leite, nanning nynh kae thydokute na dosuinku oh ccaw cite nynh thua.
10 Pawccecize nanning ryte ah umkheih oh lya kha, lukhakheit nynh rya a law ry khyh ze, aepaw mah ae nan sah cite kaw kae pya vae oh.
11 Pawccecize nanning kyaze ccungccaw abang tuh mih thawnaw zah ryalaw kharouh law leite ming hae byathan kya palei a ccukuh bua hae cite kae thae.
12 Tuhcihawpaw ccungccaw hae tuh daebabi lan ryalawkuh hae sah lah mimaw vue kha kuakuh hae sah cite Bawipaw Jesu Khri liate kaw kae pya hae zah kae hyy hae.
13 Uteno hae, nanning tuh ahoypaw ryalawnaw kya nae lungthawthang nan sah.
14 E ccaky kya-e kae bya hynh lukhakheit nynh a zui khyh ze, tuh-e paw tuh la syntaw oh lah a maethya nawlan la mungkuh nan oh.
15 Thuasalama rhaw hawte tua leite, uno hawte raeringnaw la pya oh.
Nyathya Beihlangnaw
16 Daenaw Bawipaw amaw ccaccei nynh daenaw kha ccyh takyh kya aphuinphuin te zungzae ae la pya vae oh sah. Bawipaw tuh nae balyn kya la um sah.
17 Kae, Paul nynh kae beihlangnaw oh paw hynh kamaw ka kuih ccaccei te nynh ka zei; tuh-e tuh ka ccaky miakaw kya syntawnaw nynh thua.
18 Ah Bawipaw Jesu Khri thawccinaw tuh nae balyn kya la um vae sah.